Abamanyani babaghile ukututula ukuti tuye nu bumi ubununu kangi nu bwakuhobosya. Abamanyani abanunu bikutulana ukuti bosa baye nu tuyilo utununu.—Isya Mbupingamu 27:17.

 Ibaibolo likutubula ubununu ubu bukuyapo linga tukusala abamanyani mwamahala. Kangi likutusoka ububibi ubu bukuyapo linga tusalile abamanyani ababibi. (Isya Mbupingamu 13:20; 1 Bakorinti 15:33) Abamanyani ababibi babaghile ukutupangisya ukuti tusale ifindu ifibibi pamo ukonanga akayilo kitu akanunu.

Isi sili mu nkhani iyi

•  Ngimba tubaghile ukummanya bulebule ummanyani unnunu?

•  Ngimba mu Baibolo muli fifwanikisyo filiku ifya bandu aba bali bamanyani abanunu?

•  Ngimba umundu abaghile ukuya pabumanyani na Kyala?

•  Amavesi gha mu Baibolo pa nkhani ya bamanyani

 Ibaibolo likutumanyisya ukuti tutikulondiwa ukuya na bamanyani bene aba bafighanile ifindu ifi nanuswe tufighanile. Mwakifwanikisyo pa Salimo 119:63 pikuti: “Aba bikukutila bo binangu, a aba bikusikonga indaghilo syako.” Keta ukuti undembi wa Baibolo uyu asalagha abamanyani aba banhobosyagha Kyala kangi aba bakongagha indaghilo syake.

 Mu Baibolo filimo ifindu ifingi ifi ummanyani ununu ikulondiwa ukubomba. Mwakifwanikisyo:

•   “Ummanyani wa naloli yo mundu uyu ikunangisya ulughano bwila, uwamyinu uyu apapiliwe ukuti akutuleghe uwe mbutolwe.”—Isya Mbupingamu 17:17.

•   “Baliko abangali bamo aba bakaya nu bwangali bwanaloli, loli baliko abamanyani aba babakindile na bamyitu bubo.”—Isya Mbupingamu 18:24.

 Amavesi agha ghikutumanyisya ukuti ummanyani unnunu ikuya nsubiliwa, walughano, wakisa kangi wakupa. Ummanyani unnunu yo uyu tukunsubila ukuti abaghile ukututula linga twaghene ni ndamyo. Kangi ummanyani unnunu ikuya nkifu ukutubula linga tukulonda ukubomba ifindu ifibibi pamo ukusala kabibi ifindu fimo.—Isya Mbupingamu 27:6, 9.

 Mu Baibolo muli ififwanikisyo fya bandu aba bali pabumanyani nalinga ukuti bakindene ifyinja, kuno bakulile, inyiho nu bundindo ubu balinabo. Keta ififwanikisyo fitatu ifi.

•   Ruti na Naomi. Ruti ali nkamwana wa Naomi kangi isi sikunangisya ukuti Naomi alinkulumba kwa Ruti. Ruti na Naomi bakindene inyiho. Nalinga ukukindana kwalipo loli bali pabumanyani ubwamaka fiyo.—Ruti 1:16.

•   Davidi na Yonatani. Nalinga fikunangisya ukuti Yonatani alinkulumba kwa Davidi ni fyinja 30 loli Ibaibolo likuyoba ukuti Davidi na Yonatani baghanene fiyo.”—1 Samueli 18:1.

•   Yesu na bafundiwa bake. Yesu ali nu bundindo ubunywamu fiyo ukukinda abafundiwa bake panongwa yakuti ali m’manyisi kangi mwalafyale wabo. (Yohani 13:13) Loli umwene akabaketagha ukuya ba pasi. Umwene ali pabumanyani ubwamaka fiyo nabo panongwa yakuti bakongagha isi umwene amanyisyagha. Umwene atile: “Umwe muli bamanyani bangu, buno syosa isi mbilike kwa Tata syo mbabulile umwe.”—Yohani 15:14, 15.

 Ena, umundu abaghile ukuya pabumanyani na Kyala. Ibaibolo likuyoba ukuti: “Abagholofu bo Kyala ikwikyela nabo.” (Isya Mbupingamu 3:32) Isi sikusanusya ukuti Kyala ikusala ukuya pabumanyani na bandu aba bali nu tuyilo utununu, babwanaloli, bakwiyisya kangi bikughelaghela ukukonga ifundo syake isya kukindanisya pakati pa ikibibi ni kinunu. Mwakifwanikisyo, Ibaibolo likuyoba ukuti unnyambala unsubiliwa Abrahamu ali pabumanyani na Kyala—2 Syambukulu 20:7; Yesaya 41:8; Yakobu 2:23.