INKHANI IYAKUMANYILA 39
Linga uyu Munganile Andekile Yehova
“Kalinga apa bansambukilagha . . . nukumpelela ubusulumanie.”—SAL. 78:40.
ULWIMBO 102 “Wovwirani Awo Ŵakukhumbikwira Wovwiri”
ISI TUKUYA PAKUMANYILA *
1. Ngimba sibaghile ukutupalamasya bulebule linga unkamu witu epusiwe?
NGIMBA alipo yumo mwa bandu aba mubaghanile uyu epusiwe nkipanga? Isi sibaghile ukuya syakubaba fiyo? Umulumbu Hilda * atile, “bo undume wangu uyu twalikele nawe pabweghi ifyinja 41 afwile, syalimbabile. Loli bo umwanangu unnyambala epusiwe nukuyileka imbumba yake syalimbabile fiyo.”
Yehova ikumanya muno tukwipilikila linga uyu tunganile alekile ukumbombela umwene (Keta amapalagilafu 2-3) *
2-3. Ukufwana na Salimo 78:40, 41, ngimba Yehova ikwipilika bulebule linga ababombi bake balekile ukumbombela?
2 Inong’onela muno Yehova syalimbabile bo abandumi bake bansambukile. (Yuda 6) Inong’onela kangi muno syambabilagha bo abandu bake, Abaisraeli bansambukile. (Belenga Salimo 78:40, 41.) Mubaghile ukuketa ukuti Tata witu wa kumwanya yope sikumbaba fiyo linga umundu yumo ansambukile. Umwene ikumanya ikitima iki mukuya nakyo. Kangi mwakisa ikuya pakubakasya nu kubatula pabumi bwinu.
3 Mu nkhani iyi tukuya pakumanyila isi tubaghile ukubomba ukuti twambilile ubutuli bwa Yehova linga unkamu witu alekile ukumbombela umwene. Tukuya pakuketa kangi muno tubaghile ukubatulila abangi nkipanga aba unkamu wabo epusiwe. Loli ikyakwanda isagha tuyobesanie isi tutikulondiwa ukubomba.
MUNGIYIPAGHA INONGWA
4. Ngimba abapapi bingi bikwipilika bulebule linga umwanabo alekile ukumbombela Yehova?
4 Linga umwana yumo unnyambala pamo unkikulu alekile ukumbombela Yehova isi sikubapangisya abapapi ukuti bagheleghele muno babaghile ukuntulila umwanabo ukukindilila ukumbombela Yehova. Unkamu Luke atile, “Niyipagha inongwa bo umwanangu epusiwe nkipanga. Ngaghonagha utulo. Utubalilo tumo nalilagha kangi indumbula yangu yambabagha. Umulumbu Elizabeth uyu yope umwanake unnyambala alyepusiwe atile, “Ninong’onagha ukuti ngabombile kanunu ifindu fimo. Naketile ukuti natoliwe ukummanyisya umwanangu ubwanaloli.”
5. Ngimba yikuya nongwa yanani linga yumo andekile Yehova?
5 Tukulondiwa ukukumbukila ukuti Yehova atupele ubwabuke. Isi sikusanusya ukuti tubaghile ukusala ukumbombela pamo hayi. Abana bamo abapapi babo bakali nikifwanikisyo ikinunu loli abene basalile ukumbombela Yehova pabumi bwabo. Abangi aba abapapi babo babakasyagha ukuti bambombeleghe Yehova loli abene basalile ukundeka. Yonongwa yake aliwesa ikulondiwa ukusala ukumbombela Yehova. (Yos. 24:15) Abapapi bosa aba bali nikitima panongwa yakuti umwanabo alekile ukumbombela Yehova, batikulondiwa ukwiyipa inongwa.
6. Ngimba umwana abaghile ukwipilika bulebule linga umpapi alekile ukumbombela Yehova?
6 Utubalilo tumo tata pamo mama abaghile ukuleka ukumbombela Yehova kangi nu kuyileka imbumba yake. (Sal. 27:10) Isi sibaghile ukuya syakitima fiyo ku bana aba bikubaghindika nu kuhoboka na bapapi babo. Esther uyu tata wake alyepusiwe nkipanga atile, “Utubalilo twingi nalilagha panongwa yakuti nali nikitima fiyo. Umwene alindekile dala Yehova. Nunganile tata wangu, yonongwa yake bo epusiwe napasyagha fiyo isyakufwana nu bumi bwake. Kangi natamiwagha fiyo na minong’ono.”
