ISI ABAKILUMYANA BIKULALUSYA
Ngimba Mbaghile ukosiwa?—Ikighaba 3: Ngimba Findu Fiki Fikundolesya Ukuti Nosiwe?
Ngimba mukutila linga mwandile ukwinong’onela isya kwiyipa kwa Yehova nu kosiwa? Linga mo siyilile, inkhani iyi yikuya pakubatula muno mubaghile ukumasyila ubogha.
Isi sili mu nkhani iyi
Bule linga mbombile ubutulanongwa ubunywamu panyuma pakuti nosiwe?
Inongwa iyi tubaghile ukwilalusya ilalusyo ili: Pamo mummenye umundu yumo uyu abombile ubutulanongwa ubunywamu kangi alyepusiwe nkipanga. (1 Bakorinti 5:11-13) Po lumo mubaghile ukwanda ukupasya ukuti sibaghile ukubombiwa kumyinu.
“Bo nandile ukwinong’ona isya kosiwa, natilagha ukuti panyuma pakuti nosiwe mbaghile ukubomba ubutulanongwa ubunywamu. Naketagha ukuti mbaghile ukubakosya fiyo isoni abapapi bangu.”—Rebekah.
Ifundo ya mu Baibolo: “Untulanongwa ayileke injila yake . . . Aghomokele kwa Yehova Kyala, ko kuti alwaghe ulupakisyo, aghomokele kwa Kyala witu po umwene isakunhobokela fiyo.”—Yesaya 55:7.
Amwinong’onelepo ifundo iyi: Nalinga aba batikulapa bikwepusiwa nkipanga, Yehova ikunangisya ikisa ku bandu aba balapile kangi mwakwiyisya bikwambilila ubulongosi.—Salimo 103:13, 14; 2 Bakorinti 7:11.
Ikyakuhobosya kyo kyakuti: Nalinga mukaya bagholofu, mubaghile ukukana ingelo nu butuli bwa Kyala. (1 Bakorinti 10:13) Ukukinda syosa, ngimba yo nani uyu abaghile ukubasalila muno mubaghile ukubombela ifindu pa bumi bwinu? Mwibene? Pamo umundu yumo?
“Natilagha ukuti mbaghile ukubomba ubutulanongwa ubunywamu linga nosiwe, loli panyuma pake nasyaghenie ukuti linga ngukabila ukosiwa po apa mbaghile ukubomba ubutulanongwa ubunywamu. Kangi nasyaghenie ukuti ndikulondiwa ukwitikisya aminong’ono aghakuti, Bule linga ifindu fibaghile ukubombiwa bo ulu nkyeni,’ ghandolesye ukosiwa.”—Karen.
Ifundo inywamu: Linga musalile ukuleka ukubomba ubutulanongwa ubunywamu, mubaghile ukufwanisya kanunu itolo bo muno siyilile na babombi ba Yehova abangi.—Bafilipi 2:12.
Ngimba mukulonda ubutuli? Keta inkhani iyakuti “Kodi Ndingatani Kuti Ndisamagonje Poyesedwa?”
Bule linga ngutila ubudindo ubu umundu ikuya nabo linga osiwe?
Inongwa iyi tubaghile ukwilalusya ilalusyo ili: Mwakifwanikisyo, mubaghile ukubamanya abakilumyana bamo aba babalekile aba mumbumba yabo na bamanyani babo ukubuka ku malo aghakubutali ukuti bongeleleko ububombeli bwabo. Po lumo mubaghile ukwanda ukupasya ukuti abandu babaghile ukughulila ukuti syo isi nanumwe mukulondiwa ukubomba.
“Linga Unkristu osiwe ikuya nu lusako ulwakuti abaghile ukubomba nyingi pakumbombela Yehova, loli abandu bamo bikuya ukuti bakitendekesya kangi lumo ifindu pa bumi bwabo fyo ifi fikubapangisya ukuti baleke ukubomba bo ulu.”—Marie.
