Ngimba Muli na Minong’ono Gha Yehova?
“Mwanduliweghe itolo nubupya bwa nyinong’ono syinu.”—ROM. 12:2.
INYIMBO: 56, 123
1, 2. Linga tukuseghelela fiyo kwa Yehova, ngimba tukumanyila ukubomba isyafiki? Yoba ikifwanikisyo.
INONG’ONELA ukuti umundu yumo ampele umwana ikyabupe. Abapapi bake bikumbula ukuti, “Yoba ukuti ndagha.” Umwana yula ayobile ukuti ndagha panongwa yakuti abuliwe ukubomba bo ulu. Loli linga umwana ikukula, ikwanda ukupilikisya inongwa iyi abapapi bake bambulilagha ukuti kununu ukundaghisya linga umundu yumo akubombile inunu. Yonongwa yake akabalilo kosa ikwanda ukundaghisya abangi panongwa yakuti amanyisiwe kanunu.
2 Mwakufwana itolo, bo twandile ukum’manya Yehova twamanyile ukulondiwa kwa kupilikila indaghilo syake. Loli bo twandile ukuseghelela fiyo kwa Yehova, twamanyile isyamuno ikwinong’onela, isi asighanile na isi asibengile kangi namuno ikufiketela ifindu. Linga tukwitikisya aminong’ono gha Yehova ukuti ghatulongosyeghe pa fyakubomba ni fyakusala fyitu, tubaghile ukuya naminong’ono gha Yehova.
3. Nongwa yafiki kubaghile ukuya kukafu ukufiketa ifindu bo muno Yehova ikufiketela?
3 Nalinga ukuti tukuhoboka ukumanyila ukwinong’ona bo muno Yehova ikwinong’onela loli utubalilo tumo kukuya kukafu ukuketa ifindu bo muno umwene ikufiketela panongwa yakuti tuli basitabugholofu. Mwakifwanikisyo, tusimenye muno Yehova ikubuketela ubulowe, ikyuma, imbombo yakufumusya, ukuleka ukubombesyela kanunu ilopa ni findu ifingi. Loli kubaghile ukuya kukafu kumyitu ukupilikisya inongwa iyi Yehova ikufiketela munjila bo iyi. Loli ngimba tubaghile ukumanyila bulebule ukwinong’ona bo muno Yehova ikwinong’onela? Kangi isi sibaghile ukututula bulebule ukusala kanunu ifyakubomba lino na nkyeni?
MUNO TUBAGHILE UKUYILA NAMINONG’ONO GHA YEHOVA
4. Ngimba ubulongosi bwa Pauli ubwakuti ukuya ‘Nubupya bwa nyinong’ono syinu’ bukusanusya isyafiki?
4 Belenga Baroma 12:2. Umfundiwa Pauli alingenie isi tukulondiwa ukubomba ukuti tumanyile ukufiketa ifindu bo muno Yehova ikufiketela. Umwene atile tukulondiwa ukuleka “ukwifwanikisya ni kisu iki.” Ukufwana namuno twamanyilile mu nkhani iyi yakindagha, isi sikusanusya ukuti tukulondiwa ukukana ifyakubomba ifya nkisu iki naminong’ono ghake. Kangi Pauli atile tukulondiwa ukuya ‘nubupya bwa nyinong’ono syitu.’ Isi sikongelelapo ukumanyila Amasyu gha Kyala, ukupilikisya aminong’ono ghake, ukwinong’onelapo pa isi tukumanyila nukughelaghela ukuketa ifindu bo muno umwene ikufiketela.
5. Ngimba ukumanyila findu fiki?
5 Ukumanyila kukongelapo fingi ukukinda ukubelenga itolo inkhani pamo ukugwala umzele pa maansala gha malalusyo. Linga tukumanyila, tukulondiwa ukwinong’onelapo isi tukubelenga, isi sikuyoba isya Yehova, muno ikubombela ifindu mu njila yimo namuno ikwinong’onela. Tukulondiwa ukupilikisya inongwa iyi Yehova ikutubulila ukubomba ifindu fimo kangi ninongwa iyi ikutukanisyila ukubomba ifindu ifingi. Tukulondiwa kangi ukwinong’onelapo muno tubaghile ukukongela ifi tukumanyila mwakuchenja isi tukubomba namuno tukwinong’onela. Nalinga utubalilo tumo kubaghile ukuya kukafu ukukonga ifundo syosa isi tukumanyila loli kwakulondiwa ukuya na kabalilo akakumanyila nukwinong’onelapo pa isi tukubelenga.—Sal. 119:97; 1 Tim. 4:15.