7. Ngimba Yehova ikwipilika bulebule isyakufwana nu mwana uyu umpapi wake epusiwe?
7 Mwe bakilumyana linga umpapi winu yumo epusiwe nkipanga tukuya nikitima fiyo. Mukulondiwa ukumanya ukuti Yehova yope ikumanya muno mukwipilikila. Umwene abaghanile fiyo kangi ikuhoboka panongwa yakuti mukukindilila ukumbombela mbusubiliwa. Nanuswe twe bakamu na balumbu nkipanga tukuhoboka fiyo. Kangi mukulondiwa ukukumbukila ukuti mukaya nubudindo ubwakubasalila ifyakubomba abapapi binu. Bo muno tuyobile pabwandilo, Yehova ampele umundu aliwesa ubwabuke ubwakusala ukumbombela umwene pamo hayi. Umundu aliwesa uyu osiwe ikulondiwa ‘ukupimba ikitwalo kyake.’—Gal. 6:5.
8. Ngimba aba mumbumba ya mundu uyu epusiwe bikulondiwa ukubomba isyafiki bo bikughulila ukuti unkamu wabo aghomokele kwa Yehova? (Keta kangi ibokosi ilyakuti “ Amughomokele kwa Yehova.”)
8 Linga uyu munganile alekile ukumbombela Yehova, mungawagha amaka loli musubileghe ukuti isiku limo isakughomokela kumyake. Ngimba mukulondiwa ukubomba isyafiki bo mukughulila ukuti aghomokele kwa Yehova? Mukulondiwa ukubomba syosa isi mubaghile ukufwanisya ukuti mukindilile ukuya nulwitiko lwa maka. Mwakubomba isi mukuya pakunangisya ikifwanikisyo ikinunu ku bandu abangi na ku mundu uyu epusiwe. Isi sikuya pakubatula ukuti mungayagha nikitima fiyo. Isagha tuyobesanie isi sibaghile ukubatula ukuti mukindilile ukuya nulwitiko lwa maka.
ISI TUKULONDIWA UKUBOMBA UKUTI TUKINDILILE UKUYA NULWITIKO LWA MAKA
9. Ngimba tubaghile ukubomba isyafiki ukuti tukindilile ukuya nulwitiko lwa maka? (Keta kangi ibokosi ilyakuti “ Amalemba Agha Ghabaghile Ukututula Linga Unkamu Witu Alekile Ukumbombela Yehova.”)
9 Tukulondiwa ukuya nimbatiko inunu nu kukonga ukuti tuye nulwitiko lwa maka. Isi syakulondiwa fiyo panongwa yakuti sibaghile ukutukasya kangi sibaghile ukubakasya aba mumbumba isingi. Ngimba tubaghile ukubomba bulebule isi? Tukulondiwa ukukonga imbatiko yitu mwakubelenga Amasyu gha Kyala nu kwinong’onelapo kangi nu kwaghiwa pa ngomano syakipanga. Joanna uyu tata nunkulu wake babulekile ubwanaloli atile, “Nipilikagha kanunu fiyo linga mbelengile ififwanikisyo fya mu Baibolo bo ifya Abigelo, Estere, Yobu, Yosefu, na Yesu. Ififwanikisyo fyabo fikungasya fiyo nukundula ukuya na minong’ono amanunu. Kangi ngukasiwa fiyo ni nyimbo isya padela.”
10. Ngimba ilemba lya Salimo 32:6-8 likututula bulebule ukuti tungatamiwagha na minong’ono?
10 Mumbuleghe Yehova ndwiputo isi mukwiyaya nasyo. Linga mukutamiwa na minong’ono, mungalekagha ukwiputa kumyake. Munsumeghe Kyala witu wa lughano ukuti ‘abamanyisyeghe injila iyi mubaghile ukwendamo kangi na maso ghake ghikulindagha pamyinu.’ (Belenga Salimo 32:6-8.) Ukuyoba ubwanaloli kukaya kupepe ukumbula Yehova muno mukwipilikila. Loli Yehova ikumanya isi mukwaghana nasyo. Umwene abaghanile fiyo kangi ikutukasya ukuti tuntaghileghe syosa isi sili mu ndumbula yitu.—Kuso. 34:6; Sal. 62:7, 8.
11. Ukufwana na Bahiburi 12:11, nongwa yafiki tukulondiwa ukukolelana nu lufundo lwa Yehova? (Keta kangi ibokosoi ilyakuti “ Ukwepusiwa Lufundo lwa Yehova ulu Lukunangisya Ulughano Lwake.”)
11 Tukolelaneghe na isi abakulumba basalile ukubomba. Ukumwepusya umundu nkipanga lubatiko lwakufuma kwa Yehova. Ulubatiko ulu lukunangisya ulughano lwa Yehova ku mundu aliwesa ukongelelapo uyu epusiwe. (Belenga Bahiburi 12:11.) Bamo nkipanga babaghile ukuyoba ukuti abakulumba bakabomba kanunu ukumfunda pamo ukumwepusya umundu yumo. Loli tukulondiwa ukukumbukila ukuti abene batikuyoba isi umundu uyu onangile. Tutikuyimanya inkhani yosa. Yonongwa yake kwakulondiwa fiyo ukusubila isi abakulumba basalile ukubomba mwakukolelana ni fundo sya mu Baibolo.—2 Syambu. 19:6.
