1-2. Ngimba tukusayiwa bulebule panongwa yakuti tupeliwe munjila yakuti tulwagheghe ulusekelo panongwa yakupa ukukinda ukwambilila?

 PAKABALILO aka Yehova apelagha abandu, abapelile munjila iyakuti bayeghe balusekelo fiyo linga bikupa ukukinda linga bikwambilila. (Imbo. 20:35) Ngimba isi sikusanusya ukuti tutikuya balusekelo linga tukwambilila? Hayi. Tusimenye ukuti twesa tukuya balusekelo linga twambilile ikyabupe. Loli tukuya balusekelo fiyo linga tukubapa abangi. Kangi tukusayiwa fiyo panongwa yakuti momuno Yehova atupelile. Nongwa yafiki?

² Panongwa yakuti Yehova atupelile munjila iyi, tukongelela ulusekelo lwitu. Tubaghile ukongelela ulusekelo lwitu linga tukulwaghilapo ulusako lwakubatula abangi. Syakuhobosya fiyo ukuti Yehova atupelile munjila inunu bo iyi.—Sal. 139:14.

3. Nongwa yafiki Yehova ikuyobiwa ukuya yo “Kyala walusekelo”?

³ Amalemba ghikutubula ukuti ukupa kukutwala ulusekelo, yonongwa yake tutikuswigha ukuti Ibaibolo likunjoba Yehova ukuya “Kyala walusekelo.” (1 Tim. 1:11 NWT) Yehova yo wakupa kangi wamaka. Bo muno untumiwa Pauli ayobile ukuti panongwa ya Yehova, “tuli bumi, tukwenda, kangi tuliko.” (Imbo. 17:28) Bwanaloli ukuti, “ifyabupe fyosa ifinunu, nifyabupe fyosa ifipelelesye” fyo fikufuma kwa Yehova.—Yak. 1:17.

4. Ngimba findu fiki fibaghile ukututula ukuya balusekelo fiyo?

⁴ Twesa tukulonda ukuya nulusekelo ulu lukwisa panongwa yakupa. Tubaghile ukubomba isi mwakukonga akayilo akakupa  aka Yehova. (Ef. 5:1) Isagha twinong’onele isi tubaghile ukubomba linga tukuketa ukuti abangi batikundaghisya isi tukubomba. Isi sikuya pakututula ukulwagha ulusekelo ulu lukwisa panongwa yakupa.

AMUKONGEGHE AKAYILO KA YEHOVA AKAKUPA

5. Ngimba Yehova ikutupa ifindu fiki?

⁵ Ngimba fyo findu filiku ifingi ifi Yehova ikutupa? Mwakifwanikisyo, Yehova ikutupa ifindu ifyakumbili. Tukabaghila ukuya nifindu fyapamwanya loli tukunndaghisya fiyo Yehova panongwa yakuti tuli nifindu ifi tukulondiwa. Mwakifwanikisyo, ikutupa ifyakulya, ifyakufwala, namalo aghakwikala. (Sal. 4:8; Mat. 6:​31-33; 1 Tim. 6:​6-8) Ngimba Yehova ikutupa ifi tukulondiwa panongwa yakuti bo budindo bwake? Mukaya momuno siyilile. Nongwa yafiki Yehova ikutubombela isi?

6. Ngimba tukumanyilapo isyafiki pa Matai 6:​25, 26?

⁶ Yehova ikutupa ifi tukulondiwa panongwa yakuti atughanile. Inong’onela amasyu gha Yesu agha ghikwaghiwa pa Matai 6:​25, 26. (Belenga.) Yesu abombesyelagha ififwanikisyo fyakipeliwa. Pakuyoba isya njuni, Yesu atile: “Buno sitikusopa nukutondola, kangi sitikubunganikisya mundamba.” Loli keta isi ayobile ukufuma apo, umwene atile: “Uwisemwe wa kumwanya ikusiswila.” Ukufuma apo alalusisye ukuti: “Umwe lelo kali mukasikinda injuni ubupala?” Ngimba tukumanyilapo isyafiki? Yehova ikubaketa ababombi bake ukuya bakulondiwa fiyo ukukinda ifinyamana. Linga Yehova ikufipwelelela bo ulu ifinyamana, tuli nulusubilo losa ukuti ikuya pakutupa ifi tukulondiwa. Pakuya yo tata walughano kubandu bake, Yehova ikutupa ifi tukulondiwa panongwa yalughano.—Sal. 145:16; Mat. 6:32.

