Ifindu ifyakulondiwa, bo inyumba pamo igalimoto fikulondiwa ukufipwelelela fiyo. Mwakufwana itolo, ubumanyani bwinu na Kyala mukulondiwa ukubupwelelela fiyo. Ngimba mukuya pakubomba isyafiki ukuti mukindilileghe ukukasya ubumanyani bwinu na Kyala linga mosiwe?

Isi sili mu nkhani iyi

•  Amukindilileghe ukumanyila Amasyu gha Kyala

•  Amukindilileghe ukwiputa kwa Yehova

•  Amukindilileghe ukubabulako abininu isi mukusubila

•  Amukindilileghe ukwaghiwapo pangomano sya Bukristu

 Ilemba ili likukolelana ni fundo iyi: “Mukindilileghe ukupa iseke mumbombo syosa inunu, nukongelapo ukummanya Kyala.”—Bakolosi 1:10.

 Isi sikusanusya ukuti: Linga mosiwe, mukulondiwa ukukindilila ukubelenga Ibaibolo nukwinong’onelapo pa isi mumayile.—Salimo 25:4; 119:97.

 Isi sibaghile ukubombiwa: Utubalilo tumo, mubaghile ukuwa amaka ukuti mubelenge Ibaibolo. Lumo mubaghile ukuyoba ukuti “une ifyakubelenga ngafighana.

 Isi mukulondiwa ukubomba: Amumanyileghe nyingi isyakufwana ni nkhani sya mu Baibolo isi sikubahobosya. Muyeghe nimbatiko yakumanyila pamwibene. Linga mubombile isi, ukumanyila Ibaibolo na mabuku agha ghikulingania isya mu Baibolo kukuya pakuya kupepe. Linga mukumanyila ubwighane bwinu buyeghe bwakukusya ulughano lwinu mwa Yehova na Masyu ghake. Ukuya nimbatiko yakumanyila, kukuya pakubatula ukuti musayiweghe nukuya balusekelo.—Salimo 16:11.

 Ifundo yakutula: Ukuti musayiweghe na isi mukubelenga, amugheleghe ukughagha amalo gha myee agha mukabaghila ukusofanisiwa na kilikyosa.

 Ifindu ifingi ifi fibaghile ukubatula

•   Belenga inkhani iyakuti:

   “Ngimba Ibaibolo Libaghile Ukundula Bulebule?—Ikighaba 2: Isi Mubaghile Ukubomba Ukuti Muhobokeghe Linga Mukubelenga Ibaibolo”

   “Ngimba Mbaghile Ukubomba Isyafiki Ukuti Ndeke Ukusofanisiwa Linga Ngubomba Ikindu Kimo?”

•   Ketelela ividiyo iyakuti:

   Isi Abininu Bikuyoba—Ukubelenga Ibaibolo

•   Panga Dawunilodi:

   “Muno Mubaghile Ukubelengela Ibaibolo”

 Ilemba ili likukolelana ni fundo iyi: “Mungiyayagha muli simo, loli ntundu tosa isi mufumbilwe muntwalileghe Kyala ndwiputo, ndupyelesyo, pamopene na nkuwa ulupi.”—Bafilipi 4:6.

 Isi sikusanusya ukuti: Mubaghile ukuyobesania na Kyala munjila sibili: Linga mukubelenga Amasyu ghake, mukumpilikisya ukufuma kumyake; kangi linga mukwiputa mukuyobesania nawe. Linga mukwiputa mubaghile ukunsuma Kyala ukuti abatule kangi mubaghile ukunndaghisya umwene pafindu ifinunu ifi abatulile.

 Isi sibaghile ukubombiwa: Utubalilo tumo, mubaghile ukuketa ukuti inyiputo syinu mukwandisania itolo. Mubaghile ukwanda ukukayikila linga naloli Yehova ikupilika pamo linga umwene ikulonda ukupilika inyiputo syinu.—Salimo 10:1.

 Isi mukulondiwa ukubomba: Mwinong’oneleghe ifindu ifi mukulonda ukwiputa pisiku ilyo. Linga muli pamalo agha mukabaghila ukwiputa ulwiputo ulutali, mubaghile ukwinong’onela isya kabalilo akangi aka mubaghile ukwiputa isya nkhani iyo. Ukongelela pafindu ifi umwe mukulonda, amwinong’oneleghe ifyakulondiwa fya bangi nu kubiputila.—Bafilipi 2:4.

