Ibaibolo likaya buku lya fya mikota. Loli lili nubulongosi ubu bubaghile ukuntula umundu uyu ikutamiwa naminong’ono. Isagha tukete ififwanikisyo fimo.

“Bakaya bo bakafu aba bikundonda dokotala loli ba babine.”​—MATAI 9:12.

Ibaibolo likwitikisya ubutuli bwa nkota. Abandu bingi aba bali nindamyo yaminong’ono, batuliwe fiyo nadokotala panongwa yakumanya muno babaghile ukubombela ukufwana nububine bwabo.

“Ukuwisibisya umbili ko kukunkabila umundu.”​—1 TIMOTI 4:8.

Ukubomba ifindu ifi fibaghile ukupangisya umbili winu ukuya wamaka, kubaghile ukubatula linga muli nindamyo yaminong’ono. Ifi fikongelelapo ukupanga amafizo akabalilo kosa, ukulya ifyakulya ifinunu nukughona mwakufwana.

“Indumbula ya bwikyele yikumpa umundu ubumi ubununu, yope ni ndumbula iyi yisulumenie yo yikughupelela umbili ukughanda.”​—ISYA MBUPINGAMU 17:22.

Ukubelenga inkhani syakukasya isya mu Baibolo nukuya nubwighane ubu tubaghile ukubufwanisya fibaghile ukututula ukuya balusekelo. Linga mukwinong’onela ifindu ifinunu nukuya nulusubilo ukuti ifindu fikuya pakuya kanunu nkyeni, sibaghile ukubatula ukuti mwifimbilisyeghe linga mukutamiwa naminong’ono.

 “Ukuya walwiyisyo gho mahala.”​—ISYA MBUPINGAMU 11:2.

Mubaghile ukuketa ukuti mukabaghila ukufwanisya ukubomba kilikyosa iki mukulonda pamwibene, yonongwa yake mukulondiwa ukwitikisya ubutuli ubwakufuma ku bangi. Abamanyani naba mumbumba yinu babaghile ukulonda ukuti babatule loli bakabaghila ukumanya ubutuli ubu mukulondiwa. Mubabuleghe ubutuli ubu mukulonda. Mungaghulilagha ukuti bababombele nyingi kangi utubalilo tosa mundaghisyeghe panongwa ya butuli ubu babapele.

“Naketile ukuti ikindu kimo kikaya kanunu pabumi bwangu, yonongwa yake nabukile kwa dokotala. Umwene abumenye ububine bwangu. Isi syalindulile ukwitikisya indamyo yangu nukumanya unkota unnunu ughu ghubaghile ukundula.”​—Nicole, a uyu ali nindamyo yakutamiwa naminong’ono.

“Ngetile ukuti ukubelenga Ibaibolo akabalilo kosa nunkasi wangu, kundulile ukuti njeghe naminong’ono amanunu. Kangi utubalilo twingi linga ngutamiwa ukwifimbilisya, ivesi limo lya mu Baibolo likungasya fiyo.”—Peter uyu ikutamiwa naminong’ono.

“Kwayagha kukafu fiyo ukubabula abangi ububine ubu nabinagha panongwa yakuti syangosyagha isoni. Loli ummanyani wangu ambilikisyagha fiyo kangi ali wakisa. Umwene andulagha ukuti nipilikeghe kanunu nukuketa ukuti ngaya nimwene.”​—Ji-yoo uyu ikutamiwa nindamyo yakulya.

“Ibaibolo lindulile ukuti mbombeghe kanunu ifindu, ndambalaleghe mwakufwana nukuleka ukwikolania fiyo nimbombo. Ubulongosi bwa mu Baibolo bundulile ukuti ndimbane nindamyo yakutamiwa naminong’ono.”​—Timothy, uyu ikutamiwa nindamyo yaminong’ono.