Ngimba Kyala Ikupilika Inyiputo Syitu?
Ngimba mwilalusisyemo lumo linga Kyala ikupilika inyiputo syinu? Linga mo siyilile mukaya mwibene. Abandu bingi bikwiputa kwa Kyala ukuti abatule pandamyo simo loli indamyo sikukindilila. Ngimba isi sikusanusya ukuti Kyala atikupilika inyiputo syitu? Hayi. Ibaibolo likutusimikisyila ukuti Kyala ikutupilikisya linga tukwiputa kumyake munjila inunu. Isagha tukete isi Ibaibolo likuyoba.
KYALA IKUPILIKISYA.
“Uwe kwamula inyiputo, abandu bosa bikwisagha kumyako.”—Salimo 65:1, 2.
Abandu bamo bikwiputa panongwa yakuti bikuti ulwiputo lukubapangisya ukuti bipilikeghe kanunu, nalinga batikusubila ukuti akayapo uyu ikubapilika. Loli ulwiputo lutikututula itolo ukuti twipilikeghe kanunu pandamyo isi tukwaghana nasyo. Ibaibolo likutusimikisyila ukuti, ‘Yehova * ali pipi itolo kuli bosa aba bikusuma, na bosa aba bikwiputa kumyake mbwanaloli . . . Ikupilika ni nguto yabo nukubapoka.’—Salimo 145:18, 19.
Tuli nulusubilo losa ukuti Yehova Kyala ikupilika inyiputo sya bandu aba bikumwiputa. Umwene ikuti: “Polelo mwisakukolelagha nukwiputa kumyangu, bunobuno nisakubapilika umwe.”—Yeremiya 29:12.
KYALA IKULONDA UKUTI TWIPUTEGHE KUMYAKE.
“Ndwiputo mo mumilisyeghe itolo.”—Baroma 12:12.
Ibaibolo likutukasya ukuti, “tukindilileghe ukwiputa” “nandupyelesyo losa.” Ukuyoba ubwanaloli, Yehova Kyala ikulonda ukuti twiputeghe kumyake.—Matai 26:41; Baefesi 6:18.
Nongwa yafiki Kyala ikulonda ukuti twiputeghe kumyake? Mwakifwanikisyo, tata ikuhoboka fiyo linga umwanake ikusuma ubutuli kumyake. Bwanaloli ukuti tata abaghile ukumanya isi umwanake ikulonda loli linga apilike amasyu gha mwanake, ikumanya ukuti umwanake ikunsubila kangi ali nawe pabumanyani. Mwakufwana itolo, linga tukwiputa kwa Yehova, tukunangisya ukuti tukunsubila kangi tukulonda ukuya nawe pabumanyani.—Isya Mbupingamu 15:8; Yakobu 4:8.
KYALA IKUTUPASIKISYA NALOLI.
“Syosa isi mukwiyaya nasyo syo muntaghileghe yuyo, namanga umwene ikubiyayila umwe.”—1 Peteri 5:7.
Kyala ikulonda ukuti twiputeghe kumyake panongwa yakuti atughanile kangi ikutupasikisya. Umwene asimenye indamyo syitu kangi ikulonda ukututula.
Umwalafyale Davidi iputagha akabalilo kosa kwa Yehova ukuti antule kangi ambulagha aminong’ono ghake namuno ipilikilagha. (Salimo 23:1-6) Ngimba Kyala anketagha bulebule Davidi? Kyala alinganile Davidi kangi inyiputo nyingi isi iputagha Kyala apilikagha. (Imbombo Sya Batumiwa 13:22) Mwakufwana itolo, Kyala ikupilika inyiputo syitu panongwa yakuti ikutupasikisya.
“NUNGANILE YEHOVA PAPO APILIKE ILISYU LYANGU”
Agha gho masyu gha mundu uyu alembile ibuku lya masalimo ilya mu Baibolo. Umwene ali nulusubilo losa ukuti Kyala apilikagha inyiputo syake kangi isi syalinkasisye fiyo. Umwene aketagha ukuti ali pabupipi fiyo na Kyala kangi isi syantulagha ukuti angiyayagha nukwifimbilisya ikitima.—Salimo 116:1-9.
Linga tukusubila ukuti Kyala ikupilika inyiputo syitu, tukuya pakukindilila ukwiputa kumyake. Inong’onela isi Pedro uyu ikwikala kululu nkisu kya Spain alyaghene nasyo. Umwanake undumyana uwa fyinja 19 afwile pangozi ya galimoto. Pedro alimbulile Kyala ndwiputo muno ipilikilagha kangi aliputile utubalilo twingi ukuti ansubisye nukuntula. Ngimba findu fiki fyabombiwe? Pedro ikuti, “Yehova alyamwile inyiputo syangu ukwendela ndusubisyo nubutuli ubu twalyambilile ukufuma ku Bakristu abinitu.
Utubalilo twingi Kyala ikwamula inyiputo syitu ukwendela mubamanyani bitu aba bikutukasya nukutusubisya
Nalinga ukuti inyiputo sikapangisye ukuti umwanake asyuke, loli syalintulile fiyo Pedro nimbumba yake. Unkasi wake, María Carmen ikuti: “Inyiputo syalindulile ukuti nifimbilisye. Nsyaghenie ukuti Kyala ikumbilikisya panongwa yakuti linga ngwiputa nguya nulutengano kangi ngwipilika kanunu.”
Isi Ibaibolo likuyoba na isi syababonekile abandu, sikunangisya ukuti Kyala ikupilika inyiputo. Kangi sikunangisya ukuti Kyala atikwamula inyiputo simo. Nongwa yafiki Kyala ikwamula inyiputo simo loli simo atikwamula?
^ ipal.5 Yehova yo ngamu ya Kyala.—Salimo 83:18 NWT.
Lumo Mubaghile Ukulonda Ukumanya Isya Nkhani iyi
ESSENTIAL BIBLE TEACHINGS
Ngimba Kyala Ikupilika Inyiputo Syosa?
Bule linga umundu yumo ikusuma ifindu panongwa ya bupafu? Bule linga unnyambala ikumbombela ifindu ifibibi unkasi wake kangi ikunsuma Kyala ukuti ansaye?
ISI IBAIBOLO LIKUMANYISYA
Ukumanyila Ibaibolo
Amwande ukumanyila Ibaibolo munjila iyakuyobesania kisita kulipila.
