Isi Mukulondiwa Ukusala Pankhani ya: Nunu Nimbibi
Ifyakubomba ifi tukusala fibaghile ukutupangisya ukuya balusekelo pamo hayi. Yehova Kyala asimenye isi. Yonongwa yake umwene ikulonda ukuti tukongeghe ubulongosi ubwakufuma kumyake.
Yehova ikulonda ukuti tuyeghe nulutengano kangi balusekelo.
“Yo une Yehova Kyala winu, uyu ikulonda ukubamanyisya umwe ukuti muyeghe bandu banunu, uyu ikulonda ukubalongosya umwe munjila iyi mubaghile ukwendamo. Linga naloli mwapilikisyagha kuli isi nikubalaghila umwe! Po angali ulusayo lukwenda itolo ukuti lusoko ukwisa pamyinu, bo lu lwisi ulu lutikuma siku. Po angali mukuya balambiki bo gha mayigha agha ghikukoma munyanja mumbali.”—Yesaya 48:17, 18.
Pakuya Mpeli witu, Kyala amenye muno tubaghile ukwikalila pabumi bwitu. Umwene ikulonda ukuti tukongeghe ubulongosi bwake ubununu. Linga tukukonga indaghilo sya Kyala, tutikuya pakukayikila ukuti isi tusalile sikuya pakuya nunu. Utubalilo tosa, tukuya pakusala kanunu ifyakubomba ifi fikuya pakutupangisya ukuti tuyeghe nulutengano kangi balusekelo.
Yehova atikutubula ukuti tubombeghe isi tukabaghila ukufwanisya.
“Namanga ulufingo ulu nikubapa umwe umwisyughu lukaya lupalapala, kangi lukaya kubutali mma.”—Ukukumbusya Indaghilo 30:11.
Ukukonga ifundo sya Kyala kubaghile ukupangisya ukuti tuchenje muno tukwinong’onela namuno tukubombela ifindu. Loli Yehova atikughulila fingi kumyitu. Kangi pakuya Mpeli, umwene asimenye isi tubaghile ukufwanisya. Kangi bo tukukindilila ukumanyila isya Yehova, tukuya pakuketa ukuti “indaghilo syake syo sikaya sito.”—1 Yohani 5:3.
Yehova ikuya pakubatula aba basalile ukukonga indaghilo syake.
“Yo une Yehova Kyala winu, nikubakakisya umwe nikubabula nikuti, ‘Mungatilagha, nisakubatula umwe.’”—Yesaya 41:13.
Tubaghile ukukonga ubulongosi bwa Yehova panongwa yakuti umwene ikuya pakututula. Abaghile ukutupa ubulongosi ukwendela Mmasyu ghake, Ibaibolo, ili likutukasya nukutupa ulusubilo.
Abandu amamiliyoni mingi pakisu kyosa, baketile ukuti ukukonga ubulongosi bwa Yehova kwakutula fiyo pabumi bwabo. Mumanyileghe nyingi isya bulongosi ubu bukwaghiwa mu Baibolo. Mubaghile ukwanda ukubelenga ibulosha ili likuyoba isya Baibolo ilyakuti Amuhobokeghe nu Bumi kwa Bwila na Bwila! kisita kulipila pa jw.org. Mukwaghiwa ifimanyilo ifi:
-
Ngimba Ibaibolo Libaghile Ukubatula Bulebule?
-
Ibaibolo Likutupa Ulusubilo Ulwa Bumi Ubununu Nkyeni
-
Ngimba Mubaghile Ukulisubila Ibaibolo?
Bo mukufufuza Mmasyu gha Kyala, Ibaibolo, mukuya pakuketa ukuti likaya lya iyolo; mmalo mwake mukuya pakuketa ukuti Ibaibolo limikiwe “ukuyako bwila na bwila.” (Salimo 111:8) Ukukonga ubulongosi ubu tukubwagha mu Baibolo, kukuya pakututula ukuya nubumi ubununu. Loli Kyala atikutufimbilisya ukuti tukongeghe ubulongosi bwake. (Ukukumbusya Indaghilo 30:19, 20; Yoswa 24:15) Aliwesa ikulondiwa ukusala mwene.
