Indamyo ya Pakisu Kyosa Iyakutamiwa Naminong’ono
“Utubalilo twingi ngutamiwa ni ndamyo yaminong’ono nalinga po pakabalilo aka nikele nimwene nkipinda.”
“Linga nandile ukwipilika kanunu, ngwanda ukupasya fiyo. Ngumanya ukuti linga nhobwike fiyo nguya pakuya nikitima mwalululu.’”
“Isiku lililyosa ngughelaghela ukumanya isi sikubombiwa. Loli utubalilo tumo ngutamiwa naminong’ono pafindu fimo.”
Amasyu agha ghikuyobiwa nabandu aba bikutamiwa nindamyo yaminong’ono. Ngimba nanumwe mukutamiwa nindamyo bo iyi?
Mukulondiwa ukumanya ukuti mukaya mwibene. Abandu bingi bikutamiwa fiyo nindamyo yaminong’ono.
Kisita kukayika, tukwikala “ntubalilo utupalapala” kangi tukwaghana nindamyo nyingi fiyo. (2 Timoti 3:1) Ibuku limo lyatile, pakisu kyosa, umundu yumo pabandu 8 ikutamiwa nindamyo yaminong’ono. Mu 2020, imbungo ya COVID-19 yapangisye abandu bingi ukutamiwa naminong’ono ukukinda ikyinja kya 2019 kangi abandu abakukinda 28 pelesenti batamiwe fiyo nindamyo yaminong’ono.
Kwakulondiwa ukumanya ubwingi bwa bandu aba bikutamiwa nindamyo yaminong’ono. Loli kwakulondiwa fiyo ukumanya muno uswe numundu uyu tunganile tubaghile ukwipilikila pabumi bwitu.
Ngimba indamyo yaminong’ono findu fiki?
Linga umundu ali naminong’ono amanunu ikwipilika kanunu kangi ikubomba kanunu ifindu. Mubaghile ukumalana nindamyo yaminong’ono linga mukwiyipa pambombo nukwikutisiwa pabumi bwinu.
Indamyo yaminong’ono. . .
-
YITIKUSANUSYA ukuti umundu ikutoliwa ukubomba ifindu fimo.
-
YIKUSANUSYA ukupalamasya nukusofania aminong’ono gha mundu, ukufwana namuno ikwinong’onela nukubomba ifindu.
-
Isi sibaghile ukumpangisya ukuti kuye kukafu ukuya nabamanyani nukubomba kanunu ifindu pabumi bwake.
-
Indamyo iyi yibaghile ukumpalamasya aliwesa kisita kweghela ifyinja, inyiho, amalo agha akulile, ikikolo, itchalichi, ifimanyilo pamo ikyuma.
Ukubwagha ubutuli linga muli nindamyo yaminong’ono
Utubalilo tumo umundu ikwanda ukubomba ifindu fimo munjila yakuswighisya, lumo umwene abaghile ukwanda ukulambalala, ukulya nukuya nikitima fiyo. Linga isi sibombiwe, umundu uyu ikulondiwa ukwaghana nadokotala ukuti antule ukumanya ifi fipangisye ukuti ifindu fichenje pabumi bwake namuno indamyo iyi yibaghile ukumalikila. Loli ngimba mubaghile ukubwagha kughu ubutuli?
Yesu Kristu uyu ali wamahala fiyo ukukinda aliwesa pakisu, atile: “Bakaya bo bakafu aba bikundonda dokotala, loli ba babine.” (Matai 9:12) Bosa aba bikutamiwa nindamyo yabubine kangi bikwambilila kanunu ubutuli bwa nkota babaghile ukubumbuluka nukwanda ukuhoboka pabumi bwabo. Kubaghile ukuya kwa mahala fiyo kubandu aba bikunangisya ifimanyikilo fya bubine ukwambilila mwanakalinga unkota. a
Nalinga ukuti Ibaibolo likaya buku lya bulongosi bwa nkota, loli ifundo syake sibaghile ukututula fiyo pabumi bwitu. Tukubasuma ukuti mubelenge inkhani syakukongapo isi sikulingania muno Ibaibolo libaghile ukututulila ukumalana nindamyo yaminong’ono.
a Ingasya ya Ndindilili iyi yitikunsalila umundu ifyakubomba. Umundu aliwesa ikulondiwa ukwinong’onelapo tasi bo akali ukusala ifyakubomba.
Lumo Mubaghile Ukulonda Ukumanya Isya Nkhani iyi
ESSENTIAL BIBLE TEACHINGS
Nongwa Yafiki Kyala Itikisye Indamyo pa Kisu Kyapasi?
Isi Ibaibolo likuyoba pa nkhani iyi syakukasya kangi syakusubisya.
AMUYEGHE MASO
Abakilumyana Bingi Bikutamiwa Fiyo Naminong’ono—Ngimba Ibaibolo Likuyoba Isyafiki?
Ibaibolo likubika ubulongosi ku bakilumyana aba bikwaghana nindamyo yaminong’ono.
ISYA USWE
Suma Ukuti Mumanyileghe Ibaibolo
Muyobesanie amalalusyo aghakufwana ni Baibolo, pamo manyila nyingi isyakufwana na Baketi ba Yehova.