Ifundo ya mu Baibolo: “Loli umundu wesa abuketeghe bununu ubumi bwake, po isakuyagha nisya kwitukifyamo yuyo mwene, momma njungi.”—Bagalatia 6:4.
Amwinong’onelepo ifundo iyi: M’malo mwakwifwanikisya na bangi, amwinong’oneleghe amasyu gha pa Marko 12:30, agha ghikuti, “Unganeghe Yehova Kyala wako nindumbula yako yosa.”
Keta ukuti mukulondiwa ukumbombela Yehova nindumbula yinu yosa komma panongwa ya mundu yumo. Linga munganile naloli Yehova, mukuya pakubikapo indumbula fiyo ukuti musyaghe injila isi mubaghile ukumbombela nu kumpa fyosa ifi mubaghile ukufwanisya.
“Ukosiwa kwakulondiwa fiyo, kangi ukosiwa kutikubika ubumi bwinu pa ndamyo. Linga muli na bamanyani abanunu bikuya pakubatula. Linga mukubomba nyingi mu gulu lya Yehova kukuya pakubapangisya ukulwagha ulusekelo. Linga umundu atikulonda ukosiwa abaghile ukwifulasya mwene.”—Julia.
Ifundo inywamu: Muyeghe bakundaghisya pa lughano ulu Yehova abanangisye. Isi sikuya pakubakasya ukuti mumpeghe Kyala ifindu ifinunu fiyo.—1 Yohani 4:19.
Ngimba mukulonda ubutuli? Keta inkhani iyakuti “Kodi Ndine Munthu Wodalirika?”
Bule linga ngwiketa ukuti ngaya wakulondiwa pakumbombela Yehova?
Inongwa iyi tubaghile ukwilalusya ilalusyo ili: Yehova yo wamaka pa kisu kyosa; pakufwanikisya na bandu, abandu bakaya namaka. Utubalilo tumo mubaghile ukwanda ukukayikila linga Yehova abamenye umwe pamwibene.
“Panongwa yakuti abapapi bangu Baketi ba Yehova, nalyandile ukuya naminong’ono aghakuti ndi pabumanyani na Yehova panongwa ya bapapi bangu kangi ninong’onagha ukuti Yehova akangwaba ukuti niye mu gulu lyake.”—Natalie.
Ifundo ya mu Baibolo: “Nayumo abaghile ukwisa kumyangu, loli pene linga Tata uyu alindumile une ikunkwaba.”—Yohani 6:44.
Amwinong’onelepo ifundo iyi: Linga mwandile itolo ukwinong’onela isya kosiwa, buketi bwakuti Yehova ikubakwaba ukuti muye nawe pabumanyani bwa maka. Polelo, ngimba umwe muli bakwitendekesya ukwitika bo ikubakwaba?
Kangi mukumbukeghe ukuti akayapo uyu abaghile ukunkanisya Yehova ukunkwaba umundu. Amasyu ghake ghikutusimikisyila ukuti linga ‘tukuseghelela kwa Kyala, . . . yope isakuseghelelagha kumyitu.’—Yakobu 4:8.
“Panongwa yakuti mummenye kanunu Yehova kangi muli nawe pabumanyani, buketi bwakuti abaghanile. Yonongwa yake linga mwandile ukwinong’ona ukuti mukaya bakulondiwa ukumbombela, mukumbukeghe ukuti Yehova akabaghila ukukolelana naminong’ono agho. Kangi akabalilo kosa Yehova ikuyoba ubwanaloli.”—Selina.
Ifundo inywamu: Linga mukukonga ifundo sya mu Baibolo isi sikulondiwa ukuti umundu osiwe, ko kuti Yehova itikisye ukuti mumwiputeghe. Kangi umwene ikulonda ukuti mumwiputeghe.—Ubusetuli 4:11.
Ngimba mukulonda ubutuli? Keta inkhani iyakuti “Chifukwa Wuli Nkhwenera Kupemphera?”
