Linga mukuketa nkati mwa Baibolo, mubaghile ukuketa amasyu mingi. Mungitikisyagha ukuti isi sibatolesye ukubelenga Ibaibolo. Mmalo mwake, mubaghile ukulinong’onela Ibaibolo ukufwana bo tebulo ili liswile nifyakulya ifyakukindanakindana. Mukabaghila ukulya kilikyosa iki mukibwene. Loli mubaghile. ukusala ifyakulya ifi fibaghile ukubafwana.

 Ukuti mupinduleghe fiyo “nifyakulya” fya mu Baibolo, mukulondiwa ukubika aminong’ono ghinu pa isi mukubelenga. Inkhani iyi yikuya pakubatula ukuti mubombeghe isi.

Isi sili munkhani iyi

•  Nongwa yafiki mukulondiwa ukwinong’onela fiyo pa isi mukubelenga mu Baibolo?

•  Ngimba mubaghile ukubomba bulebule ukuti mupinduleghe fiyo linga mukubelenga Ibaibolo?

•  Isi abininu bikuyoba

 Linga mukughelaghela fiyo ukubelenga Ibaibolo, fibaghile ukubatula ukuti mupinduleghe na isi mukubelenga. Inong’onela ikifwanikisyo iki: Mubaghile ukubika ikitumba kya tiyi mumisi agha ghapile panandi ukuti mukete ukunogha. Loli mubaghile ukufyagha fingi linga mwitikisye ukuti kikale mumisi agha ghapile kwakabalilo katali.

 Momuno siyilile linga mukubelenga Ibaibolo. Mmalo mwakwingila itolo nukusoka mwanakalinga, mwitikisyeghe aminong’ono ghinu nindumbula yinu yosa ukuya pa isi mukubelelenga. Syo isi uwakulemba Salimo 119 abombile. Pakuyoba isya lulaghilo lwa Kyala, umwene ayobile ukuti: “Ko kandu kamo aka nikukinong’ona ilisiku lyosa.”—Salimo 119:97.

 Naloli, isi sitikusanusya ukuti mukulondiwa ukumala ilisiku lyosa ukubelenga nukwinong’onela isya mu Baibolo. Ifundo yake yoyakuti: Uwamasalimo ayabile akabalilo kakwinong’onelapo amasyu gha Kyala. Ukubomba isi syalindulile ukuti asaleghe ifindu mwamahala.—Masalimo 119:98-100.

 “Akabalilo kamo mama wangu alimbulile ukuti, ‘Uli namasiku 7 pasabata, kangi nkati mwa sabata ukubomba ifindu fingi. Nongwa yafiki utikumpako Yehova akabalilo? Kindu kinunu fiyo ukubomba’”—Melanie.

 Linga mukwinong’onela ifundo sya mu Baibolo, mubaghile ukusala kanunu ifyakubomba—mwakifwanikisyo, linga mukusala abamanyani pamo linga mugheliwe ukuti mubombe ikindu kibibi.

•   Muyeghe nimbatiko. “Mubikeghe imbatiko yakubelenga Ibaibolo,” Mumanyeghe isi mukuya pakubelenga, apa mukuya pakubelenga kangi nakuno mukuya pakubelengela.—Julia.”

•   Muyeghe namalo manunu. “Mulondeghe amalo manunu agha ghakaya nifyongo,” Kangi mubamanyisyeghe aba mumbumba yinu isya mbatiko yinu iyakubelenga Ibaibolo ukuti baleke ukubasofania linga mukubelenga.”—Gianna.

   Linga mukubombela imbombo ifoni, amwighalile amamesenji ghosa ukuti ghaleke ukubasofania. Mubaghile ukughela kangi ukubombela imbombo Ibaibolo ilyakupulinta. Naloli, abakufufuza bikunangisya ukuti ukubelenga mubuku ili lipulintiwe kubaghile ukubatula ukuti mupilikisyeghe kanunu isi mukubelenga. Mwakukindana na isi, kubaghile ukuya kukafu ukupilikisya isi mukubelenga linga mukubelenga pafoni pamo pakompyuta.

   “Nasyaghenie ukuti ukubelenga pasikilini kukusofania. Pafoni yangu pisagha amamesenji pamo ibatile lyamalikagha pamo Intaneti yalekagha ukubomba imbombo. Loli linga ngubombela ibuku ili lipulintiwe fyosa ifi fikabombiwagha.”—Elena.

•   Mwiputeghe tasi. Munsumeghe Yehova ukuti abatule ukupilikisya, ukukumbukila kangi nukupindula linga mukulonda ukubelenga ikighaba kimo kya mu Baibolo.—Yakobu 1:5.

   Ukuti mubombe ifindu mwakukolelana nulwiputo lwinu mufufuzeghe nukupilikisya inkhani iyi mukubelenga. Ngimba mubaghile ukubomba bulebule isi? Linga mukubombela imbombo JW Library app pamo mukubelenga Ibaibolo lya pa intaneti, mubaghile ukubinda ivesi ukuti mufufuze ifingi kangi ninkhani isingi.

•   Mulalusyeghe amalalusyo. Mwakifwanikisyo: ‘Ngimba inkhani iyi yikummanyisya isyafiki isyakufwana na Yehova? Ngimba yikunangisya utuyilo twake utu mbaghile ukukonga?’ (Baefesi 5:1) ‘Ngimba ngumanyilako syafiki munkhani iyi, isi mbaghile ukubombela imbombo pabumi bwangu?’ (Salimo 119:105) ‘Ngimba mbaghile ukubombela imbombo isi mbelengile ukuti mbatule abangi munjila yimo?’—Baroma 1:11.

   Kangi amwilalusye ukuti, ‘Ngimba isi mbelengile sikukolelana bulebule nu mutu wankhani ya mu Baibolo?’ Ilalusyo ili lyakulondiwa fiyo. Nongwa yafiki? Panongwa yakuti kilikyosa iki kikwaghiwa mu Baibolo, ukwanda itolo ku Ubwandilo mpaka Ubusetuli fikukolelana fiyo munjila yimo nu mutu wakuti: Muno Yehova isakuyelusyila ingamu yake ukwendela mbunyafyale bwake ubwa kumwanya nukwitikisya ukuti umwene yo ali namaka ghakulaghila munjila yinunu.