“Bo mukwiputa mungayobagha mwalwemwalwe itolo.”​—Matai 6:7.

Yehova atikulonda ukuti tuyobeghe mwakwandisania inyiputo isi tusungile pandumbula pamo ukubelenga itolo mu buku. M’malo mwake ikulonda ukuti tuyobeghe ukufuma pasi pandumbula. Inong’onela muno mubaghile ukwipilikila linga ummanyani winu ikwandisania amasyu ghamoghene isiku lililyosa. Abamanyani abanunu bikuya babuke kangi bikuyoba ukufuma pasi pandumbula. Linga tukubombela amasyu ghitu na ghitu ukwiputa kwa Tata witu wakumwanya, tukunangisya ukuti tukunketa ukuya mmanyani witu.

“Mukusuma loli mutikwambilila papo mukusuma kabibi.”​—Yakobu 4:3.

Kyala akabaghila ukupilika inyiputo syitu linga tukusuma ifindu ifi tusimenye ukuti atikulonda ukuti tuyeghe nafyo. Mwakifwanikisyo, linga umundu uyu ikukoma injuga ikusuma ukuti Kyala antule ukuti aye nulusako, ngimba Yehova ikuya pakwamula ulwiputo lwake? Umwene ikutubula ukuti tungayagha banyonywatosa nukusubila ifindu ifi fikaya fya momumo, bo ukuya nulusako. (Yesaya 65:11; Luka 12:15) Yehova akabaghila ukwamula inyiputo bo isi. Ukuti Kyala amule inyiputo syitu, isi tukusuma sikolelaneghe nifundo sya mu Baibolo.

 ‘Umundu uyu atikukonga indaghilo, yo ulwiputo lwake lukwipela kinyanyasi kwa Yehova.’​—Isya Mbupingamu 28:9.

Nkabalilo ka kunyuma, Kyala akamulagha inyiputo sya bandu aba bakakongagha indaghilo syake isyabugholofu. (Yesaya 1:15, 16) Kyala akachenja. (Malaki 3:6) Linga tukulonda ukuti Kyala amule inyiputo syitu, tukulondiwa ukupilikila indaghilo syake. Loli bule linga kunyuma twabombilepo ifibibi? Ngimba isi sikusanusya ukuti Yehova akabaghila ukutupilika? Hayi. Mwalughano Kyala ikuya pakutuhobokela linga tunangisye ukuti tulapile imbibi isi twabombile nukughelaghela ukubomba kilikyosa ukuti tunhobosyeghe.​—Imbombo Sya Batumiwa 3:19.