6. Ngimba findu fiki fikubombiwa linga tukwinong’onelapo pa Masyu gha Kyala?
6 Linga akabalilo kosa tukwinong’onelapo Amasyu gha Kyala, tukuya nubumanyi. Ngimba tukuya nubumanyi buliku? ‘Tukwisimikisyila twibene,’ ukuti aminong’ono gha Yehova magholofu akabalilo kosa. Linga tukwinong’onelapo tukwanda ukupilikisya muno umwene ikufiketela ifindu kangi tukukolelana ni fundo syake. Isi sikututula ukuya ‘naminong’ono amanunu,’ kangi tukwanda ukwinong’ona munjila inunu. Panandinapanandi tukwanda ukuya naminong’ono bo agha Yehova.
AMINONG’ONO GHITU GHIKUPALAMASYA IFYAKUBOMBA FYITU
7, 8. (a) Ngimba Yehova ikufiketa bulebule ifindu ifyakumbili? (Keta ikithuzi ikyakwanda.) (b) Linga tukuketa ifindu ifyakumbili bo muno Yehova ikufiketela, ngimba findu fiki fikuya pakuya fyakulondiwa fiyo kumyitu?
7 Aminong’ono ghitu ghatikupalamasiwa pene pa muno tukwipilikila loli na isi tukubomba. (Mar. 7:21-23; Yak. 2:17) Ukuti tupilikisye kanunu ifundo iyi isagha twinong’onelepo ififwanikisyo fimo. Ikifwanikisyo kimo kikwaghiwa mu nkhani iyakuyoba isya kupapiwa kwa Yesu iki kikunangisya muno Yehova ikufiketela ifindu. Kyala alinsalile Yosefu na Maria ukuti bandele Umwanake nalinga ukuti bakali nindalama nyingi. (Levi. 12:8; Luka 2:24) Bo Yesu apapiwe, Maria “alikunniembetelela m’myenda, alinkundambalika nkipondo, papo ubuyo bukalimo nnyumba ya bahesya.” (Luka 2:7) Linga Yehova alondagha, ngali apangisye ukuti Yesu apapiliwe pa malo amanunu. Loli Umwene alondagha ukuti Yesu akulile mumbumba iyi yambikagha Kyala pa malo ghakwanda. Isi syo syali syakulondiwa fiyo kwa Yehova.
8 Inkhani iyakuyoba isya kupapiwa kwa Yesu yikutumanyisya muno Yehova ikufiketela ifindu. Abapapi bamo bikulonda ukuti abanabo baye nifindu ifyapamwanya fiyo nalinga ukuti fibaghile ukonanga ubumanyani bwabo na Yehova. Loli Yehova ikuketa ubumanyani bwitu numwene ukuya kindu kyakulondiwa fiyo. Ngimba mukwitikisya ukuketa ifindu ifyakumbili bo muno Yehova ikufiketela? Ngimba ifi tukubomba fikunangisya isyafiki isya uswe?—Belenga Bahiburi 13:5.
9, 10. Ngimba tubaghile ukunangisya bulebule ukuti tukuketa abangi ukufwana namuno Yehova ikubaketela?
9 Ikifwanikisyo ikingi, momuno Yehova ikunketela umundu uyu ikubasofya abangi mwa kubapangisya ukuti batule inongwa kangi baleka ukumbombela Yehova. Yesu atile: ‘Uyu linga ikunsofya yumo uwa banandi aba bikunyitika une, kwayagha kununupo ukunkungilila ulwala m’makosi nukuntagha munyanja.’ (Mar. 9:42) Apa, Yesu aketagha ukuti ukusofya abangi yali nkhani nywamu fiyo panongwa yakuti abombagha ifindu bo Tata wake. Tuli nulusubilo losa ukuti Yehova yope ikuyiketa inkhani iyi ukuya nywamu linga umundu yumo ikubomba ifindu ifi fikusofania aba bikunkonga Yesu.—Yoh. 14:9.
