Ukubengana Kwisakumalika
Nalinga ukuti tulekile ukubabenga abangi, loli tukabaghila ukufwanisya ukubakanisya abandu aba batusyungutile ukuti bangababengagha abangi. Abandu bingi bikubabenga abangi aba bakaya ninongwa nayimo. Ngimba yonani uyu abaghile ukumasya ukubengana?
Yehova Kyala mwene yo uyu abaghile ukumasya ukubengana. Syo isi umwene afingile mu Baibolo ukuti ikwisa pakubomba.—Isya Mbupingamu 20:22.
KYALA IKWISA PAKUMASYA IFINDU IFI FIKUPANGISYA UKUTI ABANDU BABENGANEGHE
-
1. SETANO UMOHESI. Setano yo ikupangisya ukuti abandu babenganeghe amasiku agha. Kyala isakumonanga Setano na bosa aba bikubabenga abangi.—Salimo 37:38; Baroma 16:20.
-
2. IKISU IKIBIBI IKYA SETANO. Kyala ikwisa pakumasya ifindu fyosa ifi fikupangisya ukuti abandu babenganeghe pa kisu, ifi fikongelelapo abandyali na balongosi ba matchalichi aba bikukasya ukuti abandu babenganeghe. Kyala isakumasya kangi amabizinesi aghabusyobi, katangale nu kubasyoba abandu.—2 Peteri 3:13.
-
3. UBUSITABUGHOLOFU. Ibaibolo likuyoba ukuti abandu bosa basitabugholofu, abene bikubomba ifindu ifibibi. (Baroma 5:12) Akayilo kamo akabibi aka bikunangisya ko kubabenga abangi. Kyala ikwisa pakubatula abandu ukuti bamalane nakayilo aka.—Yesaya 54:13.
IBAIBOLO LIFINGILE UKUTI ABANDU BATISAKUBENGANAGHA NKISU IKIPYA
-
1. IFINDU IFISITABUGHOLOFU FITISAKUYAKO KANGI. Ubunyafyale bwa Kyala bwisa kulaghilagha pa kisu. Ubwene bwisakulaghilagha ukufuma kumwanya kangi abandu bisakuya bagholofu. (Danieli 2:44) Kutisakuyako ukusalana nukuleka ukukolelana. Kyala ikwisakumasya ifindu ifisitabugholofu ifi abandu bikubomba amasiku agha.—Luka 18:7.
-
2. ALIWESA ISAKUYA NULUTENGANO. Akayapo uyu isakutamiwagha panongwa yakumbombela ifyankhaza pamo ubwite. (Salimo 46:9) Abandu bosa pa kisu kyapasi bisakuya balutengano kangi ghisakuya malo manunu aghakwikalamo.—Salimo 72:7.
-
3. ALIWESA ISAKWIKALAGHA KWA BWILA NA BWILA. Umundu aliwesa isakunangisyagha ulughano ku nnine. (Matai 22:39) Akayapo uyu isakutamiwagha naminong’ono amabibi. (Yesaya 65:17) Pakabalilo ako, linga ukubengana kumalike, abandu “bisakwikyelagha nifinunu ifi fikulefuka itolo.”—Salimo 37:11.
Ngimba mukulonda ukuti musikaleghe nkisu bo iki? Amasiku agha, abandu bingi bikughelaghela ukuti bangabenganagha mwakukonga ifundo sya mu Baibolo. (Salimo 37:8) Syo isi Abaketi ba Yehova pa kisu kyosa bikubomba. Nalinga ukuti bakindene inyiho nakuno bakulile abene bikukolelana kangi bikunangisania ulughano.—Yesaya 2:2-4.
Abaketi ba Yehova bikuya pakuhoboka ukubabula isi bamanyile isyakufwana nukwifimbilisya ku findu ifisitabugholofu nukusalana. Isi mumanyile sikuya pakubatula ukuti muleke ukubabenga abangi nukwanda ukubanangisya ulughano. Mubaghile ukubanangisya ulughano nalinga ukuti batikubandaghisya pamo bababengile. Ifyakukongapo fyake, mukuya pakuya balusekelo kangi ubumanyani bwinu na bangi bukuya pakuya bwamaka. Ukukinda fyosa, mukuya pakumanyila isi mubaghile ukubomba ukuti musikale mu Bunyafyale bwa Kyala linga ukubengana kumalike.—Salimo 37:29.
Lumo Mubaghile Ukulonda Ukumanya Isya Nkhani iyi
IMITU YA NKHANI ISYAKUKINDANAKINDANA
Ngimba Ubugholofu Bwisakuyapo pa Kisu Kyapasi iki?
Ibaibolo likunangisya ukuti ubugholofu ubwa bwanaloli bukufuma kwa Kyala, uyu ikubaketa abandu ukuti bafwene itolo.
