Ngimba Mukubomba Isyafiki Ukuti Musabwaghe Ubumi Ubununu Ubwa Nkyeni?
Abandu bingi bikusubila ukuti ifindu ifi bali nafyo fibaghile ukubatula ukuti basabwaghe ubumi ubununu ubwa nkyeni. Ukufwana na isi bikusubila, abene bikwinong’ona ukuti ifindu ifinunu ifi bikughulila nkyeni fikuya pakubombiwa pa bumi bwabo.
ISI ABANDU BINGI BIKUSUBILA
ABAMANYA NDONDWA: Abandu bamo bikusubila ukuti ubumi bwabo ubwa nkyeni bufwene itolo na muno indondwa sikubonekela pakabalilo aka bikupapiwa. Abene bikubelenga inkhani isyakufwana ni ndondwa ukuti bamanye isya bumi bwabo ubwa nkyeni nukuti sibatule ukusala ifyakubomba.
ABA BIKUSUBILA FENG SHUI: Abandu bamo bikusubila ukuti linga bayengile inyumba syabo munjila yakuswighisya sikuya pakubapangisya ukuya nu bumi ubununu fiyo. Lo Wing * uyu ikwikala ku Hong Kong atile, “Umundu yumo uyu ikusubila feng shui alimbulile ukuti ukubungania amabwe gha ntengo wapamwanya nukusunga fikuya pakundula ukuti niye ni ndalama nyingi.”
UKWIPUTA KU BAFWE: Abandu bamo bikukindilila ukwiputa ku bafwe kangi bingi bikusubila ukuti abafwe bikubafighilila nu kubasaya. Van uyu ikwikala ku Vietnam, atile, “Nasubilagha ukuti ukubaghindika abakamu bangu aba bafwile, kwayagha pakundula une na banangu ukuya nu bumi ubwa lusekelo lino na nkyeni.”
UKUPAPIWA KANGI: Abandu bingi bikusubila ukuti linga umundu afwile, umwene ikupapiwa kangi. Isi sikubombiwa utubalilo twingi. Abene bikusubila ukuti ifindu ifinunu pamo ifibibi ifi bikwaghana nafyo lino fikubombiwa panongwa ya isi babombile kunyuma.
Nalinga ukuti abandu bingi bikuyoba ukuti batikusubila ifi loli abene bikukindilila ukubomba ifindu bo ukusubila indondwa ukukoma injuga ni findu ifingi. Abene bikuketa ukuti ukubomba isi kubaghile ukubatula ukumanya ubumi bwabo ubwa nkyeni.
NGIMBA ISI BIKUSUBILA SIKUBATULA NALOLI?
Ngimba bosa aba bikusubila inyiho isi bikuya nu bumi ubununu lino kangi bisakubwagha ubumi ubununu nkyeni?
Inong’onela isi alyaghene nasyo Hào, uyu ikwikala ku Vietnam. Umwene abombelagha abamanya ndondwa, asubilagha feng shui kangi iputagha ku bafwe ukuti bamfighilileghe. Ngimba umwene alwaghile ulusekelo? Hào atile, “Nalyonangile indalama nyingi, nali ningongole, mu mbumba yangu tukakolelanagha kangi natamiwagha fiyo na minong’ono.”
Qiuming uyu ikwikala ku Taiwan, yope asubilagha abamanya ndondwa, ukupapiwa kangi, ukusubila feng shui nu kwiputa ku bafwe. Bo afufuzile kanunu, umwene atile: “Naketile ukuti ifimanyisyo ni nyiho isi sitikukolelana kangi fikusofania fiyo. Nasyaghenie ukuti ukusubila abamanya ndondwa kukaya kwanaloli. Pa nkhani iya kupapiwa kangi, linga utikukumbukila ifya kunyuma, ngimba ubaghile ukuchenja bulebule nukubomba kanunu ifindu?”
QIUMING uwa ku TAIWAN atile, “Naketile ukuti ifimanyisyo ni nyiho isi sitikukolelana kangi fikusofania fiyo.”
Hào, Qiuming, na bandu bingi basyaghenie ukuti, ubumi bwitu ubwa nkyeni butikukolelana nu kusubila indondwa, ukwiputa ku bafwe pamo ukupapiwa kangi. Ngimba isi sikusanusya ukuti tukabaghila ukwisa kuya nubumi ubununu ubwa nkyeni?
Abandu bingi bikwinong’ona ukuti, ukuti basabwaghe ubumi ubununu nkyeni bikulondiwa ukumanyila ifimanyilo ifya pamwanya nukuya ni kyuma. Ngimba ifyakukongapo fyake fyo filiku ku bandu bamo aba basalile ukubomba isi?
^ ipal.5 Mu nkhani iyi ni yakukongapo, ingamu simo sichenjile.
^ ipal.16 Ifundo iyi yikwaghiwa mu Baibolo pa Bagalatia 6:7.