10 Ngimba tukuketa abangi munjila iyi Yehova na Yesu bikuketela? Ngimba ifi tukubomba fikunangisya isyafiki isya uswe? Mwakifwanikisyo, lumo tubaghile ukunyonywa isitayelo ya mwenda ghumo pamo ukwimoghesya. Loli ngimba tukulondiwa ukubomba isyafiki linga tusyaghenie ukuti isitayelo ya mwenda ughu tukulonda yibaghile ukubakalalisya abangi nkipanga pamo ukubapangisya ukuya naminong’ono amabibi aghabulowe? Ngimba ulughano lwitu ku bakamu na balumbu lubaghile ukutupangisya ukuti tuleka isitayelo ya mwenda ughu tukulonda?—1 Tim. 2:9, 10.
11, 12. Ngimba tukuya pakufighililiwa bulebule linga tukumanyila ukufibenga ifi Yehova afibengile nukukindilila ukuya bakwikola?
11 Ikifwanikisyo ikyabutatu: Yehova abubengile ubusitabugholofu. (Yes. 61:8) Bwanaloli ukuti Yehova asimenye ukuti utubalilo tumo kukuya kukafu ukuti tubombe inunu panongwa yakuti tukaya bagholofu. Nalinga mo siyilile, umwene ikulonda ukuti uswe twinong’oneghe ukufwana namuno umwene ikwinong’onela kangi tusibengeghe imbibi. (Belenga Salimo 97:10.) Linga tukwinong’onela inongwa iyi Yehova ikufibengela ifindu ifibibi, kubaghile ukututula ukuketa ifindu bo muno umwene ikufiketela kangi abaghile ukututula ukuti tuleke ukubomba kilikyosa ikibibi.
12 Linga tumanyile ukufibenga ifibibi, kubaghile ukututula ukumanya ukuti ifindu fimo fibibi nalinga ukuti Ibaibolo litikuyobapo nasimo isya nkhani iyo. Mwakifwanikisyo, inyimbo sya lapu (lap dancing) sikwaghiwa paliposa nkisu iki. Bamo babaghile ukuketa ukuti sikafwana nukupanga ubulowe nu mundu yumo, yonongwa yake bikwinong’ona ukuti bakabaghila ukuleka ukupilikisya. * Loli ngimba momuno Yehova ikuyiketela inkhani iyi? Tungibwagha ukuti Yehova afibengile ifindu fyosa ifibibi. Po lelo isagha tuyeghe kubutali nifindu fyosa ifibibi mwa kumanyila ukuya bakwikola nukufibenga ifindu ifi Yehova afibengile.—Rom. 12:9.
INONG’ONELA LINO ISI MUKUYA PAKUBOMBA NKYENI
13. Nongwa yafiki tukulondiwa ikwinong’onelapo bo muno Yehova ikufiketela ifindu lino ukuti tusasale kanunu ifindu nkyeni?
13 Linga tukumanyila, tukulondiwa ukwinong’onela muno Yehova ikufiketela ifindu panongwa yakuti fibaghile ukututula ukuti tusasale kanunu ifindu nkyeni. Yonongwa yake linga twaghene nubutolwe, tubaghile ukwitendekesya nukumanya isi tukulondiwa ukubomba mwanakalinga. (Mbupi. 22:3) Isagha twinong’onelepo ififwanikisyo fimo ifya mu Baibolo.
14. Ngimba tukumanyilako isyafiki kwa Yosefu muno alimwamulile unkasi wa Potifari?
14 Pakabalilo aka unkasi wa Potifari ankopagha Yosefu ukuti aghone nawe, mwanakalinga abopile. Kisita kukayika Yosefu inong’onelagha muno Yehova ikuketela ubweghi. (Belenga Ubwandilo 39:8, 9.) Yosefu alimbulile unkasi wa Potifari ukuti: “Po natighi mbombeghe bulebule isya buniongafu ubukulumba bo bububu nukutula inongwa kwa Kyala?” Isi sikunangisya ukuti Yosefu aketagha ifindu muno Yehova afiketelagha. Bule ukuyoba isya uswe? Ngimba mubaghile ukubomba isyafiki linga uyu mukubomba nawe imbombo andile ukubakopa? Pamo bule linga umundu yumo abatumile imeseji iyakuyoba ifyakughonana pamo ikithuzi pa foni yinu? * Kubaghile ukuya kupepe ukukindilila ukuya basubiliwa kwa Yehova linga tumanyile nukwitikisya aminong’ono ghake pankhani bo isi kangi nukusala ikyakubomba pankhani iyi.
