Abandu bingi aba bikuti bafwile bighanile ukuyoba ukuti umbili wabo ghukuchenja, bamo bikuti bikuketa ubwelu pamo amalo ghamo amanunu fiyo. ‘Bamo bikuti ulu lukuya lusako lwakuti bakete ubumi ubungi ubu bukuyako linga umundu afwile,’ momuno likuyobela ibuku lya Recollections of Death. Nalinga Ibaibolo litikuyobapo isya nkhani bo isi, loli lili ni fundo isi sikututula ukumanya ifi fikubombiwa linga umundu afwile.

 Abafwe bakamanya nasimo.

Ibaibolo likuyoba ukuti abafwe “bo bakamanya nasimo.” (Undumbilili 9:5) Linga mundu afwile, atikubuka ku malo ghamo, atikuya nu bumi kangi. Ikimanyisyo ikyakuti twe bandu tuli nu mzimu ughu ghukupona linga tufwile, kitikufuma mu Baibolo. (Ezekieli 18:4) Syosa isi aba bikuti bafwile bikuyoba ukuti baketile kumwanya, ku helo pamo ku malo aghangi, syabutungulu.

 Ngimba Lazaro ayobilepo isyafiki bo asyukile?

Inkhani ya mu Baibolo iyakuyowa isya Lazaro yabwanaloli: Yesu amusyusisye bo pakindile amasiku 4. (Yohani 11:38-​44) Linga naloli Lazaro abukile ku malo ghamo amanunu bo afwile; syabaghile ukuya nkhaza linga Yesu amusyusisye nukuya kangi nu bumi pa kisu kya pasi. Bo Lazaro asyukile akayobilepo ukuti ali ku malo ghamo amanunu. Pakuyoba isya kufwa kwa Lazaro, Yesu atile Lazaro aghonile utulo, ukusanusya ukuleka ukumanya nasimo.​—Yohani 11:11-​14.