Ukumanyila injobelo iyingi kubaghile ukuntula umundu ukuti imanye linga wakwikola kangi wakwiyisya. Ngimba kununu ukumanyila injobelo iyingi? Abalumyana na balindwana bingi babaghile ukwamula ukuti ena. Inkhani iyi yikuya pakulongosola inongwa iyi abalumyana na balindwana bingi bikumanyilila injobelo isingi.

•  Nongwa yafiki bikumanyila inyobelo isingi?

•  Ngimba pakuya ndamyo siliku?

•  Ngimba bikuya nulusako luliku?

•  Isi abininu bikuyoba

 Bamo bikumanyila injobelo iyingi panongwa ya sukulu. Bangi bikuya nififukwa fyabo. Mwakifwanikisyo:

•   Anna wa ku Australia, alinong’wine ukumanyila chilativiya iyi yo nyobelo ya mama wake. Umwene ayobile ukuti. “Imbumba yithu yitendekesyagha ukubuka ku Latvia, po nalondagha ukuti ngaleke ukutamiwa ukuyoba na bakamu bangu”

•   Gina uyu yo Nketi wa Yehova kangi ikwikala ku United States, amanyile injobelo ya Maboko ya ku America nukusamila ku Belize ukuti akongelesye ububombeli bwake. Umwene ayobile ukuti. “Umundu uyu atikupilika ikuya na bandu badono aba abaghile ukuyoba nabo. Kangi abandu aba batikupilika bikundaghisya linga ngubabula ukuti namanyile injobelo ya maboko ya ku America ukuti mbatule ukumanyila Ibaibolo mu njobelo yabo!”

 Ngimba musimenye? Ibaibolo lyayobile ngani ukuti inongwa inunu isya Bunyafyale bwa Kyala sikuya pakulumbililiwagha ‘ku bandu bosa, uluko losa, kikolo kilikyosa na munjobelo yiliyosa.’ (Ubusetuli 14:6) Ukuti bafwanisye ubusololi ubu, abalumyana na balindwana bingi aba bo Baketi ba Yehova bikumanyila injobelo isingi ukuti bongelele ububombeli bwabo nkisu kyabo pamo ku fyisu ifingi.

 Ukumanyila injobelo iyingi kukaya kupepe. Umulindwana yumo uyu ingamu yake yo Corrina ayobile ukuti: “Pakwanda nginong’onagha ukuti ukamanyila injobelo iyingi sikusanusya ukumanya itolo amasyu amapya. Loli nasyaghenie ukuti umundu ikulondiwa ukumanyila inyiho sya bandu aba bikuyoba injobelo iyo na muno bikwinong’onela kangi nasyaghenie ukuti pakwegha akabalillo katali ukuti umundu amanyile injobelo iyingi”

 Ukuti umundu amanyile injobelo iyingi ikulondiwa ukuya wakwiyisya. James uyu amanyile Chisipanishi ayobile ukuti: “Kulondiwa ukwanda yowe pakuseka linga usobile, panongwa yakuti fikabaghila ukubombiwa ukuti uleke ukusobapo.”

 Ifundo yakulondiwa fiyo: Linga mubaghile ukumalana nindamyo isi sikubabwekesya nyuma kangi linga mutikuya ni soni linga monangile, mukabaghila ukutamiwa ukamanyila injobelo iyingi.

 Ifi fibaghile ukubatula: Muleke ukupasya linga mukuketa ukuti abininu bikumanyila mwakalinga ukukinda umwe. Ibaibolo likuti: “Loli umundu wesa abuketeghe ubununu ubumi bwake, po isakuyagha nisya kwitukifyamo yuyo mwene, komma njungi.”​—Bagalatiya 6:4.

 Lulipo ulusayo lwingi ulu bikulwagha aba bikumanyila injobelo iyingi. Mwakifwanikisyo, umulindwana yumo uyu ingamu yake yo Olivia ayobile ukuti: “Linga kumanyila injobelo iyingi ubaghile ukwangala na bandu bingi mu njobelo iyo kangi kuya na bamanyani bingi.”

 Umulindwana yumo uyu ingamu yake yo Marry aketile ukuti ukumanyila injobelo iyingi kwalintulile ukuti aleke ukwikayikila. Umwene ayobile ukuti: “Fikandamyagha ukuhoboka na kili kyosa iki ngubomba, loli lino panongwa yakuti ngumanyila injobelo iyingi, nguhoboka fiyo linga namanya amasyu amapya. Sikundula ukupilika kanunu.”

 Gina uyu tumuyobile pabwandilo, aketile ukuti ukumanyisya abandu Ibaibolo mu njobelo ya maboko kwalintulile fiyo ukuti ahobokeghe bo ikubomba ububombeli bwake. Umwene ayobile ukuti. “Abandu bikuhoboka fiyo linga nandile ukuyoba nabo mu njobelo yabo kangi ngetile ukaya lusako lyapamwanya fiyo!”.

 Ifundo yakulondiwa fiyo: Ukumanyila injobelo iyingi kubaghile ukubatula ukuti muye na bamanyani bingi, kangi nukuti ububombeli bwinu buyeghe bwakuhobosya. Injila iyi nnunu fiyo ukuti inongwa inunu sikafikeghe ku kisu kyosa, uluko lulilosa, kikolo kilikyosa ni njobelo yiliyosa — Ubusetuli 7:9.