Inkhani isi syakindagha syalingenie muno Kyala ikuya pakumasyila ikisu ikibibi iki mwalululu ni ndamyo syosa. Tuli nulusubilo losa ukuti isi sikuya pakubombiwa. Nongwa yafiki? Panongwa yakuti Amasyu gha Kyala, Ibaibolo, lifingile ukuti:

“Ikisu kikuyonga.”—1 YOHANI 2:17.

Tuli nulusubilo losa ukuti bisakuyapo bamo abakupona panongwa yakuti Ibaibolo lifingile kangi ukuti:

“Uyu linga ikubomba ubwighane bwa Kyala ikuyako bwila na bwila.”

Linga tukulonda ukwisa kupona, tukulondiwa ukubomba ubwighane bwa Kyala. Ukuti tubumanye ubwighane bwa Kyala, ikyakwanda tukulondiwa ukum’manya kanunu umwene.

Yesu atile: “Ubwene ubumi bwa bwila, ko kukumanya linga bakumenye uwe ukuya we Kyala wanaloli wimwene.” (Yohani 17:3) Ukuti tusapone nu kwikala kwa bwila na bwila, tukulondiwa ‘ukum’manya kanunu’ Kyala. Isi sikusanusya ukumanya nyingi ukukinda ukumanya itolo ukuti Kyala aliko pamo ukusubila itolo mwa Kyala nu kumanya nandi isyakufwana numwene. Tukulondiwa ukuya nawe pabumanyani. Linga tukulonda ukuti ubumanyani bwitu buye bwamaka, tukulondiwa ukuya nakabalilo akakwangala na bamanyani bitu. Nanuswe mo muno tubaghile ukubombela ukuti tukasye ubumanyani bwitu na Kyala. Inong’onela ifundo isyakulondiwa isi tukumanyila mu Baibolo isi sikututula ukukusya nu kukasya ubumanyani bwitu na Kyala.

Akabalilo kosa tukulya ifyakulya ukuti tuye nu bumi. Loli Yesu atile: ‘Umundu fitikumpa ubumi fi fyakulya fyene, loli ilisyu lyosa ili likufuma nkanwa mwa Yehova.’—Matai 4:4.

Amasiku agha, tukughagha amasyu gha Yehova mu Baibolo. Linga tukubelenga ibuku lyapadela ili, tukuya pakumanya isi Kyala abombile kunyuma, isi ikubomba lino na isi isakubomba nkyeni.

Ngimba tukulondiwa ukubomba isyafiki linga tukulonda ukuti tukongeghe ifundo sya Kyala loli tukuketa ukuti kukafu ukuleka ukubomba ifibibi? Linga mo siyilile, ukum’manya kanunu Kyala kubaghile ukututula.

Inong’onela isya nkikulu yumo uyu ingamu yake yo Sakura, uyu ali nakayilo akabulowe. Bo andile ukumanyila Ibaibolo, amanyile ifundo sya Kyala isyakuti “abubopeghe ubulowe.” (1 Bakorinti 6:18) Sakura aliputile kwa Kyala ukuti ankasye kangi afwanisye ukuleka utuyilo utubibi. Loli akindilile ukulimbana nakayilo aka. Umwene atile, “Linga nandile ukwinong’onela ifindu ifyabulowe, ngumbula Yehova ndwiputo, nsimenye ukuti panimwene ngabaghila ukulimbana nakayilo aka. Ulwiputo lukundula fiyo ukuseghelela kwa Yehova.” Mwakufwana itolo na Sakura, abandu bingi bikulonda ukum’manya kanunu Kyala. Umwene ikubatula aba bikulonda ukuchenja pa bumi bwabo nu kubomba ifindu ifi fikunhobosya.—Bafilipi 4:13.

Linga mukughelaghela ukuti mum’manye kanunu Kyala, mukuya “pakumanyiwa na Kyala” pakuya mmanyani nnunu. (Bagalatia 4:9; Salimo 25:14) Linga tubombile isi, tukwisa pakupona nu kwingila nkisu ikipya ikya Kyala. Loli ngimba ikisu ikipya iki kisakubonekagha bulebule? Inkhani iyakukongapo yikuya pakulingania.