Yehova Kyala ikutubula ukuti, tumbuleghe indamyo yiliyosa iyi tukwiyaya nayo. (Salimo 55:22) Yikayapo indamyo inywamu pamo inandi iyi yibaghile ukutupangisya ukuti tungambulagha Yehova ndwiputo. Linga syakulondiwa kumyitu kokuti syakulondiwa na kwa Yehova. Sili bo ulu panongwa yakuti Yehova ikutupasikisya kangi ikumanya muno tukwipilikila. Ukwiputa kumyake yo njila inunu iyi yibaghile ukututula ukuya nulutengano lwamundumbula.​—Bafilipi 4:6, 7.

Linga tukutamiwa nindamyo yaminong’ono, tubaghile ukuketa ukuti tuli twibene. Abandu bamo bakabaghila ukupilikisya muno tukwipilikila. (Isya Mbupingamu 14:10) Loli linga tukumbula Yehova ndwiputo muno tukwipilikila, mwakisa ikuya pakutupilikisya nukututula. Yehova ikutuketa, ikumanya indamyo isi tukwaghana nasyo kangi ikulonda ukuti tumbuleghe ndwiputo syosa isi tukwiyaya nasyo.​—2 Syambukulu 6:29, 30.

Ukuyobesania na Yehova ndwiputo sikukasya ulusubilo lwitu ulwakuti umwene ikutupasikisya. Tubaghile ukwipilika bo muno alipilikile uwamasalimo uyu atile: “Namanga ubwenisye ubutolwe bwangu; syope nindamyo syangu uwe usyaghenie.” (Salimo 31:7) Panongwa yakusyaghania ukuti Yehova ikumanya indamyo isi tukwaghana nasyo, tukuya nulusubilo ukuti abaghile ukubomba nyingi ukuti atutule ukulimbana nasyo. Loli umwene ikubomba nyingi ukukinda ukumanya itolo. Ukukinda umundu aliwesa, ikumanya indamyo isi tukwaghana nasyo kangi ikututula ukuti tulwaghe ulusubisyo nukutukasya ukwendela mu Baibolo.