15. Ngimba tubaghile ukuya nulwitiko bulebule mwa Yehova bo muno babombile Abahiburi batatu?
15 Inong’onela kangi isya kifwanikisyo kya Bahiburi batatu aba ingamu syabo bali Shadereki, Mesheki na Abedinego. Bo Mwalafyale Nebukadinezara ababulile ukuti biputeghe ikifwani iki apangile, abene bakanile. Isi balyamwile kwa Mwalafyale syanangisye ukuti bali nulwitiko kwa Yehova. (Levi. 20:4, 5; Dan. 3:4-6, 12, 16-18) Bule uswe amasiku agha? Ngimba tubaghile ukubomba isyafiki linga bwana witu ikutubula ukuti tubike indalama ukuti yitule pakyakusekela iki kitikukolelana nu kwiputa kwa bwanaloli? M’malo mwakughulila ukuti isi sibombiwe, ngimba tukabaghila ukwinong’onelapo mwanakalinga muno Yehova ikufiketela ifyakubombiwa bo ifi? Linga twaghene nifyakubombiwa bo ifi, kubaghile ukuya kupepe kumyitu ukubomba nu kuyoba ifindu fya bwanaloli bo muno babombile Abahiburi batatu.
Ngimba mufufuzile kanunu isi mukulonda ukuyobesania na dokotala winu pankhani ya mikota? (Keta ipalagilafu 16)
16. Ngimba ukupilikisya kanunu aminong’ono gha Yehova kubaghile ukututula bulebule ukuti twitendekesye linga tubinile?
16 Linga tukukonga aminong’ono gha Yehova sibaghile ukututula kangi ukuti tuye basubiliwa kumyake linga tubinile. Momumo, tukuketa ukuti tutikulondiwa ukubikiwa ilopa, pamo ifighaba 4 ifinywamu ifya ilopa. (Imbo. 15:28, 29) Loli pali injila simo isyakubumbulusyila isi sikulondiwa ukuti Unkristu aliwesa asale mwene ukufwana nifundo sya mu Baibolo. Ngimba po pakabalilo kaliku akanunu akakwinong’onelapo ukubomba isi? Ngimba tubagile ukusala ifyakubomba pakabalilo aka tuli ku chipatala pamo tukwipilika ifyakubaba kangi tukutamiwa naminong’ono? Hayi. Lino ko kabalilo aka tukulondiwa ukufufuza kanunu isi tukulonda ukuyobesania na dokotala witu pankhani ya mikota. *
17-19. Nongwa yafiki kwakulondiwa fiyo ukumanyila muno Yehova ikufiketela ifindu lino? Yoba ikifwanikisyo.
17 Pabumalilo, inong’onela muno Yesu alimwamulile Peteri bo ikumpa ubulongosi ubwakuti: “Syomma we Mwalafyale, syo fikuti singakwaghagha sisisi.” Akabalilo kosa Yesu akongagha isi Kyala alondagha ukuti umwene abombeghe kangi nukufwanisya ubusololi bwakuyoba isyabumi bwake kangi nisya nifwa yake pakisu. Ukubomba bo isi kwalinkasisye ukuti aye nulwitiko mwa Yehova kangi nukubika ubumi bwake ukuya ikemo ku bandu bosa.—Belenga Matai 16:21-23.
18 Amasiku agha, Yehova ikulonda ukuti tuye bamanyani bake nukubomba imbombo yake iyakufumusya amasyu amanunu. (Mat. 6:33; 28:19, 20; Yak. 4:8) Ukufwana namuno Peteri abombile kwa Yesu, abandu bamo babaghile ukughelaghela ukutuwisya amaka ukuti tuleke ukubomba inunu. Mwakifwanikisyo, bule linga bwana winu ababulile ukuti ikuya pakubapa imbombo iyi yibaghile ukubapangisya ukuti mwambilileghe indalama nyingi loli yibaghile ukubapangisya ukuti mungayagha na kabalilo kakubuka kungomano pamo ukufumusya pampene nikipanga? Pamo linga muli pa sukulu, mupeliwe ulusako lwakusokapo pakaya nukubuka kusukulu iyingi ukuti mukongelelepo ifimanyilo ifyapamwanya. Linga ifi fibombiwe, ngimba mubaghile ukwiputa, ukufufuza, ukuyobesania na ba mumbumba yinu pamo ukusuma ubutuli ku bakulumba bo mukali ukusala ifyakubomba? Kununu fiyo linga mukumanyila muno Yehova ikufiketela ifindu lino kangi nukuya naminong’ono ghake. Linga tukukindilila ukubomba bo isi, kubaghile ukututula ukuti tungagheliwagha. Mubaghile ukumanya kanunu isi mukulondiwa ukubomba panongwa yakuti musalile kale ukuti mumbombeleghe Yehova.
