Kyala Ikubapasikisya
Ibaibolo lili nubulongosi ubununu fiyo panongwa yakuti lifumile kwa Kyala. Likaya buku lyafyabumi, loli libaghile ukututula munjila inunu ukuti tulimbane nindamyo bo ukutamiwa naminong’ono, ifyakubaba nifindu ifi fibaghile ukonanga ubumi bwitu.
Ikyakulondiwa fiyo kyo kyakuti, Ibaibolo likutubula ukuti Umpeli witu, Yehova Kyala, a ikumanya kanunu linga tukutamiwa naminong’ono ukukinda umundu aliwesa. Umwene ikulonda fiyo ukututula ukuti tumalane nindamyo yiliyosa iyi tukwaghana nayo. Mwakifwanikisyo, inong’onela ifundo isyakukasya sibili isi sili mu Baibolo:
“Yehova ali pipi itolo nabandu bosa aba indumbula syabo sisulumenie; kangi ikubapoka aba indumbula syabo silikisiwe.”—SALIMO 34:18.
“Yo une Kyala Yehova winu, nikubakakisya umwe nikubabula nikuti, ‘Mungatilagha. Nisakubatula umwe.’”—YESAYA 41:13.
Loli ngimba Yehova ikututula bulebule ukumalana nindamyo yakutamiwa naminong’ono? Bo muno mukuya pakuketela munkhani isyakukongapo, Yehova ikunangisya naloli ukuti ikutupasikisya munjila nyingi.
a Yehova yo ngamu ya Kyala.—Salimo 83:18 NWT.
