MUNO TUBAGHILE UKUMALANA NAKAYILO AKAKUBENGANA
4 | Nubutuli bwa Kyala Tubaghile Ukumalana Nakayilo Akakubengana
Ibaibolo Likuti:
“Ulwene loli uluseke lwa mbepo lo lu ghano, ulusekelo, ulutengano, ubufisalyoyo, ubololo, ubununu, ubusubiliwa ubutengamoyo nu kwikola.”—BAGALATIA 5:22, 23.
Ngimba Amasyu Agha Ghikusanusya Isyafiki?
Tubaghile ukumalana nakayilo akakubengana nubutuli bwa Kyala. Mbepo wake mwikemo ghubaghile ukututula ukuya nutuyilo utununu pa bumi bwitu. M’malo mwakumalana nako pa twibene akayilo akakubengana, tukulondiwa ukusubila ubutuli bwa Kyala. Linga tukubomba isi, tukuya pakwipilika mwakufwana itolo na muno untumiwa Pauli alipilikile. Umwene alembile ukuti: “Mbaghile ukusibomba syosa muli yuyo ikumba amaka.” (Bafilipi 4:13) Kangi tukuya pakufwanisya ukuyoba ukuti: “Untuli wangu yo yu Yehova.”—Salimo 121:2.
Isi Mubaghile Ukubomba:
“Yehova andulile fiyo ukuti ndeke ukubomba ifyankhaza nu kuya mundu walutengano.”—WALDO
Mwiputeghe kwa Yehova ukufuma pasi pandumbula nu kunsuma ukuti abatule na mbepo wake mwikemo. (Luka 11:13) Munsumeghe ukuti abatule ukunangisya utuyilo utununu pa bumi bwinu. Mumanyileghe isi Ibaibolo likuyoba isyakufwana nutuyilo utu tubaghile ukubatula ukuti mungababengagha abangi, mwakuya nulughano, ulutengano, ubololo nu kwikola. Mughelegheleghe ukunangisya utuyilo utu pa bumi bwinu. Kangi mwangaleghe na bandu aba bikughelaghela ukunangisya utuyilo utu. Abandu aba babaghile ukubatula ukuti “munangisyeghe ulughano nukubomba imbombo inunu.”—Bahiburi 10:24.
Lumo Mubaghile Ukulonda Ukumanya Isya Nkhani iyi
AMALALUSYO AGHA IBAIBOLO LIKWAMULA
Ngimba Ibaibolo Likuyoba Isyafiki pa Nkhani ya Bukali?
Ngimba ubukalale bwakulondiwa? Ngimba mubaghile ukubomba isyafiki linga mwandile ukukalala?
