Tusubileghe isi Ibaibolo Likuyoba Pankhani ya: Nunu Nimbibi

IGHULA

Tukabaghila ukusubila ukuti isi tukusala nunu ukufwana namuno uswe na bangi tukwipilikila. Ibaibolo likuyoba ikifukwa kyake kangi likulingania nyingi. Lili nubulongosi ubu bubaghile ukututula ukumanya inunu nimbibi ukuti tuye balusekelo.

TUKULONDIWA UBULONGOSI UBWAKUFUMA KWA KYALA

Mu Baibolo, Yehova a ikulingania ukuti ikulonda ukuti abandu basumeghe ubulongosi kumyake mmalo mwakuti bendeleghe pamo balongosiweghe naminong’ono ghabo. (Yeremiya 10:23) Yonongwa yake ikutupa ubulongosi ukwendela mu Baibolo. Umwene abaghanile abandu kangi ikulonda ukubafighilila nukubatula ukusala kanunu ifyakubomba pabumi bwabo. (Ukukumbusya Indaghilo 5:29; 1 Yohani 4:8) Ukukinda fyosa, pakuya Mpeli witu, umwene ali namahala ghamuno abaghile ukututulila nukutupa ubulongosi. (Salimo 100:3; 104:24) Loli Kyala atikubafimbilisya abandu ukuti bakongeghe ifundo syake.

Yehova abapele abandu abakwanda, Adamu na Eva kilikyosa iki balondiwagha ukuti baye balusekelo. (Ubwandilo 1:28, 29; 2:8, 15) Umwene abapele ubulongosi ubwakuti babukongeghe. Kangi abapele ubwabuke ukuti basaleghe bene ukumpilikila pamo hayi. (Ubwandilo 2:9, 16, 17) Syakitima ukuti Adamu na Eva bakakongile ubulongosi bwa Kyala. (Ubwandilo 3:6) Ngimba ifyakukongapo fyake fyali fyo filiku? Ngimba ubwabuke ubwakusala ifyakubomba pankhani ya nunu nimbibi, bukubapangisya abandu ukuya balusekelo? Hayi. Kwa fyinja fingi tuketile ukuti ukuleka ukukonga ubulongosi bwa Kyala, kutikutwala ulutengano nulusekelo lwanaloli.—Undumbilili 8:9.

Ibaibolo likutupa ubulongosi ubu bubaghile ukututula ukuti tusaleghe kanunu ifyakubomba kisita kwinong’onela isya kunyuma. (2 Timoti 3:16, 17; keta ibokosi ilyakuti “ Ibuku lya Bandu Bosa.”) Keta muno Ibaibolo likutulila.

Manyila ikifukwa iki Ibaibolo likukoleliwa ukuti “isyu lya Kyala.”—1 Batesalonike 2:13. Ketelela ividiyo iyakuti Ngimba Ibaibolo Masyu gha Nani? pa jw.org.

NONGWA YAFIKI BAMO BATIKULISUBILA IBAIBOLO?

Bamo bikuketa ukuti Ibaibolo likabaghila ukubatula ukuya nutuyilo utununu. Abene babaghile ukuyoba ifundo isyakukongapo isi.

Bamo bikuti: “Amavesi ghamo gha mu Baibolo ghikususania.”

Ubwanaloli: Pabwandilo fibaghile ukuboneka ukuti amavesi ghamo agha mu Baibolo ghikususania naghangi. Loli linga muketile muno baghalembile nakabalilo aka ghalembiwe, mukuya pakuketa ukuti ghikukolelana.

Ukuti mukete ififwanikisyo fimo, belenga inkhani iyakuti “Kasi Baibolo Likususkana?” iyi yili pa jw.org.

Bamo bikuti: “Abandu aba bikuti bikulisubila Ibaibolo bikubomba ifindu ifibibi. Isi sikunangisya ukuti Ibaibolo litikubatula abandu ukuya nutuyilo utununu.”

Ubwanaloli: Tutikulondiwa ukulibenga Ibaibolo panongwa yatuyilo utubibi utwa bandu aba bikulisubila. Ibaibolo lyayobile ngani ukuti abandu bingi, ukongelelapo abalongosi bamatchalichi aba bikuyoba ukuti bikulisubila Ibaibolo, bisakubombagha ifindu ifi fitikukolelana na isi likuyoba. Likuyoba kangi ukuti panongwa yatuyilo twabo utubibi, abandu “bisakuyiyobagha ububibi injila ya naloli.”—2 Peteri 2:1, 2.

