LISA atile, “ikisa iki abakamu na balumbu ba Chikristu bikunangisya kikumbalamasya fiyo.” * Umwene ayobagha isi syalimpangisye ukuti ande ukumanyila ubwanaloli. Isi sifwene itolo na isi Anne ayobile, umwene atile, “Nalyandile ukumanyila ubwanaloli panongwa yakuti Abaketi bali bakisa, kisita kwinong’onelako isi bamanyisyagha.” Abalumbu bosa aba, lino bikuhoboka ukubelenga Ibaibolo nu kukonga isi bikubelenga, loli ikisa kyo kyabatulile fiyo.

Ngimba tubaghile ukunangisya bulebule ikisa iki kibaghile ukubakasya abangi? Isagha tuyobesanie injila sibili: ukwendela mu isi tukuyoba na isi tukubomba. Ukufuma apo tukuya pakuyobesania isya bandu aba tukulondiwa ukubanangisya ikisa.

Unkikulu wamahala uyu ikuyobiwa pa Isya Mbupingamu chaputala 31 “ikunangisya ikisa” ukwendela mu isi ikuyoba. (Mbu. 31:26) Umwene ikwitikisya “indaghilo” ukuti sindongosyeghe pa isi ikuyoba. Abatata bope bikulondiwa ukukonga “indaghilo” pa isi bikuyoba. Abapapi bingi bikumanya ukuti ukuyoba mwabukali kubaghile ukubafulasya abanabo kangi abanabo bakabaghila ukupilikisya ku isi bikubabula. Yonongwa kale linga abapapi bikuyoba mwakisa, kubaghile ukuya kupepe ku banabo ukubapilikila.

Kali muli mpapi pamo hayi, ngimba mubaghile ukubomba bulebule ukuti muyobeghe mwakisa? Tukughagha amasakisyo kukighaba ikyakwanda kwa ilemba lya Isya Mbupingamu 31:26 apa pikuti: “Apa linga ikuyoba, ikuyoba na mahala fiyo.” Isi sikongelelapo ukusala amasyu amanunu nu kuyoba mwamahala. Yonongwa yake tukulondiwa ukwilalusya ukuti, ‘Ngimba isi nguya pakuyoba sikuya pakubakalalisya abangi pamo sikuya pakukasya ulutengano?’ (Mbu. 15:1) Bwanaloli ukuti tukulondiwa ukwinong’onelapo tasi bo tukali ukuyoba.

Amasyu aghangi gha pa Isya Mbupingamu ghikuti: “Amasyu gha mundu unkonyofu ghikulasa bo lu lubo.” (Mbu. 12:18) Linga tukwinong’onela muno amasyu agha tukuyoba ghabaghile ukubapalamasyila abangi, sibaghile ukututula ukwikola pa isi tukuyoba. Bwanaloli ukuti linga tukuyoba “mwakisa” tutikuya pakubombela amasyu aghakufulasya pamo ukuyoba kisita kisa. (Ef. 4:31, 32) Tungayobagha amasyu amabibi loli tuyobeghe mwakisa na mbololo. Yehova anangisye ikifwanikisyo ikinunu pa nkhani iyi pakabalilo aka alinsimikisyile umbombi wake Eliya uyu ali nubogha. Uwandumi wa Yehova ayobile nawe ‘mbololo.’ (1 Banyaf. 19:12) Loli ukuya wakisa kukongelelapo nyingi ukukinda itolo ukuyoba mwakisa. Tukulondiwa kangi ukubomba ifindu mwakisa. Bulebule?

Tukunkonga Yehova mwakuyoba nukubomba ifindu mwakisa. (Ef. 4:32; 5:1, 2) Lisa, uyu tunjobile pakwanda, alingenie muno Abaketi balinnangisyile ikisa. Umwene atile, “Bo imbumba yitu bayibulile ukuti yisame, mwanakalinga imbumba sibili isya ku kipanga syalyeghile holide ku mbombo ukuti situtule ukusama. Pakabalilo aka, bo ngali  ukwanda ukumanyila Ibaibolo.” Ikisa iki babanangisye kyalimpangisye Lisa ukuti ande ukumanyila ubwanaloli.

Anne, uyu tunjobile kubwandilo bwa nkhani iyi yope andaghisye fiyo panongwa ya kisa iki Abaketi balinnangisye. Umwene atile: “Panongwa ya muno abandu aba nkisu bambombelagha ifindu, kwali kukafu kumyangu ukuti mbasubileghe. Akindilile ukuyoba ukuti: “Bo naghene na Baketi, ngabasubile. Loli nalilalusisye ukuti, ‘Nongwa yafiki bikunnangisya ulusekelo?’ Loli ikisa kya mmanyisi wangu wa Baibolo kyalimbangisye ukuti nande ukunsubila.” Ngimba ifyakukongapo fyake ifinunu fyali fyo filiku? Umwene atile, “Bo akabalilo kakindilepo, nalyandile ukwinong’onela fiyo isi namanyilagha.”

