1. Ngimba Yesu ikuya pakubomba isyafiki mwalululu?

 TUKWIKALA nkabalilo akapalapala fiyo. Mwalululu, Yesu ikuya pakundonga umundu aliwesa pakisu. Umwene alingenie isya kabalilo aka ubulongi bwisakwisilagha mwakubabula abafundiwa bake ubusololi bwa “kimanyikilo” ikyakwisa kwake “nubumalilo bwa kisu.” (Mat. 24:3) Ubusololi bwa kimanyikilo ubu, bukwaghiwa mu machaputala 24 na 25 kya buku lya Matai, mu chaputala 13 kya buku lya Marko na mu chaputala 21 kya buku lya Luka.

2. Ngimba tukuya pakuyobesania isyafiki munkhani iyi, kangi nongwa yafiki syakutula kumyitu?

² Yesu abombile ififwanikisyo fitatu ifyakusoka ukuti atutule ukwitendekesya. Ikifwanikisyo kya ng’osi nimbene, ikya balindwana abamahala nabakonyofu kangi nikya matalenti. Ikifwanikisyo kilikyosa kikuya pakututula ukupilikisya kanunu muno Yesu isakundongela umundu ukufwana nifyakubomba fyake. Bo tukuyobesania ififwanikisyo ifi, isagha tukete ifundo isi tukumanyilako namuno tubaghile ukusikongela. Ikifwanikisyo ikyakwanda iki tukuya pakuyobesania kyo kya ng’osi nimbene.

ING’OSI NIMBENE

3. Ngimba Yesu isakubalonga ndili abandu?

³ Nkifwanikisyo kya ng’osi nimbene, Yesu ayobile ukuti isakubalonga abandu ukufwana namuno babombile bo bapilike amasyu amanunu kangi linga babatulagha abakamu bake abapakiwa. (Mat. 25:​31-46) Pakabalilo “kabutolwe ubukulumba,” Yesu isakubalonga abandu ukuya ng’osi pamo mbene bo Armagedoni yikali ukufika. (Mat. 24:21) Mwakufwana itolo namuno untimi  ikusipaghulila ing’osi ku mbene, Yesu yope isakubapaghula aba babatulagha mbusubiliwa abafundiwa bake abapakiwa ukufuma ku aba bakabatulagha.

4. Ukufwana na Yesaya 11:​3, 4, nongwa yafiki tubaghile ukusubila ukuti Yesu isakubalonga abandu mbugholofu? (Keta kangi kyapakikope.)

⁴ Ubusololi bwa mu Baibolo bukunangisya ukuti, Yesu pakuya Ndongi uyu asaliwe na Yehova, isakubalonga abandu mbugholofu. (Belenga Yesaya 11:​3, 4.) Umwene ikuketagha isi abandu bikubomba, utuyilo twabo na isi bikuyoba ukongelelapo muno bikubombela ifindu nabapakiwa. (Mat. 12:​36, 37; 25:40) Yesu isakubamanya aba babatulagha abakamu bake abapakiwa nimbombo syabo. a Injila yimo iyi abandu aba bali bo ng’osi bikunangisya ukuti bikubatula abakamu ba Kristu, ko kubatula pambombo yakufumusya. Abandu aba bikutulapo pambombo iyi, bisakulongiwa ukuya “bagholofu” kangi bisakuya nulusako ulwakwikala “nubumi bwa bwila na bwila” pakisu kyapasi. (Mat. 25:46; Ubuset. 7:​16, 17) Ulu lusako lunywamu fiyo. Linga bisakukindilila ukuya basubiliwa pakabalilo ka butolwe ubukulumba napanyuma pake, abene ingamu syabo sisakusungiwa “mwa buku wabumi.”—Ubuset. 20:15.

