1. Ngimba tubaghile ukunkolela Yehova ukuti yonani?

IMBUMBA ya Yehova iya babombi bake yikongelelapo Yesu uyu yo ‘wakipanda ku fipeliwa fyosa,’ na bandumi bingi. (Kolos. 1:15; Sal. 103:20) Bo Yesu ali pa kisu kyapasi umwene anangisye ukuti abandu aba bali nulwitiko babaghile ukunketa Yehova ukuya Wisabo. Bo ikuyoba na bafundiwa bake, Yesu ayobile isya Yehova ukuti ‘Tata, Uwisemwe.’ (Yoh. 20:17) Kangi linga twiyipile kwa Yehova nu kosiwa tukuya mu mbumba yalughano iya bakamu na balumbu.—Mar. 10:29, 30.

2. Ngimba tukuya pakumanyila isyafiki mu nkhani iyi?

² Bamo kukuya kukafu ukunketa Yehova ukuya yo Tata wa lughano. Abangi batikunangisya ulughano lwabo ku bakamu na balumbu. Mu nkhani iyi tukuya pakumanyila muno Yesu ikututulila ukuti tunketeghe Yehova ukuya yo Tata wa lughano uyu tubaghile ukuseghelela kumyake. Tukuya pakumanyila kangi muno tubaghile ukunkongela Yehova ukuti tunangisyeghe ukuti tukubinong’onela abakamu na balumbu.

3. Ngimba tukulondiwa ukwanda na masyu ghaliku linga tukwiputa ukuti tuseghelele kwa Yehova?

³ Yehova yo Tata walughano. Yesu ikulonda ukuti tunketeghe Yehova bo muno umwene ikunketela ukuya yo Tata walughano uyu ikubinong’onela abandu kangi wakisa. Tusimenye isi panongwa ya isi Yesu ababulile abafundiwa bake ukuti bayobeghe linga bikwiputa. Umwene alyandile na masyu aghakuti: ‘Tata witu.’ (Mat. 6:9) Yesu ngali ayobile ukuti twandeghe na masyu aghakuti ‘Umwene maka,’ ‘Umpeli,’ pamo ‘Umwalafyale wa bwila na bwila’ panongwa yakuti amasyu agha ghambaghile kangi ghalembiwe mu Baibolo. (Bwa. 49:25;  Yes. 40:28; 1 Tim. 1:17) M’malo mwake, atile tunjobeghe Yehova ukuti “Tata.”

4. Ngimba tukumanya bulebule ukuti Yehova ikulonda ukuti tuseghelele kumyake?

⁴ Ngimba mukuketa ukuti kukafu ukunketa Yehova ukuya yo Tata walughano? Bamo mo muno bikuketela. Linga tata witu akatunangisyagha ikisa kubaghile ukuya kukafu fiyo kumyitu ukwinong’onela isya tata uyu ali nulughano. Loli tukusubisiwa fiyo panongwa yakuti Yehova ikumanya muno tukwipilikila kangi isi sikutupangisya ukuti twipilikeghe bo ulu. Umwene ikulonda ukuya pabupipi nanuswe. Yonongwa yake Amasyu ghake ghikutukasya ukuti, ‘Amusegheleleghe kwa Kyala po yope isakuseghelelagha kumyinu.’ (Yak. 4:8) Yehova atughanile fiyo kangi umwene ikuya pakukindilila ukuya yo Tata unnunu fiyo ukukinda tata aliwesa.

5. Ukufwana na Luka 10:22, ngimba Yesu abaghile ukututula bulebule ukuseghelela kwa Yehova?

⁵ Yesu abaghile ukututula ukuti tuseghelele kwa Yehova. Umwene ammenye kanunu Yehova kangi ikunangisya utuyilo twake. Yonongwa yake ayobile ukuti, ‘Uyu linga ambwene une bo ambwene na Tata.’ (Yoh. 14:9) Yesu ikutumanyisya muno tubaghile ukungindikila nu kumpilikila Tata witu, muno tubaghile ukunhobosyela nu kuya nulwitiko kumyake. Yesu ikututula ukumanya ukuti Yehova ali ni kisa fiyo kangi walughano. (Belenga Luka 10:22.) Isagha twinong’onele ififwanikisyo fimo.