7. Ngimba njila yimo yiliku iyi tubaghile ukunkonga Yehova pankhani yakupa? (Keta kangi ikithuzi.)

⁷ Nanuswe tubaghile ukubatula abandu panongwa yalughano. Mwakifwanikisyo, ngimba alipo unkamu pamo umulumbu yumo uyu ikulondiwa ubutuli? Yehova abaghile ukubabombesyela umwe ukuti mubatule pa ifi bikulondiwa. Linga kubombiwe ingozi syakipeliwa, abandu ba Yehova bikumanyiwa nakayilo akakupa. Mwakifwanikisyo, nkabalilo ka COVID-19, abakamu na balumbu batulilepo mwakubika ifyakulya, imyenda, nifingi ukuti fibatule aba balondiwagha ubutuli. Abandu bingi batulilepo pambombo ya pakisu kyosa. Ifi fyabatulile abakamu na balumbu pakisu  kyosa aba bapalamasiwe ningozi syakipeliwa. Abakamu na balumbu aba bakongagha ilemba lya Bahiburi 13:16 ili likuti: “Loli mungibwagha ukubomba imbombo inunu, nisya bulilanisi; namanga amakemo bo ghaghagha gho ghikunkyela Kyala.”

8. Ngimba tukusayiwa bulebule panongwa ya maka agha Yehova ikutupa? (Bafilipi 2:13)

⁸ Yehova ikutupa amaka. Yehova ali namaka amakindilisi kangi ikubapa ababombi bake. (Belenga Bafilipi 2:13.) Ngimba mwiputilemo kwa Yehova ukunsuma ukuti abapepo amaka aghakwifimbilisya kungelo? Mubaghile ukuti mukusuma amaka ukuti mubombe kanunu imbombo. Linga inyiputo syinu syamuliwe, mubaghile ukukolelana nu ntumiwa Pauli uyu alembile ukuti: “Mbaghile ukusibomba syosa, muli yuyo ikumba amaka.”—Filip. 4:13.

9. Ngimba tubaghile ukunkonga bulebule Yehova pankhani yakubombesyela kanunu amaka ukuti tubatule abangi? (Keta kangi ikithuzi.)

⁹ Nalinga ukuti tuli bandu abasitabugholofu, loli tubaghile ukunkonga Yehova pankhani yakubombela amaka ghitu. Tukabaghila ukuya namaka kangi tukabaghila ukubapa abandu amaka bo muno Yehova ikubombela. Loli tubaghile ukunkonga mwakubombela amaka ghitu pakubatula. Mwakifwanikisyo, tubaghile ukubatula imbombo syapakaya abakamu abakusi pamo ababine. Linga tubaghile ukufwanisya, tubaghile ukutulapo pambombo yakutendekesya Inyumba ya Bunyafyale. Linga tukubombesyela amaka ghitu munjila iyi, ko kuti tukubatula abakamu na balumbu bitu.

10. Ngimba tubaghile ukubakasya bulebule abangi na isi tukuyoba?

¹⁰ Tubaghile ukubakasya kangi mwakuyoba amasyu agha ghabaghile ukubakasya. Ngimba balipo bamo aba babaghile ukukasiwa linga mukubandaghisya pa isi bikubomba? Ngimba alipo yumo uyu ikulondiwa ukusubisiwa? Ngimba mukabaghila ukubombapo simo? Mubaghile ukubuka kunyumba yake, ukwimba ifoni, ukutuma ikadi, pamo ukundembela kalata. Mutikulondiwa ukuyoba nyingi. Amasyu amapimba kangi amapepe aghakufuma pasi pandumbula ghabaghile ukuntula ukuya nsubiliwa kangi ukuti ipilikeghe kanunu linga aghene ningelo.—Mbu. 12:25; Ef. 4:29.

11. Ngimba Yehova ikubombela bulebule amahala ghake?

¹¹ Yehova ikutupa amahala. Umfundiwa Yakobu alembile ukuti: “Loli linga yumo mmyinu aghilwe amahala, yo alisumagha kwa Kyala uyu ikubapa bosa itolo kisitakwilamwa, kangi kisitakulumbusya.” (Yak. 1:5) Isi sikunangisya ukuti Yehova ikubapa abandu bake amahala. Umwene ikubapa abandu bake amahala  “kisitakwilamwa,” kangi “kisitakulumbusya.” Atikulonda ukuti twipilikeghe ububibi linga tukulonda ubulongosi ukufuma kumyake. Loli ikulonda ukuti tusumeghe kumyake.—Mbu. 2:​1-6.

