Ngimba umwe mukwinong’ona bulebule?

•   Ngimba kubibi ukusubila nu kubomba ifyamanjele ukuti umundu amanye ifya nkyeni?

•   Ngimba inkhani sya manjele tupango itolo pamo sya bwanaloli? Ngimba fyakutilisya?

 Mu nkhani iyi tukuya pakuketa ifindu ifi fikubapangisya abandu kuti bafighaneghe ifyamanjele kangi inongwa iyi tukulondiwa ukufibengela.

•  Nongwa yafiki abandu bafighanile?

•  Nongwa yafiki mukulondiwa ukuya maso?

•  Isi mukulondiwa ukubomba

•  Isi abininu bikuyoba

 Amasiku agha ifyamanjele fikwaghiwa mu mapulogilamu agha pa TV, mu mafilimu, mu magemu agha pa kompyuta, mu mabuku, na mufindu ifingi. Ifindu fyosa ifi fyo fipangisye ukuti abakilumyana bingi bande ukufighana fiyo ifindu ifyamanjele, mavampaya, pamo ifya bulosi. Ifindu fingi ifi fikubapangisya abandu ukuti bafighaneghe ifindu fya mbepo inyali fyo ifi:

•   Ukunyonywa: Bikulonda ukumanya ubwanaloli linga ifyamanjele filiko

•   Ukupasya: Bikulonda ukumanya ifi fikuya pakubombiwa nkyeni

•   Ukutila abafwe: Bikulonda ukuyobesania na bakamu babo aba bafwile

 Ifindu fyosa ifi tuyobile pa fyene fikaya ni ndamyo. Mwakifwanikisyo, momuno tupapiliwe ukuti umundu aliwesa ikulonda ukumanya ifindu ifya nkyeni kangi tukubasyuka abakamu bitu aba bafwile. Nalinga sili bo ulu loli tukulondiwa ukuya maso fiyo.

 Ibaibolo lili nu bulongosi ubwa maka fiyo pa nkhani iya fyamanjele. Mwakifwanikisyo, likuti:

 “Angayakwaghiwangamo yumo uyu ikumokya m’moto umwanake undumyana pamo undindwana, uyu ikusolola utwa nkyeni, undaghusi uyu linga ikubomba isya manjele, uwa ikwabo pamo uyu ikulalusya mumisyuka namanga wesa uyu ikubomba isya bunobuno yo ikubombagha isya bunyali kwa Yehova, yonongwa iyi Yehova Kyala winu ikubakagha abandu abankisu iki mukwakwingilamo umwe.”—Ukukumbusya Indaghilo 18:10-12.

 Nongwa yafiki Ibaibolo likukanisya ukubomba ifyamanjele?

•   Ifyamanjele fikukolelana fiyo ni fya imbepo inyali. Ibaibolo likuyoba ukuti abandumi bamo balinsambukile Kyala. (Ubwandilo 6:2; Yuda 6) Abandumi ababibi aba bikukoleliwa ukuya mbepo inyali, kangi bikubasyoba abandu ukuti babombeghe ifyamanjele, ifyabulaghusi, pamo ukubuka kubaghanga. Linga numwe mubaghile ukubomba ifindu bo ifi mukuya pakuya balughu ba kyala.

•   Ifyamanjele fikubapangisya abandu ukuti basubileghe ukuti babaghile ukuyoba ifindu ifi fikuya pakubombiwa nkyeni. Ukuyoba ubwanaloli Kyala mwene yo afimenye ifi fikuya pabubombiwa nkyeni. Umwene ikuti: “Ukufuma mu mbwandilo nayobile ngani isi syaliko kubumalikilo, ndinkuyobela ngani isi syayagha pakwisa.”—Yesaya 46:10; Yakobu 4:13, 14.

•   Ifyamanjele fibaghile ukumpangisya umundu ukuti ande ukwinong’ona ukuti abaghile ukuyobesania na bakamu bake aba bafwile. Loli Ibaibolo likuti: “abafwe bo bakamanya nasimo . . . Namanga kwipumba kukayako ukubomba, ukwinong’ona, nubumanyi kangi namahala.”—Undumbilili 9:5, 10.

 Yonongwa yake abaketi ba Yehova batikubomba ikindu kilikyosa ikya manjele. Batikuketelela pamo ukubomba ikindu kilikyosa ikya manjele, imisyuka, mavampaya ni findi ifingi. Undindwana yumo uyu ingamu yake yo Maria atile “linga ifilimu yandile ukunangisya pamo ukulingania ifyamanjele ndikukindilila ukuketelela.” a

•   Komma ukuketelela pamo ukubomba ikindu kilikyosa iki kikukolelena ni fyamanjele ukuti muye “namabyebye amanunu” kwa Yehova.—Imbombo sya Batumiwa 24:16.

•   Mukulondiwa ukutagha kilikyosa ikyakufwana ni fyamanjele. Belenga Imbombo sya Batumiwa 19:19, 20, Kangi mukete isi Abakristu abakwanda babombile pa nkhani iyi.

 Musimanye ukuti: Linga mutikubomba ifyakusangalusya fyosa ifi fitikupalamasya ifyamanjele ko kuti muli ku kighaba kya Yehova kangi mukuyihobosya indumbula yake—Isya Mbupingamo 27:11.