6. Yoba ififwanikisyo ifi fikunangisya ukuti Yehova ampilikisyagha Yesu.

⁶ Yehova ikupilikisya ku banake. Inong’onela muno Yehova apilikisyilagha ku Mwanake wakwanda. Yehova apilikisyagha inyiputo nyingi ukufuma ku Mwanake apa ali pa kisu. (Luka 5:16) Umwene alimpilikisye Yesu bo ikwiputa pakabalilo aka abasalagha abafundiwa bake 12. (Luka 6:12, 13) Kangi alimpilikisye apa Yesu iputagha bo aghene ni ndamyo. Bo Yuda ambikile ku balughu, Yesu aliputile kwa Tata wake isyakufwana na isi ayagha pakwaghana nasyo. Yehova akalimpilikisye itolo  Yesu bo ikwiputa loli umwene alintumile uwandumi ukuti akankasye Umwanake unganiwa.—Luka 22:41-44.

7. Ngimba tukwipilika bulebule ukumanya ukuti Yehova ikupilikisya inyiputo syitu?

⁷ Amasiku agha Yehova ikukindilila ukupilikisya inyiputo sya babombi bake nu kwamula pakabalilo kake. (Sal. 116:1, 2) Inong’onela muno alyamulile inyiputo sya mulumbu yumo uwa ku India. Umwene atamiwagha fiyo na minong’ono akabalilo kosa kangi aliputile ukufuma pasi pa ndumbula ukufwana ni ndamyo iyi ali nayo. Umulumbu uyu atile: “Ipulogilamu ya JW Broadcasting^® iya Meyi 2019 iyi yikulingania isi tubaghile ukubomba linga tukutamiwa na minong’ono, yalisile pakabalilo kake kangi yali ndulile fiyo. Yehova alyamwile inyiputo syangu.”

8. Ngimba mo munjila yiliku iyi Yehova anangisye ulughano lwake kwa Yesu?

⁸ Yehova atughanile kangi ikutupwelelela bo muno abombile na Yesu apa ali pa kisu kyapasi. (Yoh. 5:20) Umwene alintulile Yesu ukuya nulwitiko lwa maka, alinkasisye apa awile amaka kangi alimpele fyosa ifi alondiwagha pabumi bwake. Yehova alimbulile kangi Umwanake ukuti anganile kangi ikuhoboka nawe. (Mat. 3:16, 17) Yesu asyaghenie ukuti Tata wake wakumwanya Yehova walughano kangi ayagha pakuntula pabumi bwake.—Yoh. 8:16.

9. Ngimba findu fiki fikunangisya ukuti Yehova atughanile?

⁹ Mwakufwana itolo na Yesu, nanuswe tuketile ukuti Yehova atughanile munjila nyingi. Inong’onela isi: Yehova atukwabile kumyake kangi mwalughano atupele imbumba yamwambepo ukuti tuhobokeghe. (Yoh. 6:44) Ikutupa kangi ifyakulya fyamwambepo ukuti tuyeghe nulwitiko lwa maka. Yehova ikutupa kangi ifindu ifyakulondiwa pabumi bwitu. (Mat. 6:31, 32) Linga tukwinong’onela isya lughano lwake, ulughano lwitu kumyake lukuya lwa maka.

10. Ngimba tukumanyilapo isyafiki muno Yehova ikubombela ku bakamu na balumbu bitu?

¹⁰ Yehova abaghanile fiyo abakamu na balumbu bitu. Loli kubaghile ukuya kukafu fiyo kumyitu ukubanangisya ulughano, panongwa yakuti tukulile mu nyiho syakukindanakindana. Twesa tuli basita bugholofu kangi tubaghile ukubomba ifindu ifi fibaghile ukubakalalisya abangi. Panongwa ya isi, tubaghile ukukindilila ukukusya ulughano mu mbumba yitu iya mwambepo. Bulebule? Mwakunkonga Tata witu pakubanangisya ulughano abakamu na balumbu bitu. (Ef. 5:1, 2; 1 Yoh. 4:19) Isagha tukete isi tukumanyilako ku kifwanikisyo kya Yehova.

11. Ngimba Yesu akongile bulebule ikifwanikisyo kya Yehova ikya ‘lughano’?

¹¹ Yehova ali ‘nikibabilisi.’ (Luka 1:78) Umundu uyu ali nikibabilisi atikwipilika kanunu linga ikuketa abangi bikutamiwa, umwene ikughelaghela ukubombapo simo mwakubatula. Yesu abanangisyagha ikisa abandu bo muno Yehova ikubombela. (Yoh. 5:19) Isiku limo bo aketile ikilundilo kya bandu,’ ikisa kilinkumwagha namanga bakatele, banyambanike itolo ukuti ng’osi isi sikaya nuntimi.’ (Mat. 9:36) Yesu abombile nyingi isi syanangisyagha ukuti abinong’onelagha abandu. Umwene ababumbulusyagha ababine kangi abatulagha aba ‘bilikisiwe nifisito.’—Mat. 11:28-30; 14:14.

