Loli abandu bingi bikukayika linga bisakubwagha ubumi ubununu nkyeni. Abene bikuketa ifindu ifibibi ifi fikubombiwa—bo imbungo ya COVID-19 iyi yikubapangisya abandu ukuti batamiweghe, yipangisye ubulondo kangi yikughogha abandu bingi. Isi sikubapangisya ukwipilika ukuti bakabaghila ukwisa kuya nubumi ubununu nkyeni.

Panongwa ya findu ifibibi ifi fikubombiwa, abandu bikughelaghela ukufufuza ikindu kimo iki kibaghile ukubalongosyela ku bumi ubununu ubwa nkyeni. Abandu bamo bikusubila ulusako lwa findu ifi bali nafyo. Bingi bikusubila ifimanyilo ni kyuma abene bikwinong’ona ukuti ifindu ifi fibaghile ukubatula ukufyagha ifi bikulonda. Bamo bikwinong’ona ukuti bikulondiwa ukuya mundu nnunu ukuti basabwaghe ubumi ubununu.

Ngimba ifindu bo ifi fibaghile ukubapangisya ukuti basabwaghe ubumi ubununu nkyeni? Ukuti mumanye, mukulondiwa ukwinong’onela amalalusyo agha:

• Ngimba mukubomba isyafiki ukuti musabwaghe ubumi ubununu ubwa nkyeni?

• Ngimba ifimanyilo ni ndalama fibaghile ukubapa ubumi ubununu ubwa nkyeni?

• Ngimba ukuya mundu nnunu kubaghile ukubapangisya ukuti musabwaghe ubumi ubununu ubwa nkyeni?

• Ngimba findu fiki fibaghile ukubatula ukuti musabwaghe ubumi ubununu ubwa nkyeni?

Ingasya ya Ndindilili iyi yibaghile ukubatula ukuti mwamuliwe amalalusyo agha.