Ngimba Mukulondiwa Ukwiputa Bulebule Ukuti Kyala Apilike Inyiputo Syinu?
Yehova ‘Ikwamula inyiputo.’ (Salimo 65:1) Tubaghile ukuyoba nawe kulikosa kuno tuliko, akabalilo kalikosa, mwakukwesya amasyu pamo mundumbula. Yehova ikulonda ukuti tunkoleleghe ukuti “Tata,” kangi yo Tata unnunu uyu tubaghile ukuya nawe. (Matai 6:9) Mwalughano, Yehova ikutumanyisya muno tubaghile ukwiputila ukuti atupilike.
MWIPUTEGHE KWA YEHOVA KYALA UKWENDELA MUNGAMU YA YESU
“Ifi linga mukusuma kwa Tata fyo isakubapelagha mungamu yangu.”—Yohani 16:23.
Amasyu gha Yesu ghikunangisya ukuti Yehova ikulonda ukuti twiputeghe kumyake ukwendela mungamu ya Yesu Kristu komma kufifwani, kubikemo, kubandumi pamo kubafwe. Linga tukwiputa kwa Kyala ukwendela mungamu ya Yesu, tukunangisya ukuti tubumenye ubudindo bwa Yesu panongwa ya isi atubombile. Yesu atile, “Nayumo atikwisako kwa Tata, pene papo linga ikwendela mmyangu.”—Yohani 14:6.
MWIPUTEGHE UKUFUMA PASI PANDUMBULA
“Isi sili mundumbula syinu syo muntaghile yuyo.”—Salimo 62:8.
Linga tukwiputa kwa Yehova, tukulondiwa ukuyoba bo muno tubaghile ukuyobela kwa tata walughano. M’malo mwakubelenga mu buku pamo mwakwandisania amasyu agha tughasungile, tukulondiwa ukwiputa mwalughindiko kangi ukufuma pasi pandumbula.
MWIPUTEGHE MWAKUKOLELANA NUBWIGHANE BWA KYALA
“Aka linga tukusuma ukufwana nubwighane bwake, ikutupilika.”—1 Yohani 5:14.
Mu Baibolo, Yehova Kyala ikutubula isi ikuya pakutubombela kangi na isi ikulonda ukuti tumbombeleghe. Ukuti Kyala itikisye inyiputo syitu, tukulondiwa ukwiputa “ukufwana nubwighane bwake.” Ukuti tubombe isi, tukulondiwa ukumanyila Ibaibolo ukuti tummanye kanunu. Linga tubombile isi, ikuya pakuhoboka ninyiputo syitu.
NGIMBA TUKULONDIWA UKUSUMA ISYAFIKI NDWIPUTO?
Tumbuleghe Isi Tukulonda. Tubaghile ukunsuma Kyala isi tukulonda pabumi bwitu bo ifyakulya, imyenda namalo aghakwikalapo. Tubaghile ukusuma kangi amahala ukuti tusaleghe kanunu ifyakubomba kangi namaka ukuti twifimbilisye indamyo isi tukwaghana nasyo. Tubaghile ukunsuma Kyala ukuti atupe ulwitiko, ukuti atuhobokele nukuti atutule.—Luka 11:3, 4, 13; Yakobu 1:5, 17.
Tubiputileghe Abangi. Abapapi aba babaghanile abanabo, bikuhoboka fiyo linga abanabo bikunangisania ulughano. Yehova yope ikulonda ukuti abanake aba pa kisu kyapasi banangisanieghe ulughano. Kwakulondiwa fiyo ukuti tumwiputileghe umwinitu uwambweghi, abanitu, imbumba yitu nabamanyani bitu. Umfundiwa Yakobu alembile ukuti, “Mwiputilanileghe.”—Yakobu 5:16.
Tundaghisyeghe. Pakuyoba isya Mpeli witu, Ibaibolo likuti, “Alinkusita nukuleka ukwibonesya mumbombo inunu isi ikubomba, ikubapa ifula ukufuma kumwanya, nutubalilo twa mboto, ikubisukisya ifyakulya nulusekelo mundumbula syinu.” (Imbombo Sya Batumiwa 14:17) Linga tukwinong’onela syosa isi Kyala ikutubombela, sikutukasya ukuti tundaghisyeghe ndwiputo. Bwanaloli ukuti, tukulondiwa kangi ukundaghisya Kyala mwakumpilikila.—Bakolosi 3:15.