12. Yoba ikifwanikisyo ikya muno tubaghile ukunangisyila ikibabilisi ku bakamu na balumbu.

¹² Bo tukali ukunangisya ikibabilisi ku bakamu na balumbu bitu, tukulondiwa ukumanya tasi indamyo iyi baghene nayo. Mwakifwanikisyo, umulumbu abaghile ukubina fiyo.  Umwene akabaghila ukutubula indamyo iyi aghene nayo loli abaghile ukuhoboka fiyo linga yumo antulile. Ngimba ikufwanisya ukupwelelela imbumba yake? Ngimba tubaghile ukuntula ukupiya ifyakulya pamo ukutendekesya munyumba? Lumo unkamu imbombo yibaghile ukum’malikila. Tubaghile unkumpa indalama kisita kuyoba ukuti yifumile kumyitu, nu kukindilila ukuntula ukuti ayaghe imbombo iyingi.

13-14. Ngimba tubaghile ukunangisya bulebule ukupa bo Yehova?

¹³ Yehova ikupa. (Mat. 5:45) Tutikulondiwa ukughulila ukuti abakamu na balumbu basume tasi ubutuli po tubanangisyeghe ikisa. Mwakufwana itolo na Yehova tukulondiwa ukubombapo simo mwanakalinga. Umwene ikutupa ilisuba isiku lililyosa kisita kunsuma. Aliwesa ikusayiwa nilisuba ili bakaya babombi ba Kyala bene aba bikusayiwa nalyo. Ngimba mutikwitikisya ukuti Yehova ikunangisya ulughano lwake mwakutupa ifi tukulondiwa pabumi bwitu. Tunganile fiyo Yehova panongwa yakuti umwene ali nikisa kangi ikupa.

¹⁴ Mwakunkonga Tata witu wakumwanya, abakamu na balumbu bitu bingi bikunangisya indumbula yakupa. Mwakifwanikisyo, mu 2013, umbelo wamaka walyonangile ifindu fingi ku Philippines. Abakamu na balumbu bingi bakali na malo ghakwikala kangi katundu wabo ayongile. Loli imbumba iya mwambepo iya pa kisu kyosa yabatulile mwanakalinga. Abakamu na balumbu bingi babapele indalama nu kutendekesya inyumba isyakufwana 750 pa nkyinja kimokyene. Pakabalilo ka mbungo ya COVID-19, Abaketi ba Yehova baliyipile ukubatula abakamu na balumbu babo. Linga tukubombapo simo nakalinga mwakubatula abakamu na balumbu tukunangisya ukuti tubaghanile fiyo.

15-16. Ukufwana na Luka 6:36, ngimba njila yiliku inunu iyi tubaghile ukunkonga Tata witu wakumwanya?

¹⁵ Yehova wakisa kangi ikuhobokela. (Belenga Luka 6:36.) Umwene akabalilo kosa ikutunangisya ikisa. (Sal. 103:10-14) Abafundiwa ba Yesu bakali bagholofu loli abanangisye ikisa kangi abahobokelagha. Yesu abikile ubumi bwake ukuya ikemo ukuti atuhobokele imbibi  syitu. (1 Yoh. 2:1, 2) Ngimba mutikuseghelela kwa Yehova na Yesu panongwa yakuti bali nikisa kangi bikuhobokela?

¹⁶ Ulughano ulu tukunangisania lukuya lwa maka linga tukubahobokela abangi ukufuma pasi pandumbula. (Ef. 4:32) Ukuyoba ubwanaloli ukubahobokela abangi kubaghile ukuya kukafu utubalilo tumo, loli tukulondiwa ukughelaghela ukubomba isi. Umulumbu yumo abelengile inkhani yimo mu Ingasya ya Ndindilili iyi yikuyoba isya kuhobokela * ukufuma pasi pandumbula. Umwene atile, “Ukumanyila inkhani iyi kundulile fiyo ukuti m’manye ubununu ubwakubahobokela abangi. Yalingenie ukuti ukubahobokela abangi ukufuma pasi pandumbula kutikusanusya ukuti isi bakonangile sikakubaba. Loli sikusanusya ukuti linga ubahobokile abangi ungabakalalilagha kangi uyeghe nulutengano.” Linga tukubahobokela abakamu na balumbu bitu ukufuma pasi pandumbula tukunangisya ukuti tubaghanile kangi tukunkonga Tata witu Yehova.

