MUNO TUBAGHILE UKUMALANA NAKAYILO AKAKUBENGANA
3 | Tungayagha Naminong’ono Aghakubengana
Ibaibolo Likuti:
“Mungifwanikisyagha ni kisu kikiki loli mwanduliweghe itolo nubupya bwa nyinong’ono syinu ukuti musimanyeghe isi ighanile Kyala inunu ingyeliwa nimbelelesye.”—BAROMA 12:2.
Ngimba Amasyu Agha Ghikusanusya Isyafiki?
Isi tukwinong’ona sikumpalamasya Kyala. (Yeremiya 17:10) Tukulondiwa ukubomba nyingi ukukinda itolo ukuleka ukubomba nu kuyoba amasyu amabibi. Isi tukwinong’ona nu kubomba sibaghile ukupangisya ukuti twande ukubengana. Yonongwa yake tukulondiwa ukuleka ukwinong’onela ifindu ifi fibaghile ukutupangisya ukuti tubabengeghe abangi. Tubaghile ukufwanisya ukubomba isi linga “tutikwifwanikisya ni kisu” nukuleka ukubabenga abangi.
Isi Mubaghile Ukubomba:
Tukulondiwa ukuya maso na isi tukwinong’ona nu kubomba ku bangi fiyofiyo aba tukindene nabo uluko nifikolo. Amwilalusye ukuti: ‘Ngimba ngubaketa bulebule? Ngimba isi ngwinong’ona sikunangisya ukuti mbamenye kanunu? Pamo sikunangisya ukuti ngubasala?’ Tukulondiwa ukwepuka ukuketelela nu kubelenga ifindu fya pa intaneti ifi fikukasya ukubengana ninkhaza.
Amasyu gha Kyala ghabaghile ukututula ukumalana nakayilo akakubabenga abangi mundumbula yitu
Utubalilo twingi kukaya kupepe ukukanisya aminong’ono ghitu. Loli Amasyu gha Kyala ghabaghile ukututula ukuya ‘naminong’ono amanunu mundumbula yitu.’ (Bahiburi 4:12) Yonongwa yake tukulondiwa ukukindilila ukubelenga Ibaibolo. Tuketeghe linga ifundo syake sikukolelana naminong’ono ghitu nu kughelaghela ukubomba ifindu munjila iyi yikunhobosya Kyala. Amasyu gha Kyala ghabaghile ukututula ukumalana na kayilo akakubabenga abangi “mwakughabulutula” aminong’ono mundumbula yitu.—2 Bakorinti 10:4, 5.