MUYEGHE BOLOLO KANGI MUKINDILILEGHE UKWIPUTA
Utubalilo tumo tubaghile ukuwa amaka panongwa yakuti tutikwamuliwa mwanakalinga inyiputo syitu isyakufuma pasi pandumbula. Ngimba isi sikunangisya ukuti Kyala atikuhoboka nanuswe? Hayi. Inong’onela isi bamo balyaghene nasyo, isi sikunangisya ukuti tukulondiwa ukukindilila ukwiputa.
Steve, uyu tunjobile mu nkhani iyabwandilo ikuti, “Linga ngakindilile ukwiputa ngayagha pakuya nulusubilo kangi nulusekelo.” Ngimba findu fiki fyalimpangisye ukuti achenje? Umwene alyandile ukumanyila Ibaibolo kangi amanyile ukulondiwa kwakwiputa kisita kuleka. Steve atile, “Naliputile kwa Kyala nukundaghisya panongwa yabutuli bwake ubu nalyambilile ukufuma ku bamanyani bangu. Lino ndinulusekelo fiyo ukukinda kunyuma.”
Bule pakuyoba isya Jenny uyu aketagha ukuti Kyala akabaghila ukumpilika? Umwene ikuti, “Pakabalilo aka niketagha ukuti ngaya wakulondiwa, nalinsumile Kyala ukuti andule ukuti mmanye inongwa iyi niketelagha bo ulu.” Ngimba ukubomba isi kwalintulile bulebule? Umwene ikuti, “Ukwiputa kwa Kyala kwalindulile ukuti niketeghe ukuya wakulondiwa fiyo bo muno umwene angetelagha. Kangi kwalindulile ukuti ningawagha amaka loli ngindilile ukwiputa kumyake. Ngimba syafiki syabombiwe? Umwene ikuti, “Ulwiputo lwalindulile ukumanya ukuti Yehova aliko, walughano, yo Kyala wa kisa, yo Tata kangi mmanyani uyu akabalilo kosa ikungasya nukundula linga ngukindilila ukubomba isi ikulonda.”
Isabel “ikuketa ukuti Kyala ikwamula inyiputo syake” linga ikunketa umwanake Gerard uyu walusekelo nalinga ukuti alemele
Inong’onela kangi isi Isabel alyaghene nasyo. Bo ali nulwanda, abadokotala balimbulile ukuti umwanake ikwisa kupapiwa ndemale. Umwene apalamasiwe fiyo. Bamo bankasyagha ukuti asosye ulwanda. Umwene atile, “Naketagha ukuti nguya pakufwa panongwa ya kupilika ifyakubaba mundumbula yangu.” Ngimba abombile isyafiki? Umwene atile, “Utubalilo twingi niputagha kwa Kyala ukuti andule.” Bo akabalilo kakindilepo, apapile umwana undumyana uyu ingamu yake yo Gerard kangi alemele. Ngimba Isabel aketile ukuti Kyala alyamwile inyiputo syake? Ena. Munjila yiliku? Isabel ikuti, “Linga ngunketa umwanangu uyu lino ali nifyinja 14, walusekelo nalinga ukuti alemele, nguketa ukuti inyiputo syangu syamuliwe, ulu lo lusayo ulunywamu fiyo ulu Yehova ambele.”
Amasyu aghakufuma pasi pandumbula bo agha, ghikutukumbusya isi uwamasalimo ayobile ukuti: ‘We Yehova upilikeghe inguto ya batengamoyo, upilikeghe ukukuta kwabo; ubasangalusyeghe mundumbula syabo.’ (Salimo 10:17) Ifi fyo fifukwa finunu ifi tukulondiwa ukukindilila ukwiputa kwa Kyala.
Mu Baibolo tukusyagha inyiputo nyingi isya Yesu. Lumo mwa lwiputo lwake ulu lumanyiwe fiyo lo ulu abamanyisye abafundiwa bake. Ngimba tubaghile ukumanyilako isyafiki ku lwiputo ulu?
