Ngimba Abanefeli Bali Banani?
Isi Ibaibolo likuyoba
Abanefeli bali bandu abanywamu fiyo, kangi bali ba bwite. Bapapiwe na bandumi ababibi aba baghonile na bakikulu nkabalilo ka Nowa. a
Ibaibolo likuti “abana ba Kyala balinkwagha ukuti abana ba bandu abalindindwana bamoghi fiyo.” (Ubwandilo 6:2) ‘Abana ba Kyala’ aba, bali bandumi aba balinsambukile Kyala. Pakabalilo aka “baghalekile amalo agha bikalagha” kumwanya nukwipela ukuya bandu, po “balinkweghapo bamo aba babasalile ukuya bakasi babo.”—Yuda 6; Ubwandilo 6:2.
Abana aba bapapiwe ukufuma ku fipeliwa ifi bakafwene na bana bosa. (Ubwandilo 6:4) Abanefeli bali bamaka fiyo kangi bali bilandaghilo aba bapangisye ukuti pa kisu kyosa paye inkhaza. (Ubwandilo 6:13) Ibaibolo likubakolela ukuti “imindu iminywamu naloli iyi yaliko liyolo.” (Ubwandilo 6:4) Batwele ubwite nu bogha nkisu.—Ubwandilo 6:5; Ukubaliwa 13:33. b
Ubutungulu pa nkhani ya Banefeli
Ubutungulu: Abanefeli bakali baliko nu bumi masiku agha.
Ubwanaloli: Yehova apangile umpyuto pa kisu kyosa ukuti onange ikisu kya nkhaza kila. Abanefeli bapyutiwe pampene na bandu ababibi. Loli Nowa na banake balyambilile ikisa kya Yehova kangi bo bene aba baponile pa kabalilo kala.—Ubwandilo 6:9; 7:12, 13, 23; 2 Peteri 2:5.
Ubutungulu: Abanefeli bali bana ba bandu.
Ubwanaloli: Abatata babo bikukoleliwa ukuya “abana ba Kyala.” (Ubwandilo 6:2) Momuno Ibaibolo likuyobela linga likuyoba isya bandumi. (Jobu 1:6; 2:1; 38:7) Abandumi bali namaka ghakwichenja ukuti bafwane na bandu. (Ubwandilo 19:1-5; Yoswa 5:13-15) Untumiwa Peteri ayobile isya ‘fipeliwa ifi fyali mbupinyiwa, ifi fyasitile ukwitika iyolo, apa ubutengamoyo bwa Kyala bwafighulilagha m’masiku gha Nowa.’ (1 Peteri 3:19, 20) Pa nkhani yiyiyi, umulembi yumo wa Baibolo Yuda alongoswile ukuti abandumi bamo “balinkubuleka ubuyo bwabo.”—Yuda 6.
Ubutungulu: Abanefeli bali bandumi aba batulile inongwa kumwanya.
Ubwanaloli: Isi lemba lya Ubwandilo 6:4 likuyoba, sikunangisya ukuti abanefeli bakali bandumi loli bali bana aba abandumi bapapile mu bandu. Bo abandumi “bandile ukwegha aba babasalile ukuya bakasi babo,” Yehova ayobile ukuti ikuya pakupyuta ikisu ikibibi kila panyuma pa fyinja 120. (Ubwandilo 6:1-3) Ilemba ili likukindilili likuti “m’masiku ghalaghala,” abandumi aba balipelile ukuya bandu “bakindilile ukwingila mbana ba bandu abalindwana” po bapapagha “imindu iminywamu fiyo,” aba Nefeli.—Ubwandilo 6:4.
a Ilisyu ilya Chihiburi ili lisanusiwe ukuti “Nefeli” likusanusya “Ukubawisya Abangi Pasi.” Ukufwana ni Baibolo lya Wilson Old Testament Word Studies likuti ilisyu ili likusanusya abandu aba “batikuluzamo mu bwite pamo ukuti ifigebenga fyamaka [ifi fikupoka ifyabinabo].”
b Abaisraeli aba babukile pakuketa ikisu pa lemba lya Ukubaliwa 13:33, bababwene abandu aba ubutali bwabo bwabakumbwisye isya Banefeli aba bafwile liyolo fiyo—Ubwandilo 7:21-23.
Lumo Mubaghile Ukulonda Ukumanya Isya Nkhani iyi
AMALALUSYO AGHA IBAIBOLO LIKWAMULA
Ngimba Abandumi Ababibi baliko Naloli?
Ngimba abandumi ababibi bo baliku? Bafumile kughu?
ISYA USWE
Suma Ukuti Mumanyileghe Ibaibolo
Muyobesanie amalalusyo aghakufwana ni Baibolo, pamo manyila nyingi isyakufwana na Baketi ba Yehova.