12. Ngimba fyakukongapo filiku ifinunu ifi bamo baghene nafyo panongwa yakukolelana nu lufundo lwa Yehova?
12 Linga tukolelene na isi abakulumba basalile ukubomba pakumwepusya uyu tunganile, sibaghile ukuntula ukuti aghomokele mwanakalinga kwa Yehova. Elizabeth uyu tunjobile pabwandilo atile, “Kwali kukafu fiyo ukuyobesania numwanitu unnyambala. Loli bo aghomokile kwa Yehova umwana uyu atile, syali syakulondiwa ukuti epusiwe. Bo akabalilo kakindilepo atile, amanyilepo nyingi fiyo. Naketile ukuti ulufundo lwa Yehova lununu fiyo.” Undume wake Mark alyongelile ukuti, “Umwanitu unnyambala atile alondagha ukughomokela panongwa yakuti tukabombelagha nawe pampene ifindu. Ndi walusekelo fiyo panongwa yakuti Yehova atutulile ukuya bakupilikila.”
13. Ngimba findu fiki fibaghile ukututula ukumalana ni ndamyo ya minong’ono?
13 Mubabuleghe abamanyani binu muno mukwipilikila. Muyeghe na kabalilo kakwangala na Bakristu abakusi mwambepo aba babaghile ukubakasya ukuya na minong’ono amanunu. (Mbu. 12:25; 17:17) Joanna, uyu tunjobile pabwandilo atile, “Nasulumaniagha fiyo mundumbula. Loli ukuyobesania na bamanyani bangu abasubiliwa kwalindulile ukuti m’malane ni ndamyo iyi nali nayo.” Loli bule linga bamo nkipanga bikuyoba ifindu ifi fikubapangisya ukuti mungipilikagha kanunu?
14. Nongwa yafiki tukulondiwa ukukindilila “ukufisanilana ilyoyo, nukuswana”?
14 Tuyeghe bololo ku bakamu na balumbu bitu. Tutikulondiwa ukughulila ukuti umundu aliwesa ikuya pakuyoba ifindu ifinunu kumyitu. (Yak. 3:2) Twesa tukaya bagholofu yonongwa yake tutikulondiwa ukuswigha linga bamo bikutubombela ifindu ifi fikutupangisya ukuti tungipilikagha kanunu. Tukumbukeghe ubulongosi bwa Pauli ubwakuti, ‘Mufisanileghe ilyoyo, kangi linga yumo ali ninongwa nu nnine muswaneghe.’ (Kolos. 3:13) Umulumbu yumo uyu unkamu wake alyepusiwe atile, “Yehova andulile fiyo ukuti mbahobokele abakamu aba bakambombelagha kanunu ifindu.” Ngimba abakamu na balumbu babaghile ukutulana bulebule nkipanga?
IKIPANGA KIBAGHILE UKUTULAPO
15. Ngimba tubaghile ukubomba isyafiki ukuti tubatule aba mu mbumba ya mundu uyu epusiwe?
15 Muyeghe bakisa kangi babumanyani ku ba mu mbumba ya mundu uyu epusiwe. Umulumbu Miriam atile apasyagha fiyo ukubuka ku ngomano bo umulumbu wake epusiwe. Umwene apasyagha na isi abandu bayagha pakuyoba. Loli abakamu na balumbu bingi bali nikitima ukufwana na isi syabombiwe. Kangi bakayobilepo imbibi isyakufwana nu mulumbu wangu. Ngubandaghisya fiyo panongwa yakuti ikitima kikalingolile nimwene.” Umulumbu uyungi atile, “Bo umwanitu unnyambala epusiwe, abamanyani bitu balisile pakutusubisya. Bamo batile, bakali nisyakuyoba. Bamo balilagha pampene nanine kangi bamo bandumilagha abakalata abakungasya. Isi babombile syalindulile fiyo pabumi bwangu.
Abakamu na balumbu babaghile ukunangisya ulughano mwakubatula aba mumbumba ya mundu uyu epusiwe (Keta ipalagilafu 17) *
16. Ngimba ikipanga kibaghile ukubatula bulebule abamumbumba ya uyu epusiwe?
16 Amukindilileghe ukubatula abandu aba mu mbumba ya uyu epusiwe. Abene bikulondiwa ulughano kangi nu kukasiwa fiyo pakabalilo aka. (Hib. 10:24, 25) Utubalilo tumo aba mumbumba iya uyu epusiwe bikuketa ukuti abakamu na balumbu bamo batikuyobesania nabo panongwa yakuti bikubaketa ukuti bope bepusiwe. Tutikulonda ukuti mo muno bipilikileghe. Tukulondiwa ukubakasya abakilumyana aba abapapi babo balekile ukumbombela Yehova. Maria uyu undume wake alyepusiwe kangi alindekile atile, “Bamo mwa bamanyani bangu balisile kunyumba yitu kangi bapiyile ifyakulya nu kulyela pampene, balindulile kangi twabombile pampene ukumanyila kwa pa mbumba. Bali nikitima fiyo. Bamfighililagha ku nkhani isyabutungulu isi abandu bamo bayobagha. Balingasisye fiyo.”—Rom. 12:13, 15.