17. Ukufwana na Matai 5:16, ngimba tubaghile ukungindika bulebule Tata witu wakumwanya?

¹⁷ Tukundaghisya fiyo ukuya mu mbumba iya bakamu na balumbu iya pa kisu kyosa aba bali nulughano. Kangi tukulonda ukuti abandu bingi bise mu mbumba iyi ukuti tumwiputeghe pampene Kyala witu. Yonongwa yake tutikulondiwa ukubomba kilikyosa iki kibaghile ukubapangisya abandu ukwinong’ona ifibibi ifyakufwana na Tata witu Yehova na babombi bake. Tukughelaghela ukunangisya akayilo akanunu, isi sikupangisya ukuti abandu bamanyileghe ubwanaloli nu kumbombela Yehova.—Belenga Matai 5:16.

18. Ngimba findu fiki fibaghile ukututula ukuti tungatilagha pakufumusya?

¹⁸ Utubalilo tumo abandu bamo babaghile ukutususya lumo nu kutufwima panongwa yakuti tukumpilikila Tata witu wakumwanya. Ngimba tubaghile ukubomba isyafiki linga tukutila ukubabula abangi isyakufwana nulusubilo lwitu? Tubaghile ukunsubila Yehova nu Mwanake ukuti bikuya pakukutula.  Yesu ababulile abafundiwa bake ukuti bangapasyagha muno bayagha pakuyobela na isi bayagha pakuyoba. Nongwa yafiki? Panongwa yakuti Yesu alingenie ukuti ‘Buno mwisakupeghiwagha nkabalilo kako isi mwisakuyobagha,’ kangi atile ‘namanga mukaya yo umwe mukuyoba loli yo mbepo wa Wisemwe uyu ikwakuyobagha nkati myinu.’—Mat. 10:19, 20.

19. Yoba ikifwanikisyo ikya mundu yumo uyu afumwisye mwabukifu.

¹⁹ Inong’onela ikifwanikisyo kya nkamu Robert. Akabalilo ka kunyuma bo ikumanyila Amasyu gha Kyala kangi akasimenye nyingi isyakufwana ni Baibolo, babukile nawe ku khoti ukuti akalinganie inongwa iyi ikukana ukuya nsilikali ku South Africa. Mwabukifu umwene alingenie ukuti, akalondagha ukweghapo ikighaba panongwa ya lughano ulu abakamu na balumbu balinangisye. Kangi umwene anangisye ukuti andaghisyagha imbumba yitu iya mwambepo. “Mwakunyomosya undongi alindalusisye ukuti, abakamu bako bo baliku? Robert akaghulilagha ilalusyo bo ili loli umwene akumbukile ilemba lya isiku lila pakabalilo kala. Lyali lemba lya Matai 12:50 ili likuti, ‘Namanga wesa uyu ikubomba ubwighane bwa Tata, uyu ali kumwanya, yo nnughuna wangu, yo ilumbu wangu kangi yo mama.’ Nalinga ukuti Robert amanyilagha itolo Ibaibolo loli mbepo wa Yehova wali ntulile ukwamula ilalusyo lila na ghangi. Yehova ahobwike fiyo na Robert. Kangi umwene ikuhoboka fiyo nanuswe linga tukunsubila nu kufumusya mwabukifu pakabalilo ka ndamyo.

20. Ngimba tukulondiwa ukukindilila ukubomba isyafiki? (Yoh. 17:11, 15)

²⁰ Isagha tukindilileghe ukundaghisya ulusako ulu tuli nalo ulwakuya mu mbumba ya mwambepo. Tuli na Tata witu unnunu fiyo na bakamu na balumbu bingi aba batughanile. Tukulondiwa ukundaghisya akabalilo kosa. Setano na bandu bake bikughelaghela ukuti tukayikileghe ukuti Yehova atughanile kangi ikulonda ukonanga ukukolelana kwitu. Yesu aliputile kwa Tata witu ukuti atufighilileghe. (Belenga Yohani 17:11, 15.) Yehova ikwamula ulwiputo ulu. Mwakufwana itolo na Yesu tutikulondiwa ukukayikila isya lughano nu butuli ubwakufuma kwa Tata witu wakumwanya. Isagha tukindilileghe ukuseghelela ku mbumba yitu iya mwambepo.