Muno Tubaghile Ukubatulila aba Bali Nindamyo Yaminong’ono
IBAIBOLO LIKUTI: “Ummanyani wa naloli yo mundu uyu ikunangisya ulughano bwila kangi uwamyinu yo apapiliwe ukuti akutuleghe uwe mbutolwe.”—ISYA MBUPINGAMU 17:17.
Ngimba isi Sikusanusya Isyafiki?
Tukabaghila ukwipilika kanunu linga ummanyani witu ikutamiwa nindamyo yaminong’ono. Loli tubaghile ukunangisya ukuti tukumpasikisya mwakuntula ukuti amalane nindamyo iyi. Bulebule?
Ngimba isi Sibaghile Ukututula Bulebule?
“Tuyeghe bengo ukupilika.”—YAKOBU 1:19.
Injila yimo iyakwanda iyi tubaghile ukuntula ummanyani witu ko kupilikisya isi ikuyoba. Tutikulondiwa ukwamulapo pakilikyosa iki ikuyoba. Umwene ikulondiwa ukumanya ukuti tukupilikisya kanunu isi ikuyoba kangi tukumpasikisya. Tukulondiwa ukumanya muno ikwipilikila kangi tungandongagha. Tukumbukeghe ukuti lumo abaghile ukuyoba ifindu fimo ifi pabumalilo abaghile ukwilumbusya nafyo.—Jobu 6:2, 3.
“Tuyobeghe mwakisa.”—1 BATESALONIKE 5:14.
Ummanyani witu abaghile ukutamiwa fiyo nukwanda ukwiketa ukuti akaya wakulondiwa. Ukuti tunangisye ukuti tukumpasikisya, tukulondiwa ukunsubisya nukunkasya, nalinga tukamanya isi tubaghile ukuyoba.
“Ummanyani wa naloli yo mundu uyu ikunangisya ulughano bwila.”—ISYA MBUPINGAMU 17:17.
Tunkasyeghe nifundo sya mmalemba. Tubaghile ukundalusya isi ikulonda ukuti tuntule. Linga ummanyani witu ikutoliwa ukubomba fimo nukuyoba ifi ikulonda, tukulondiwa ukwinong’onela ifindu ifi tubaghile ukuntula, bo ukubuka nawe kumalo ghamo pakwenda. Pamo ukwakumulila ifindu Bagalatia 6:2.
ku musika, ukutendekesya pakaya, nimbombo isingi.—“Tuyeghe bololo.”—1 BATESALONIKE 5:14.
Utubalilo tumo ummanyani witu akabaghila ukutubula ifindu fimo. Linga isi sibombiwe tumbuleghe mwalughano ukuti tukuya pakuhoboka ukupilikisya pakabalilo aka umwene ikulonda ukuti atubule. Panongwa yabubine, lumo abaghile ukuyoba pamo ukubomba ifindu ifi fibaghile ukutukalalisya. Umwene abaghile ukusofania isi tukulonda ukubomba. Tukulondiwa ukuya bololo nukummanya kanunu bo tukughelaghela ukuntula.—Isya mbupingamu 18:24.
Ubutuli Bwitu Bubaghile Ukuya Bwakulondiwa Fiyo
“Utubalilo tosa ngughelaghela ukuya mmanyani nnunu uyu abaghile ukunsubila. Nalinga ukuti ngabaghila ukumasya indamyo syake, ngughelaghela ukusyagha injila simo isyakuti nuntule.”—Farrah, a uyu ummanyani wake ikutamiwa nindamyo yaminong’ono.
“Ummanyani wangu alinikisa fiyo. Umwene ikungolela kunyumba yake ukuti ngalyemo nawe ifyakulya. Panongwa yalughano lwake nguhoboka fiyo kangi ngumbula muno ngwipilikila. Isi sikundula fiyo pabumi bwangu.”—Ha-eun uyu ikutamiwa nindamyo yaminong’ono.
“Ubololo bwakulondiwa fiyo. Linga unkasi wangu angalalisye, ngukumbukila ukuti mbine kangi bukaya bwighane bwake. Isi sikundula ukuti ningankalalilagha kangi ngukindilila ukuntula.”—Jacob uyu unkasi wake ikutamiwa nindamyo yaminong’ono.
“Unkasi wangu ikundula nukunsubisya fiyo. Linga ngutamiwa naminong’ono, umwene atikumfimbilisya ukubomba kilikyosa iki ndikulonda. Utubalilo tumo atikubomba ifindu ifi alondagha ukubomba. Umwene wakulondiwa fiyo kumyangu panongwa yakuti ikupa kangi akaya wakwibona.”—Enrico uyu ikutamiwa nindamyo yaminong’ono.
a Ingamu simo sichenjile.