Isi Abandu Bikuyoba Isyakufwana Nukwiputa Kwa Kyala
MARIA atile, “Linga ngwiputa, nguketa ukuti Kyala ali pabupipi nanine, angolile ikiboko kangi ikundongosya linga njongile.”
RAÚL atile, “Unkasi wangu afwile nimbungo ya kansa ifyinja 13 ifi fikindilepo. Niputagha kwa Kyala isiku lililyosa kangi naketagha ukuti ambilikisyagha muno nipilikilagha. Nali nulutengano ulwa mundumbula.”
ARNE atile, “Ulwiputo kyo kyabupe ikinunu ikyakufuma kwa Kyala.”
María, Raúl, Arne nabangi, bikuketa ukuti ulwiputo lwakulondiwa fiyo. Abene bikuketa ukuti ukwendela ndwiputo, babaghile ukwiputa kwa Kyala, ukunndaghisya nukusuma ubutuli. Kangi bali nulusubilo losa ukuti isi Ibaibolo likuyoba isyakufwana nukwiputa kwa Kyala sya bwanaloli. Ibaibolo likuti: “Ulu lo lusubilo ulu tuli nalo mmyake, ulwakuti, aka linga tukusuma ukufwana nubwighane bwake, ikutupilika.”—1 Yohani 5:14.
Loli abandu bingi batikuyisubila ifundo ya mu Baibolo iyi. Steve ikulingania muno ikwipilikila pa nkhani iyakwiputa, ikuti: “Bo ndini fyinja 17, abamanyani bangu batatu bafwile pangozi, yumo afwile pangozi ya galimoto abangi babili bafwilile mwasumbi.” Ngimba Steve abombile isyafiki? Umwene ikuti, “Naliputile kwa Yehova ukuti mmanye inongwa iyi ifindu ifi fyabombiwe loli ngalyamuliwe. Nalilalusisye ukuti, ‘Nongwa yafiki ngulondiwa ukwiputa?’” Abandu bingi bikuketa ukuti inyiputo syabo sitikwamuliwa, yonongwa yake bikuketa ukuti kikayapo ikifukwa ikyakukindilila ukwiputa.
Abandu bikuketa ukuti inyiputo sitikubatula pa fifukwa ifingi. Bamo bikuyoba ukuti Kyala asimenye kale isi tukulonda kangi nindamyo isi tukwaghana nasyo, yonongwa yake tutikulondiwa ukumbula ifindu bo ifi.
Bamo bikusubila ukuti Kyala atikulonda ukupilika inyiputo syabo panongwa ya mbibi isi babombile kunyuma. Jenny ikuti, “Ngwiketa ukuti ngaya mundu wakulondiwa, iyi yo ndamyo yangu inywamu. Nabombile ifindu ifi fikumbangisya ukuti niyipeghe inongwa, yonongwa yake nguketa ukuti Kyala akabaghila ukumbilika.”
Ngimba mukuluketa bulebule ulwiputo? Linga nanumwe mwipilikemo bo ulu pamo mukulukayikila ulwiputo, mubaghile ukusubisiwa nifundo iyakuti Ibaibolo likwamula amalalusyo bo agha munjila iyakuhobosya. Tubaghile ukusubila isi Ibaibolo likuyoba isyakufwana nukwiputa; * kangi likututula ukwamula amalalusyo bo agha:
-
Ngimba Kyala ikupilika naloli inyiputo syitu?
-
Nongwa yafiki Kyala atikwamula inyiputo simo?
-
Ngimba mukulondiwa ukwiputa bulebule ukuti Kyala apilike inyiputo syinu?
-
Ngimba inyiputo sibaghile ukubatula bulebule?
^ ipal.9 Mu Baibolo mukwaghiwa inyiputo isya babombi bingi ba Kyala ukongelelapo isi Yesu Kristu aliputile. Mu Malemba gha Chihiburi, agha bingi bikuti Ulwitikano Ulukulu, mukwaghiwa inyiputo isyakukinda 150.