5. Ngimba tukumanyilako isyafiki kukifwanikisyo kya ng’osi nimbene, kangi bo banani aba bikusayiwa nikifwanikisyo iki?

⁵ Munangisyeghe ubusubiliwa. Ikifwanikisyo kya Yesu ikya ng’osi nimbene, kikuyoba fiyo isya aba bali nulusubilo ulwakwisa kwikala pakisu kyapasi kwa bwila na bwila. Abene bikunangisya ukuti bali nulwitiko mwakubatula abakamu ba Kristu pambombo yakufumusya nukukonga mbusubiliwa ubulongosi ubwakufuma ku ntumwa unsubiliwa nuwa mahala uyu Yesu amwimike. (Mat. 24:45) Loli aba bali nulusubilo ulwakwisakubuka kumwanya, bope bikulondiwa ukupilikila amasyu ghakusoka agha ghali nkifwanikisyo kya ng’osi nimbene. Nongwa yafiki? Panongwa yakuti Yesu ikuketa isi bikubomba, utuyilo twabo na isi bikuyoba. Bope bikulondiwa ukuya basubiliwa. Yonongwa yake Yesu ayobile kangi isya fifwanikisyo fibili ifyakusoka ifi fikubapalamasya abapakiwa. Tukufyagha kangi ififwanikisyo ifi mu chaputala 25 kya buku lya Matai. Lino isagha tuyobesanie ikifwanikisyo kya balindwana abamahala nabakonyofu.

ABALINDWANA ABAMAHALA NABAKONYOFU

6. Ngimba abalindwana 5 banangisye bulebule ukuti bali bamahala? (Matai 25:​6-10)

⁶ Nkifwanikisyo kya balindwana, Yesu ayobile isya balindwana 10 aba babukile ukwakwaghana numweghankikulu. (Mat. 25:​1-4) Bosa bali nulusubilo ulwakuti bikuya pakulongosania numweghankikulu ku bukwati bwake. Yesu ayobile ukuti abalindwana 5 bali “bamahala” kangi abangi 5 bali “bakonyofu.” Abalindwana abamahala balitendekisye kangi bali maso. Abene balingulile umweghankikulu akabalilo kosa aka ayagha pakufika pope linga afikagha pakilo. Yonongwa yake balyeghile amafuta mu nyale syabo ukuti ghabatuleghe ukumulikila pakilo. Kangi bapimbile amafuta aghakongelela linga umweghankikulu abaghile ukwisa mwakukabila. Yonongwa yake balitendekisye ukuti inyale syabo singasimagha. (Belenga Matai 25:​6-10.) Bo umweghankikulu afikile, abalindwana abamahala balinkwingila nawe nkati. Mwakufwana itolo, Abakristu abapakiwa aba bikunangisya ukuti bitendekisye mwakukindilila ukuya maso nukuya basubiliwa ukufika pakabalilo aka Kristu isakwisilagha, bisakwambilila ikyabupe kyabo ikyakwisakuya pampene Numweghankikulu, uyu yo Yesu mu Bunyafyale  bwa kumwanya. b (Ubuset. 7:​1-3) Bule pakuyoba isya balindwana abakonyofu?

7. Ngimba findu fiki fyabombiwe ku balindwana 5 abakonyofu, kangi nongwa yafiki?

⁷ Mwakukindana nabalindwana abamahala, abalindwana 5 abakonyofu bakalitendekisye bo umweghankikulu ikufika. Inyale syabo syasyele panandi ukusima kangi bakatwele amafuta aghakongelela. Bo basyaghenie ukuti umweghankikulu asyele panandi ukufika, balinkubuka ukwakula amafuta. Abene bakali ukufika pakabalilo aka umweghankikulu afikagha. Pakabalilo kala, “aba balitendekisye balinkwingila nawe mbweghi, kukifigho kulinkwighaliwa.” (Mat. 25:10) Ukufuma apo, bo abalindwana abakonyofu bafikile ukuti bingile, umweghankikulu ababulile ukuti: “Ngabamanya umwe.” (Mat. 25:​11, 12) Abalindwana aba, bakalitendekisye ukungulila umweghankikulu kwa kabalilo akatali. Ngimba abapakiwa bikumanyilapo isyafiki?