17. Ngimba abakulumba babaghile ukubomba isyafiki ukuti babasubisye aba bikutamiwa na minong’ono?
17 Abakulumba bikulondiwa ukubakasya aba mumbumba ya mundu uyu epusiwe. Mukulondiwa ukukumbukila ukuti muli nubudindo ubwakubakasya nu kubasubisya aba mu mbumba ya mundu uyu unkamu wabo alekile ukumbombela Yehova. (1 Tes. 5:14) Muyeghe pankyeni ukubakasya bo ingomano sikali ukwanda kangi linga simalike. Mubendeleghe kunyumba syabo nu kwiputila nabo pampene. Mufumusyeghe nabo kangi mubakoleleghe ukuti mukabombele pampene ukumanyila kwa pambumba. Abakulumba bikulondiwa ukubafighilila bosa aba bikutamiwa na minong’ono nu kubanangisya ikisa nu lughano.—1 Tes. 2:7, 8.
TUNGAWAGHA AMAKA KANGI TUKINDILILEGHE UKUSUBILA MWA YEHOVA
18. Ukufwana na 2 Peteri 3:9, ngimba Kyala ikulonda ifiki ku bandu aba balekile ukumbombela?
18 Yehova “akighana ukuti bamo bapyutiweghe loli ighanile ukuti bosa balapeghe imbibi syabo.” (Belenga 2 Peteri 3:9.) Nalinga ukuti umundu abaghile ukubomba ubutulanongwa ubunywamu, loli ubumi bwake bukukindilila ukuya bwakulondiwa kwa Kyala. Tukumbukeghe ukuti Yehova atupele ikyabupe ikyapamwanya fiyo ikya Mwanake ukuya kitabulilo ku mundu aliwesa. Mwalughano Yehova ikubatula bosa aba balekile ukumbombela ukuti baghomokele kumyake. Umwene ali nulusubilo ukuti bikuya pakusala ukubomba isi bo muno tukuketela nkifwanikisyo kya Yesu ikya mwana unsobi. (Luka 15:11-32) Bosa aba balekile ubwanaloli bo akabalilo kakindilepo baghomokile kwa Tata witu walughano uwakumwanya. Kangi abakamu na balumbu babambilile mwalusekelo fiyo. Elizabeth uyu tunjobile pabwandilo ahobwike fiyo bo umwanake unnyambala aghomokile kangi kwa Yehova. Umwene atile, “Ndi walusekelo fiyo panongwa yakuti abakamu na balumbu bingi batukasyagha ukuti tungawagha amaka.”
19. Nongwa yafiki tubaghile ukukindilila ukuya nulusubilo kwa Yehova?
19 Tukindilileghe ukunsubila Yehova. Umwene ikutupa ubulongosi ubu bukututula akabalilo kosa. Yehova yo Tata walughano, ikupa kangi ali nikisa ku bandu bake. Tuli nulusubilo losa ukuti Yehova atikuya pakutuleka nalinga twaghane ni ndamyo. (Hib. 13:5, 6) Mark uyu tunjobile pabwandilo atile, ‘Yehova atisakutulekagha.’ Umwene ikuya pakukindilila ukututula nalinga po pakabalilo ka ndamyo.” Yehova ikuya pakukindilila kangi “ukutupa amaka amakindilisi.” (2 Kor. 4:7) Ukuyoba umwanaloli tubaghile ukukindilila ukuya nulwitiko kwa Yehova nalinga unkamu witu uyu tunganile alekile ukumbombela Kyala.
ULWIMBO 44 Lurombo lwa Munthu Wakusuzgika
^ ipal.5 Tukuya nikitima fiyo linga unkamu witu uyu tunganile alekile ukumbombela Yehova. Mu nkhani iyi tukuya pakuketa muno Yehova ikwipilikila linga isi sibombiwe. Tukuya pakumanyila isi aba mu mbumba ya uyu epusiwe babaghile ukubomba ukuti basubisiwe nu kukindilila ukuya nulwitiko lwa maka. Tukuya pakumanyila kangi muno aliwesa nkipanga abaghile ukubasubisyila nu kubatula aba mu mbumba iyi.
^ ipal.1 Ingamu simo sichenjile.
