Ibaibolo litikuyobapo isya finyamana fya dayinaso. Loli Ibaibolo likuyoba ukuti Kyala yo ‘apelile ifindu fyosa,’ isi sikunangisya ukuti fyope nifinyamana fya dayinaso yo Kyala uyu afipelile. a (Ubusetuli 4:11) Nalinga ifinyamana fya dayinaso fikayobiwa mu Baibolo loli likuyoba isya fipeliwa ifi lumo ma dayinaso ghalimo:

•   “Ifipeliwa ifikulumba ifya mu nyanja,”—Ubwandilo 1:21

•   “Na fyosa ifi fikwendela ulwanda.”—Ubwandilo 1:25.

•   “Ifinyamana fya pa kisu.”—Ubwandilo 1:25.

Ngimba ifinyamana fya dayinaso fyapeliwe ukufuma ku finyamana ifingi?

 M’malo mwakuyoba ukuti ifinyamana fya dayinaso fyachenjile ukufuma ku finyamana ifingi loli aba bikufukula pasi baketile ukuti fyaliko naloli. Ifundo iyi yikukolelana na isi Ibaibolo likuyoba ukuti Kyala yo apelile ifinyamana fyosa. Mwakifwanikisyo, Ilemba lya Salimo 146:6 likunjoba Kyala ukuya yo “uyu apelile ikyakumwanya ni kyapasi ni nyanja na fyosa ifi filimo.”

Ngimba ifinyamana fya dayinaso fyapeliwe ndili?

 Ibaibolo likuyoba isya finyamana ifya munyanja ni ifya pakisu ukuti fyapeliwe mwisiku lya 5 na 6, pamo akabalilo akatali akakupela ifindu. b (Ubwandilo 1:20-25, 31) Yonongwa yake Ibaibolo likuyoba itolo isya kupeliwa kwa finyamana fya dayinaso ukuti fikale akabalilo akatali.

Ngimba Belemoti na Leviyatani fyali dayinaso?

 Hayi. Nalinga ifinyamana ifi fiyobiwe mu buku lya Yobu loli tubaghile ukufilingania mu njila iyi, Belemoti ikuyobiwa ukuya ifubu kangi Leviyatani ukuya Ngwina. Ifi fyo filinganisiwe kanunu mu malemba. (Jobu 40:15-23; 41:1, 14-17, 31) Mu njila yiliyosa, amasyu ghakuti “Belemoti” na “Leviyatani” fitikwimila ifinyamana fya dayinaso. Kyala alimbulile Yobu ukuti afiketesyeghe ifinyamana kangi Yobu alikele akabalilo akatali bo ifinyamana fya dayinaso fimalike.—Jobu 40:16; 41:8.

Ngimba findu fiki ifi fyabombiwe ku finyamana fya dayinaso?

 Ibaibolo litikuyobapo isi syapangisye ifinyamana fya dayinaso ukuti fileke ukuboneka. Loli, likuyoba ukuti fyosa fyapeliwe ‘panongwa ya bwighane bwa Kyala,’ yonongwa bwali bwighane bwa Kyala ukupela ifinyamana fya dayinaso. (Ubusetuli 4:11) Bo ubwighane bwake bufwanisiwe, Kyala alitikisye ukuti ifinyamana fya dayinaso fimalike.