Ukuti mumanye ikifwanikisyo kimo ikya njila isi sikunangisya ukuti abalongosi bingi abamatchalichi balekile ukukonga isi Ibaibolo likumanyisya, belenga inkhani iyakuti “Ngimba Itchalichi Bizinesi?” pa jw.org.

Bamo bikuti: “Abandu aba bikukonga ifundo sya mu Baibolo, batikubaghindika abangi aba bakindene nabo.”

Ubwanaloli: Ibaibolo likutukasya ukuti tubaghindikeghe abangi. Litikwitikisya aminong’ono aghakuti:

twiketeghe ukuti tuli bakulondiwa ukukinda abangi.—Bafilipi 2:3.
tungabaghindikagha abandu aba tukindene nabo utuyilo pamo isi tukusubila.—1 Peteri 2:17.
tubafimbilisyeghe abangi ukuti bakolelaneghe naminong’ono ghitu.—Matai 10:14.

Ibaibolo likunangisya ukuti akabalilo kosa, Kyala ikubanangisya ikisa abandu nukubabombela ifindu mbwanaloli. Kangi umwene ikulonda ukuti nanuswe mo tubombeleghe.—Baroma 9:14.

Ukuti mumanye nyingi, belenga inkhani iyakuti “Kasi Baibolo Lingatovwira Wuli Kuti Tizizipizgiranenge?” pa jw.org.

IBAIBOLO LIKUTUBULA ISI KYALA IKULONDA UKUTI TUBOMBEGHE

Ibaibolo likulingania muno Yehova ikubombela ifindu nabandu ukufuma pabwandilo. Likututula ukupilikisya muno Kyala ikusiketela inunu nimbibi, ifi fibaghile ukututula na ifi fibaghile ukutufulasya. (Salimo 19:7, 11) Isi tukumanyila syanaloli kangi sikuya pakututula ukusala kanunu ifyakubomba pabumi bwitu.

Mwakifwanikisyo, inong’onela ubulongosi ubu buli pa Isya Mbupingamu 13:20 apa pikuti: “Wendeghe na bandu aba mahala, ukuti uye wa mahala, uye mmanyani wa bakonyofu ukuti nanuwe wende nukusofiwa.” Ifundo iyi yibaghile ukututula lino kangi yabatulagha nababombi ba Kyala abankabalilo kakunyuma. Ibaibolo lili ni fundo isyakutula kangi nunu.—Keta ibokosi ilyakuti, “ Ibaibolo Likututula Akabalilo Kosa.”

Mubaghile ukwilalusya ukuti, ‘Ngimba mbaghile ukumanya bulebule ukuti ubulongosi bwa mu Baibolo bubaghile ukundula amasiku agha?’ Inkhani iyakukongapo yikuya pakulingania muno Ibaibolo likubatulila abandu amasiku agha.

a Yehova yo ngamu ya Kyala.—Salimo 83:18 NWT.

IBAIBOLO LIKUTUTULA AKABALILO KOSA

Nalinga ukuti Ibaibolo lyamalisiwe ukulembiwa ifyinja 2,000 ifi fikindile, loli likututula mpaka lino. Utubalilo tosa abandu bikulonda ukuya balusekelo pabumi bwabo nukuya nubumi ubununu. (Undumbilili 1:9) Ubulongosi ubwamahala ubwa mu Baibolo bubaghile ukututula ukufwanisya ubwighane ubu.

Ukuya Nsubiliwa

“Tukulonda bwila ukubomba inunu.” —Bahiburi 13:18.
“Unhiyi yo aleke ukuhiya; loli, kununupo ukuti iyuleghe abombeghe imbombo inunu.”—Baefesi 4:28.

Ukubomba Ifindu Nabangi

“Umundu wesa angasilondagha si syake, loli si sya yungi.”—1 Bakorinti 10:24.
“Mufisanileghe ilyoyo, kangi linga yumo ali ninongwa nunnine muswaneghe.”—Bakolosi 3:13.

Ukusala Ifyakubomba

“Umundu unkonyofu yo ikwitika syosa itolo isi bikumbula, loli umundu wamahala yo ikwinong’ona tasi injila iyi abaghile ukwendamo.”—Isya Mbupingamu 14:15.
“Umundu uwa mahala linga abubwene ubutolwe bukwisa pabutali ikwibilila; loli umwene unkonyofu yo atikubikilako numoyo, bunobuno ikwenda nukufulala.” —Isya Mbupingamu 22:3.

INGASYA YA NDINDILILI