12. Ngimba lusako luliku ulu tuli nalo pankhani yakubamanyisya abangi isi tumanyile?

¹² Ngimba uswe tubaghile ukunkonga Yehova mwakubapa abinitu amahala? (Sal. 32:8) Ababombi ba Yehova bali nulusako ulwakubabulako abangi isi bamanyile. Mwakifwanikisyo, utubalilo twingi tukubamanyisya abafumusi abapya muno babaghile ukufumukisya. Mwakwiyisya abakulumba bikubamanyisya abatuli bakipanga nabakamu aba bosiwe mwalululu muno babaghile ukubombela ububombeli bwabo nkipanga. Kangi aba bali namaluso aghakuyenga nukutendekesya, bikubamanyisya abangi muno babaghile ukubombela.

13. Linga tukubamanyisya abangi, ngimba tubaghile ukunkonga bulebule Yehova pankhani yakubapa abangi amahala?

¹³ Aba bikutulapo pakubamanyisya abangi bikukonga ikifwanikisyo kya Yehova. Yehova ikubapa abandu bake amahala mwalughano. Nanuswe tukulonda ukubamanyisya abinitu amaluso agha tuli nagho. Tutikuleka ukubamanyisya abangi panongwa yakuti linga akabalilo kakindilepo, babaghile ukwingila mmalo ghitu. Tutikuketa ukuti panongwa yakuti twamanyile twibene, bope bikuya pakumanyila bene. Akayilo bo aka katikulondiwa ku babombi ba Yehova. Mmalo mwake, tukuhoboka fiyo ukubabulako abangi isi tusimenye nukubapa “ubumi bwitu.” (1 Tes. 2:8) Tukulonda ukuti bope bafwanisyeghe “ukubamanyisya nabangi.” (2 Tim. 2:​1, 2) Ukubomba bo ulu, kubaghile ukututula ukuya mugulu lya bandu bakupa, kangi sikutwala ulusekelo.

LINGA BATIKUNDAGHISYA ISI TUKUBOMBA

14. Ngimba abandu bingi bikubomba isyafiki linga tubabombile ikindu kimo ikinunu?

¹⁴ Linga tubombile ifindu ifinunu ku bakamu na balumbu bitu, utubalilo twingi bikunangisya ukundaghisya. Babaghile ukutuma imeseji pamo ukunangisya ukundaghisya munjila iyingi. (Kolos. 3:15) Linga bikutundaghisya tukuya balusekelo fiyo ukuti tubombile ikindu ikinunu.

15. Ngimba tukulondiwa ukukumbuka isyafiki linga bamo batikundaghisya?

¹⁵ Loli utubalilo tumo abandu batikundaghisya isi tubabombile. Utubalilo tumo, bamo bakabaghila ukutundaghisya pa isi tubabombile pamo ukumanya amaka, akabalilo nindamala isi tubombile ukuti tubatule. Linga isi sibombiwe, ngimba tubaghile ukubomba isyafiki ukuti tungakalalagha? Tukumbukeghe amasyu gha pilemba ili pafumile umutu wa nkhani iyi, pa Imbombo sya Batumiwa 20:35. Tukuya balusekelo fiyo linga tukupa komma linga abandu bikundaghisya isi tukubomba. Tubaghile ukuya balusekelo linga tukupa nalinga ukuti bamo batikundaghisya. Bulebule? Amwinong’onele injila isi.

16. Ngimba findu fiki fibaghile ukututula ukuya balusekelo linga tukubapa abangi?

¹⁶ Mubikeghe indumbula pakunkonga Yehova. Umwene ikubapa abandu ifindu ifinunu linga bikundaghisya pamo hayi. (Mat. 5:​43-48) Yehova afingile ukuti linga tukupa “kisitakusubila ukukabako fimo,” po “ifihombiwa fyitu fikuyagha fingi.” (Luka 6:35) Mutikulondiwa ukukalala linga bamo batikundaghisya isi mubombile. Mukumbukeghe ukuti Yehova ikuya pakubasaya panongwa ya findu ifinunu ifi mubombile kangi panongwa “yakupela mbusangalufu.”—Mbu. 19:17; 2 Kor. 9:7.

