Linga mukulonda ukubuka kumalo ghamo agha mukabukamo siku, ngimba mubaghile ukubomba isyafiki?

1. 1. Mukongeghe injila iyi mukwinong’ona ukuti yikubuka kumalo agha mukulonda.

2. 2. Mubakongeghe abandu aba mukusubila ukuti bayimenye kanunu injila.

3. 3. Mubombeleghe ifindu ifi mukusubila ukuti fibaghile ukubalongosya, bo amapu, GPS pamo umwininu uyu ayimenye kanunu injila.

Linga mubaghile ukubombesyela injila iyakwanda niyabubili, sibaghile ukubatula loli lumo mukabaghila ukufika kuno mwalondagha. Loli linga musalile injila iyabutatu, mukuya nulusubilo losa ukuti mukuya pakufika naloli kumalo agha mukulonda ukubuka.

Ubumi bwitu bufwene itolo nubulendo. Kangi pabulendo ubu tukusubila ukuti bukuya pakututula ukuti tusaye balusekelo nkyeni. Kali tukuya pakufika pamo hayi, sikuya pakweghela kuno tukubwagha ubulongosi pakusala ifindu.

Ifyakubomba ifi tukusala, fimo fikuya finandi fimo fikuya finywamu. Ifi tukusala fikunangisya ukuti isi tukusubila nunu pamo mbibi. Kangi fibaghile ukutupalamasya uswe nabandu aba tubaghanile. Isi sikongelelapo:

• Ukughonana nubweghi

• Ukuya nsubiliwa, imbombo kangi nindalama

• Muno mubaghile ukubalelela abana

• Muno mubaghile ukubombela ifindu nabangi

Ngimba mubaghile ukusala bulebule mfindu ifi fiyobiwe pamwanya ukuti umwe nimbumba yinu musaye balusekelo nkyeni?

Ilalusyo ili aliwesa ikulondiwa ukwilalusya lyo lyakuti: Ngimba findu fiki fibaghile ukundula ukusala kanunu ifyakubomba pankhani ya nunu nimbibi?

Magazini iyi yikuya pakulingania ikifukwa iki tubaghile ukusubila isi Ibaibolo likuyoba pankhani ya nunu nimbibi kangi namuno libaghile ukututulila.