 Ifundo yakutula: Linga mukuketa ukuti inyiputo syinu sikupilikiwa ukuya syakwandisania, amwipute kwa Yehova mumbule isya nkhani iyi. Umwene ikulonda mumbuleghe kilikyosa, ukongelelapo muno mukwipilikila ni nyiputo isi mukwiputa.—1 Yohani 5:14.

 Ifindu ifingi ifi fibaghile ukubatula

•   Belenga inkhani iyakuti:

   “Chifukwa Wuli Nkhwenera Kupemphera?”

•   Panga dawunilodi:

   “Kasi Ningachita Wuli Kuti Nilombenge Makora?”

 Ilemba ili likukolelana ni fundo iyi: “Wiketeghe bununu namanga linga kubomba bo bunobuno. . . . po kwisakwipoka wimwene kangi kwisakubapokagha naba bikukupilika.”—1 Timoti 4:16.

 Isi sikusanusya ukuti: Linga mukubabulako abangi isi mukusubila ulwitiko lwinu lukuya lwamaka. Linga mukubomba isi, mubaghile ukubupoka ubumi bwa bandu aba bikubapilika kangi mubaghile ukubupoka ubumi bwinu.

 Isi sibaghile ukubombiwa: Utubalilo tumo, mubaghile ukwipilika ukuti mutikulonda ukubabulako abangi isi mukusubila. Lumo mubaghile ukutila ukufumusya fiyo fiyo linga muli kusukulu.

 Isi mukulondiwa ukubomba: Mungatoliwagha ukubomba ifindu fimo panongwa yakutila. Untumiwa Pauli alembile ukuti: ‘Namanga linga [ndikulumbilila amasyu amanunu] po butolwe itolo kumyangu, po nikubomba papo mbeghiwe na Kyala ubulindilili ubu.’—1 Bakorinti 9:16, 17.

 Ifundo yakutula: Mwakwitikisiwa na bapapi binu, amumwaghe umundu uyungi uyu abaghile ukubatula. Ikulondiwa ukuya Nketi wakifwanikisyo kinunu mubufumusi.—Isya Mbupingamu 27:17.

 Ifindu ifingi ifi fibaghile ukubatula

•   Belenga inkhani iyakuti:

   “N’chifukwa Chiyani Ndimaopa Kuuza Ena za Chikulupiriro Changa?”

 Ilemba ili likukolelana ni fundo iyi: “Twinong’onelaneghe twe babo batupu nukukasania, ukuti tunangisyeghe ulughano nukubomba imbombo inunu; tungalekagha ukwaghanila pamopene.”—Bahiburi 10:24, 25.

 Isi sikusanusya ukuti: Tukubuka ku ngomano ukuti tukamwipute Yehova. Loli filipo ifindu fibili ifinunu ifi fikubombiwa linga tukwaghiwapo pangomano. Ikyakwanda, mukukasiwa na bakamu na balumbu. Ikyabubili, nanumwe mukubakasya linga mukwaghiwapo nu kwamulapo pangomano.—Baroma 1:11, 12.

 Isi sibaghile ukubombiwa: Utubalilo tumo, linga muli pangomano, mubaghile ukwanda ukwinong’onela ifindu ifingi. Ifi fibaghile ukubapangisya ukuti muleke ukupilikisya ku findu ifyakulondiwa ifi fikuyobiwa pamo mubaghile ukuleka ukwaghiwapo pangomano syosa. Sibaghile ukuya bo ulu panongwa yakuti mubaghile ukubikapo indumbula pa findu ifingi bo isukulu, kangi fibaghile ukubatamya ukuti mwaghiwengepo pangomano.

 Isi mukulondiwa ukubomba: Bo mukukindilila ukumanyila isukulu amubikepo indumbula ukuti mubunganeghe akabalilo kosa, kangi muye nubwighane bwakuti mupinduleghe ningomano. Mwamulengepo pangomano. Linga ingomano simalike, mundaghisyeghe umundu yumo panongwa ya fundo yimo iyakukasya iyi amwile pangomano.

 Ifundo yakutula: Mwitendekesyeghe tasi bo mukali ukubuka kungomano. Mupange dawunilodi JW Library® app, kangi mubombeleghe imbombo ikighaba ikyakuti “Meetings” ukuti mukete isi mukuya pakumanyila pangomano.

 Ifindu ifingi ifi fibaghile ukubatula

•   Belenga inkhani iyakuti:

   “N’chifukwa Chiyani Ndiyenera Kumapita ku Misonkhano ya Mpingo?”