17. Nongwa yafiki tukulonda ukubapako abangi? (Luka 14:​12-14)

 ¹⁷ Ikindu kimo iki tukulondiwa ukubomba ukuti tunkonge Yehova ko kukonga isi Yesu ayobile pa Luka 14:​12-14. (Belenga.) Kukaya kubibi ukubakolela abangi kunyumba yitu pamo ukubanangisya ikisa munjila isingi aba babaghile ukutubombela ifindu mwakufwana itolo. Loli bule linga tusyaghenie ukuti kunyuma twabapagha abandu panongwa yakuti twalondagha ukukabapo simo? Linga momuno siyilile tughelegheleghe ukubomba isi Yesu ayobile. Tubaghile ukubakolela aba tumenye ukuti bakabaghila ukutughomokesya fimo. Tukuya pakuya balusekelo panongwa yakuti tukunkonga Yehova. Ukuketa ifindu munjila iyi, kukuya pakututula ukuya balusekelo nalinga ukuti bamo batikunangisya ukundaghisya pa isi tubabombile.

18. Ngimba tutikulondiwa ukubomba isyafiki kangi nongwa yafiki?

¹⁸ Tutikulondiwa ukubinong’onela ifindu ifibibi. (1 Kor. 13:7) Linga bamo batikutundaghisya, tubaghile ukwilalusya ukuti: ‘Ngimba bakaya nakayilo kakundaghisya, pamo balibibwe itolo ukundaghisya?’ Lumo bali nififukwa ifi fyabapangisye ukubomba bo ulu. Bamo babaghile ukundaghisya fiyo mundumbula loli babaghile ukutoliwa ukunangisya muno bikwipilikila. Kangi bamo babaghile ukukosiwa isoni panongwa yakuti bambilile ubutuli, fiyofiyo linga kunyuma babatulagha fiyo abangi. Loli ulughano lwitu ku bakamu na balumbu bitu lukuya pakututula ukulwagha ulusekelo linga tukupa.—Ef. 4:2.

19-20. Nongwa yafiki ubufisalyoyo bwakulondiwa linga tukubapako abangi? (Keta kangi ikithuzi.)

¹⁹ Tuyeghe bafisalyoyo. Pakuyoba isyakupa, Umwalafyale uwamahala Solomoni alembile ukuti: “Ikyuma kyako ukibombeleghe imbombo ku fisu ifihesya, po lelo akabalilo kamo wisakukaba ibana.” (Ndumbi. 11:1) Isi sikutumanyisya ukuti bamo babaghile ukunangisya ukundaghisya linga “akabalilo kakindilepo.” Isi syo syabombiwe ku mulumbu yumo.

²⁰ Ifyinja fingi ifi fikindile, unkasi wa uwakwendela  idela alindembile kalata umulumbu uyu afumile itolo pakosiwa, ankasyagha ukuti akindilile ukuya nsubiliwa kwa Yehova. Bo ifyinja 8 fikindilepo, umulumbu uyu alyamwile mwakulemba kalata. Umwene atile: “Ngulonda ukubabula muno ngwipilikila panongwa yabutuli bwinu ubu bundulile kwa fyinja fingi ifi fikindile.” Akindilile ukuyoba ukuti: “Amasyu ghali gha lughano fiyo, loli ilemba lyalimfikile fiyo pandumbula kangi ndisakwibwa.” a Bo ayobile simo mwandamyo isi alyaghene nasyo, umulumbu uyu atile: “Utubalilo tumo nalondagha ukubuleka ubwanaloli. Loli linga ngumbwike ilemba ili, lyandulagha nukumba amaka ukuti ngindilile ukuya nsubiliwa.” Alyongelile ukuyoba ukuti: “Kwa fyinja 8 ifi, ilemba ili lyo lyandulagha nukungasya fiyo.” Inong’onela muno unkasi wa uwakwendela idela alipilikile bo ambilile kalata uyu bo “amasiku mingi ghakindilepo.” Nanuswe babaghile ukutundaghisya linga akabalilo kakindilepo ukufuma apa twabombile ikindu kimo.

21. Nongwa yafiki mubikilepo indumbula ukunkonga Yehova pankhani yakupa?

²¹ Bo muno tuketile, Yehova atupelile munjila iyakuti tuyeghe balusekelo linga tukupa ukukinda linga tukwambilila. Tukwipilika kanunu linga tukubatula Abakristu abinitu. Kangi tukuya balusekelo linga bikutundaghisya. Loli kali bikundaghisya pamo hayi loli uswe tukuya balusekelo nukuketa ukuti tubombile ikindu kimo ikinunu. Mutikulondiwa ukwibwa ukuti kilikyosa iki mukubapa abangi, “Yehova amenye ukukupa uwe ikyuma kyingi ukukinda iki.” (2 Syambu. 25:9) Yehova ikuya pakubasaya fiyo. Tukindilileghe ukubikapo indumbula nukunkonga Tata witu wakumwanya pankhani yakupa.