2 | “Ukusubisiwa na Malemba”
IBAIBOLO LIKUTI: “Buno syosa isi syalembiwe iyolo mmalemba, syo syalembiwe ukuti luyeghe lumanyisyo kumyitu ukuti tuyeghe nulusubilo mbufisalyoyo na ndusubisyo lwa Mmalemba ghaghagha.”—BAROMA 15:4.
Ngimba isi Sikusanusya Isyafiki?
Ibaibolo lili nifundo isyakusubisya isi sibaghile ukutupa amaka ukuti twifimbilisyeghe kuminong’ono amabibi. Ifundo sya mu Baibolo sikutupa kangi ulusubilo ulwakuti mwalululu tutisakutamiwagha kangi naminong’ono.
Ngimba isi Sibaghile Ukututula Bulebule?
Twesa tukutamiwa naminong’ono utubalilo tumo; loli aba bali nindamyo yaminong’ono babaghile ukutamiwa isiku lililyosa nukupilika ifyakubaba. Ngimba Ibaibolo libaghile ukututula bulebule?
Ibaibolo lili nifundo inunu isi sibaghile ukututula ukuti tungayagha naminong’ono amabibi. (Bafilipi 4:8) Sibaghile ukututula pabumi bwitu mwakutusubisya nukututula ukuti twikoleghe linga tukutamiwa naminong’ono.—Salimo 94:18, 19.
Ibaibolo libaghile ukututula ukuleka ukwinong’ona ukuti tukaya bakulondiwa.—Luka 12:6, 7.
Ifundo nyingi sya mu Baibolo sikutupa ulusubilo ulwakuti tukaya twibene kangi Kyala, Umpeli witu, ikumanya muno tukwipilikila.—Salimo 34:18; 1 Yohani 3:19, 20.
Ibaibolo lifingile ukuti Kyala isakumasya ifyakubaba fyosa. (Yesaya 65:17; Ubusetuli 21:4) Linga tukutamiwa naminong’ono nukwiyaya, tubaghile ukuketa ukuti ulufingo ulu lukutupa amaka ukuti twifimbilisyeghe.