Tubaghile ukuketa ukuti Lisa na Anne bakasiwe fiyo panongwa yakuti abandu nkipanga bababombelagha ifindu mwalughano kangi mwakisa. Isi syabatulile ukuti bande ukumanyila ubwanaloli. Ikisa iki abakamu na balumbu babanangisyagha, kyabatulile ukuti bande ukunsubila Yehova na babombi bake.

Bamo kubaghile ukuya kupepe ukuyoba mwakisa nu kumwemwetela panongwa yakuno bakulile. Syakukasya fiyo ukuti abandu bamo bikukasiwa ukuti banangisyeghe ulughindiko panongwa ya nyiho syabo. Loli linga tukubomba isi pene panongwa ya nyiho, tukabaghila ukunkonga Kyala pa nkhani yakunangisya ikisa.—Fwanikisya na Imbombo sya Batumiwa 28:2.

Bwanaloli ukuti ikisa lo lumo mwa seke sya mbepo mwikemo wa Kyala. (Gal. 5:22, 23) Isi sikunangisya ukuti tukulondiwa mbepo mwikemo wa Kyala ukuti ghututule ukubanangisya ikisa abangi. Linga tukubomba isi, tukuya pakunkonga Yehova na Yesu. Kangi mwakufwana itolo na Yesu, tukuhoboka fiyo na bangi. Yonongwa yake tukukasiwa fiyo nulughano lwa Yehova Kyala nulwa bandu abangi. Akayilo kyitu akakubanangisya abangi ikisa kikufuma mundumbula kangi Kyala ikuhoboka nako.

Kubaghile ukuya kupepe ukubanangisya ikisa aba bikutunangisya ikisa pamo aba tubamenye. (2 Samu. 2:6) Injila yimo ko kubandaghisya. (Kolos. 3:15) Loli bule linga tukuketa ukuti umundu yumo atikulondiwa ukuti tunnangisye ikisa?

Inong’onela isi: Yehova ikunangisya ikifwanikisyo ikinunu fiyo ikyakubanangisya abangi ikisa kangi amasyu ghake ghikutumanyisya ukulondiwa ukwakunangisya akayilo aka. Amasyu aghakuti “ikisa” baghabombile amalo mingi mu Malemba gha mu Kigiriki. Ngimba Yehova ikutunangisya bulebule ikisa?

Yehova ikubanangisya ikisa abandu bosa mwakubapa ifindu ifi bikulondiwa ukuti bakindilileghe ukuya nu bumi. (Mat. 5:45) Kangi bo tukali ukummanya Yehova, umwene atunangisyagha ikisa. (Ef. 2:4, 5, 8) Mwakifwanikisyo, atupele umwanake yumoywene unganiwa. Untumiwa Pauli alembile ukuti Yehova atupele ikitabulilo panongwa ‘ya bwingi bwa kisa kyake.’ (Ef. 1:7) Mwakongelelapo, nalinga ukuti tukubomba ubutulanongwa nu kunkalalisya Yehova loli ikukindilila ukutulongosya nu kutumanyisya. Ifundo na masyu ghake ghali bo “yi fula iyi yikuwa.” (Kukumbu. 32:2) Bwanaloli ukuti tukabaghila ukungomokesya ikisa iki ikutunangisya. Kangi tusimenye ukuti linga Yehova atikutunangisya ikisa, tukabaghila ukuya nulusubilo lwa nkyeni.—Fwanikisya na 1 Peteri 1:13.

Kisita kukayika, tukukasiwa fiyo na muno Yehova ikunangisyila ikisa. Yonongwa yake, mmalo mwakubanangisya itolo ikisa abandu banandi, tukulondiwa ukughelaghela ukunkonga Yehova mwakubanangisya ikisa abandu bosa isiku lililyosa. (1 Tes. 5:15) Linga tukukindilila ukubanangisya abangi ikisa, tukufwana itolo nikilungula kya moto nkabalilo akatalalano. Tukubakasya fiyo aba mumbumba yitu, Abakristu abinitu, aba tukubomba nabo imbombo, aba tukumanyila nabo isukulu na bapalamani bitu.

Amwinong’onele isya ba mumbumba yinu pamo nkipanga aba babaghile ukusayiwa panongwa yakuyoba nu kubabombela ifindu mwakisa. Lumo abaghile ukuyamo umundu yumo nkipanga kyinu uyu ikulondiwa ubutuli ukuti apwelelele akaya kake pamo ukubomba imbombo yimo bo ukula ifindu. Mwakongelelapo, linga mwaghene nu mundu yumo mubufumusi uyu ikulondiwa ubutuli, ngimba mubaghile ukuntula munjila yimo?

Mwakunkonga Yehova, utubalilo tosa amasyu ni fyakubomba fyitu fiyeghe fya “kisa.”