8-9. Ngimba abapakiwa bikumanyilako isyafiki kukifwanikisyo kya balindwana? (Keta kangi ikithuzi.)

⁸ Munangisyeghe ukuti mwitendekisye kangi muli maso. Yesu akayobile ukuti pisakuya amagulu mabili aghakukindana gha bapakiwa, igulu lya aba balitendekisye nukughulila ubumalilo bwa kisu ikibibi na aba bakalitendekisye. Mmalo mwake, alinganiagha isi syayagha pakubombiwa ku bapakiwa linga bakalitendekisye ukwifimbilisya mbusubiliwa ukufika kubumalilo. Linga bakalitendekisye, bakayagha pakwambilila ikyabupe kyabo. (Yoh. 14:​3, 4) Ifundo iyi yakukasya fiyo. Kali tuli nulusubilo ulwakwisakubuka kumwanya pamo ulwakwisakwikala pakisu kyapasi, twesa tukulondiwa ukupilikila ikifwanikisyo ikyakusoka ikya balindwana. Aliwesa ikulondiwa ukukindilila ukuya maso nukwitendekesya ukwifimbilisya mpaka kubumalilo.—Mat. 24:13.

⁹ Bo amalile ukulingania ikifwanikisyo kya balindwana ukuti anangisye ukulondiwa kwakwitendekesya nukuya maso, Yesu alingenie ikifwanikisyo kya matalenti. Ikifwanikisyo iki kikulingania ukulondiwa kwa kwiyipa.

 AMATALENTI

10. Ngimba ababombi babili banangisye bulebule ukuti bali basubiliwa? (Matai 25:​19-23)

¹⁰ Nkifwanikisyo kya matalenti, Yesu ayobile isya babombi babili aba bali basubiliwa ku mwalafyale wabo na uyu akali nsubiliwa. (Mat. 25:​14-18) Ababombi babili banangisye ubusubiliwa mwakwiyipa ukuti bongelele ikyuma kya mwalafyale wabo. Bo akali ukubuka ku kisu ikingi, umwalafyale wabo abapele amatalenti pamo ukuti indalama nyingi. Ababombi babili abasubiliwa bali bakwiyipa kangi babombile mwamahala indalama. Ngimba ifyakukongapo fyake fyali fyo filiku? Bo umwalafyale wabo aghomwike, abene bakabile indalama isingi ukongelela pa isi abapele. Umwalafyale uyu, abandaghisye fiyo kangi balinkwingila “nukwikyela palikimo nu mwalafyale [wabo].” (Belenga Matai 25:​19-23.) Loli bule pakuyoba isya mbombi uwabutatu? Ngimba umwene abombile isyafiki nindalama isi umwalafyale wake alimpele?

11. Ngimba findu fiki fyabombiwe ku mbombi “umolo”, kangi nongwa yafiki?

¹¹ Umbombi uwabutatu alyambilile italenti limolyene loli ali “molo.” Umwalafyale wake aghulilagha ukuti ikuya pakubombela mwamahala italenti ili alimpele. Mmalo mwake, alifisile mu mfu. Bo umwalafyale wake aghomwike, umbombi uyu akali nasyo indalama isyakongelela, alinkughomola yimoyene. Umwene akanangisye akayilo akanunu. Mmalo mwakusuma uluhobokelo panongwa yakutoliwa ukongelela ikyuma kya mwalafyale wake, umbombi uyu alinkunjoba umwalafyale ukuti “mundu mpalapala.” Umwalafyale akahobwike numbombi uyu. Kangi balinnyakile italenti nukumbopesya nnyumba ya mwalafyale.—Mat. 25:​24, 26-30.