19 Mukulondiwa ukwinong’onela kangi ifyakubombiwa ifingi ifi fibaghile ukughela ulusubilo lwinu mwa Yehova. Bwanaloli ukuti tukabaghila ukwitendekesya ifyakubombiwa filifyosa ifi fibaghile ukutwagha. Linga tukubombesyela akabalilo kitu akakumanyilila pa twibene ukwinong’onela isya Yehova, sibaghile ukututula ukuti tukumbukileghe ifi tumanyile nukuti tusaleghe kanunu pakyakubombiwa kilikyosa. Linga tukumanyila, tukulondiwa ukuketa muno Yehova ikufiketela ifindu nukuya naminong’ono bo aghake kangi nukwinong’onelapo muno sibaghile ukututulila lino na nkyeni.
AMINONG’ONO GHA YEHOVA NUBUMI BWINU BWA NKYENI
20, 21. (a) Nongwa yafiki tukwisa kuya babuke na balusekelo nkisu ikipya ? (b) Ngimba amasiku agha tubaghile ukuhoboka bulebule nu bumi?
20 Twesa tukulindilila ikisu ikipya. Bingi ba uswe tuli nulusubilo lwa kwikala mpaladaiso pakisu bwila na bwila. Mu Bunyafyale bwa Kyala, tukwisa kwabuliwa ku fyakubaba nindamyo isi tukwaghana nasyo nkisu iki. Kangi nkisu ikipya tukwisa kuya nubwabuke bwakusala ifyakuhobosya ifi tukulonda.
21 Loli isi sitikusanusya ukuti ubwabuke bwitu butisakuya numpaka. Abandu abatengamoyo aba bisakuya nkisu ikipya, linga bikulonda ukusala ifyakubomba, bisakubombagha ukufwana nindaghilo kangi naminong’ono gha Yehova. Kangi isi sisakutwalagha ubuhobofu nulutengano. (Sal. 37:11) Nalinga akabalilo aka kakali ukufika loli tubaghile ukuya balusekelo mwakuya naminong’ono gha Yehova.
^ ipal.12 Inyimbo sya Lapu kyo “kyakubombiwa iki uyu ikuvina ikufwala mwakukosya isoni kangi linga ikuvina ikwikala pamwanya pa mundu uyungi nukwanda ukuvina mwakukosya isoni.” Fikweghela namuno inkhani yiyilile, panongwa yakuti isi sifwene itolo nukubomba ubulowe kangi kwakulondiwa ukuti abakulumba bapange ikomiti yabulongi. Unkristu uyu ikubomba isi, ikulondiwa ukusuma ubutuli ukufuma ku bakulumba.—Yak. 5: 14, 15.
^ ipal.14 Ukutumilana amameseji, ivithuzi na mavidiyo gha bulowe pa foni fyo findu fyamwiko. Linga umundu ikubomba isi, abakulumba bikulondiwa ukuti bapange ikomiti ya bulongi. Mfyakubombiwa fimo, iboma likweghapo ikighaba ukubalonga abalumyana na balindwana aba bikutumilana amameseji ghamwiko. Ukuti mumanye nyingi, buka pa jw.org webusayiti kangi belenga umutu wakuti “Zimene Achinyamata Amadzifunsa—Kodi Ndiyenera Kudziwa Zotani pa Nkhani Yotumizirana Mameseji Ndi Zinthu Zina Zolaula?” (Keta pa ZIMENE BAIBULO LIMAPHUNZITSA > ACHINYAMATA.) Pamo keta umutu wakuti “Kukambirana Ndi Mwana Wanu Nkhani Yotumizirana Zinthu Zolaula Pafoni” mu Galamukani! nkhani ya Novembala 2013, peji 4-5.
^ ipal.16 Ukuti mumanye nyingi. Keta, ibuku lyakuti, Muno Tubaghile Ukukindilila Ukuya Ndughano Lwa Kyala, pa peji 246- 249.