12. Ngimba ababombi babili abasubiliwa bikwimila nani?

¹² Ababombi babili abasubiliwa bikwimila Abakristu abapakiwa abasubiliwa. Umwalafyale, yo Yesu Kristu uyu ikubakolela ukuti “bingile nukwikyela palikimo nu mwalafyale [wabo].” Abene bikwambilila ifihombiwa fyabo kumwanya, uku ko kusyuka kwakwanda. (Mat. 25:​21, 23; Ubuset. 20:5b) Kangi ikifwanikisyo ikibibi ikya mbombi umolo kikubasoka abapakiwa. Bulebule?

13-14. Ngimba abapakiwa bikumanyilako isyafiki kukifwanikisyo kya matalenti? (Keta kangi ikithuzi.)

 ¹³ Munangisyeghe ukwiyipa. Nkifwanikisyo kya matalenti, bo muno siyilile nikifwanikisyo kya balindwana, Yesu akasanusyagha ukuti abapakiwa bisakuya bolo. Mmalo mwake, umwene alinganiagha isi syayagha pakubombiwa linga balekile ukwiyipa. Abene bayagha pakutoliwa ukwambilila “ulubilikilo nubusunguliwa [bwabo],” kangi bakayagha pakwitikisiwa ukwingila Mbunyafyale bwa kumwanya.—2 Pet. 1:10.

¹⁴ Mfifwanikisyo fya Yesu ifyakuyoba isya balindwana namatalenti, fikunangisya ukuti Abakristu abapakiwa bosa bikulondiwa ukwitendekesya, ukuya maso nukwiyipa. Loli ngimba Yesu ayobilepo simo ukuti abasoke abapakiwa? Ena. Isi Yesu ayobile pa Matai 24:​40, 41 sikukolelana nubulongi bwabumalilo ubwa bapakiwa.

NGIMBA YONANI UYU “ISAKWEGHIWAGHA”?

15-16. Ngimba ilemba lya Matai 24:​40, 41 likubatula bulebule abapakiwa ukulondiwa kwakuya maso?

¹⁵ Bo akali ukuyoba isya fifwanikisyo fitatu, Yesu ayobile isya bulongi bwabumalilo bwa bapakiwa ubu bwisakufumbula uyu isakwitikisiwa. Umwene ayobile isya bandu babili aba babombagha mungunda nabakikulu babili aba basyagha palwala. Ifyakubomba fyosa, fikunangisya ukuti babombagha imbombo iyakufwana itolo, loli Yesu ayobile ukuti yumo “isakweghiwagha uyungi isakulekiwagha.” (Belenga Matai 24:​40, 41.) Ukufuma apo, abakasisye abafundiwa bake ukuti: “Amuyeghe maso lelo, papo mukalimanya ilisiku ili Umwalafyale winu ikwisilagha.” (Mat. 24:42) Yesu ayobile ikindu ikyakufwana itolo na iki bo ikulingania isya kifwanikisyo kya balindwana. (Mat. 25:13) Ngimba ifundo isi sikukolelana? Sikuboneka ukuti sikukolelana. Bene aba bapakiwe naloli kangi bikunangisya ubusubiliwa bo aba “bisakweghiwagha,” nukubuka na Yesu mu Bunyafyale bwa kumwanya.—Yoh. 14:3.

¹⁶ Muyeghe maso. Umpakiwa aliwesa uyu atikukindilila ukuya maso mwambepo, atisakuya mugulu lya “basaliwa.” (Mat. 24:31) Kangi ababombi bosa ba Kyala, kisita kweghela ulusubilo ulu bali nalo bikulondiwa ukukindilila ukuya maso nukuya basubiliwa.

17. Nongwa yafiki tutikulondiwa ukupasya linga Yehova ikusala ukubapaka bamo nambepo wake mwikemo?

¹⁷ Panongwa yakuti tummenye kanunu Yehova, tuli nulusubilo losa ukuti umwene isakulonga mbugholofu. Yonongwa yake tutikupasya linga Yehova asalile ukubapaka abasubiliwa bamo nkabalilo kitu aka. c Tukukumbuka isi Yesu ayobile isyakufwana nababombi aba babukile ukwakubomba imbombo akabalilo ka 5 koloko namayolo nkifwanikisyo kya ngunda wamafilu. (Mat. 20:​1-16) Abandu aba babakolile ukuti bakabombe imbombo mungunda wamafilu, balyambilile indalama mwakufwana itolo na aba balyandene. Mwakufwana itolo, kali abapakiwa bisakusaliwa ndili, abene bisakwambilila ikyabupe kyakumwanya linga bisakukindilila ukuya basubiliwa.

TUPILIKILEGHE LINGA TUKUSOKIWA

18-19. Ngimba tuyobesenie isyafiki munkhani iyi?

¹⁸ Ngimba tuyobesenie isyafiki? Aba bali nulusubilo ulwakwisakwikala pakisu kyapasi kwa bwila na bwila, ikifwanikisyo kya ng’osi nimbene kikubatula ukulondiwa kwakukindilila ukuya basubiliwa kwa Yehova lino napakabalilo kabutolwe ubukulumba ubu bukwisa. Pakabalilo ako, Yesu isakubalonga abandu abasubiliwa ukuti bakulondiwa ukwambilila “ubumi bwa bwila na bwila.”—Mat. 25:46.

¹⁹ Tuyobesenie kangi ififwanikisyo fibili ifi fikubasoka abapakiwa. Nkifwanikisyo kya Yesu  ikya balindwana abamahala nabakonyofu, abalindwana 5 banangisye amahala. Abene balitendekisye kangi bali maso, balitendekisye ukungulila umweghankikulu ukufika apa afikile. Loli abalindwana abakonyofu bakalitendekisye. Yonongwa yake umweghankikulu abakanile ukwingila nkati. Nanuswe tukulondiwa ukwitendekesya nukughulila akabalilo aka Yesu isakumasyilagha ifindu ifibibi nkisu iki. Kangi nkifwanikisyo kya Yesu ikya matalenti, tuyobesenie isya babombi babili aba bali bakwiyipa. Banangisye ukwiyipa ku mwalafyale wabo kangi abandaghisye fiyo. Loli umbombi umolo akaniwe. Ngimba tukumanyilapo isyafiki? Tukulondiwa ukwiyipa ukumbombela Yehova mpaka kubumalilo. Pabumalilo, tuyobesenie isya muno abapakiwa babaghile ukukindilila ukuya maso ukuti Yesu ‘asabeghe’ ukuti bakambilile ikyabupe kyabo kumwanya. Abene bikughulila akabalilo aka Yesu ‘isakubabunganiagha pampene’ nukubuka nabo kumwanya. Panyuma pabwite bwa Armagedoni, abene bisakuya bakasi ba Yesu pabweghi bwa Kang’osi.—2 Tes. 2:1; Ubuset. 19:9.

20. Ngimba Yehova isakubabombela isyafiki abandu aba bikupilikila linga ikubasoka?

²⁰ Nalinga ukuti akabalilo kakulongiwa kaseghelile, loli tutikulondiwa ukutila. Linga tukukindilila ukuya basubiliwa, Tata witu walughano isakutupa “amaka amakindilisi” ukuti ‘twisetubwaghe ubupoki . . . nukwima nkyeni mwa Nnyamundu.’ (2 Kor. 4:7; Luka 21:36) Kali tuli nulusubilo lwakwisakubuka kumwanya pamo lwakwisakwikala pakisu kyapasi, tukuya pakunhobosya Tata witu linga tukupilikila amasyu aghakusoka agha ghikwaghiwa mfifwanikisyo fya Yesu. Kangi panongwa yakuti Yehova wakisa, ingamu syitu sisakwaghiwa ukuti “sisimbiwe mwa buku” wa bumi.—Dan. 12:1; Ubuset. 3:5.