Nalinga umundu abaghile ukuketa ukuti ali nubwabuke bwa kubuyikisya, loli ukubomba isi kukususania na isi Ibaibolo likumanyisya: Likumanyisya ukuti “Komma ukuyoba ukuti: “Nanine nisakumbombela kifwene mumo umwene alimbombile, nikumbukisyagha ikubuli pali isi alimbombile umwene.” (Isya Mbupingamu 24:29) Ibaibolo lili nubulongosi ubu bubatulile abandu bingi ukuleka ukuya naminong’ono aghakubuyikisya.

Mu nkhani iyi tukuya pakuyobesania ifindu ifi

•  Nongwa yafiki ukuya naminong’ono aghakulonda ukubuyikisya kubibi?

•  Ngimba Kyala yo uyu ikupangisya ukuti abandu bafundiweghe?

•  Ngimba mbaghile ukubomba bulebule ukuti ndeke ukuya naminong’ono aghakubuyikisya?

•  Ubutungulu pakuyoba isyakubuyikisya

 Linga umundu yumo abonangile pamo ababombile ikindu kimo ikibibi, kikaya kya kihesya ukukalala pamo ukulonda ukuti umundu uyu abonangile afundiwe panongwa ya isi abombile. Loli ukuya naminong’ono aghakulonda ukubuyikisya kutikukolelana na isi Ibaibolo likuyoba. Nongwa yafiki tukuyoba bo ulu?

 Kyala atikuhoboka linga abandu bikulonda ukuti babuyikisyeghe bene. Ukwendela mu Baibolo, Yehova a Kyala ikuyoba ukuti: “Ulubukisyo lo lwangu; Nisakubusyagha yuyune.” (Baroma 12:19) Ibaibolo likunkasya aliwesa uyu bambombile ifindu ifibibi ukuti ikulondiwa ukughelaghela ukuyobesania mwanakalinga nu mundu uyu amonangile komma ukubuyikisya. (Baroma 12:18) Loli ngimba umundu abaghile ukubomba bulebule linga yikayapo injila iyingi iyi yibaghile ukutula ukumasya indamyo iyo mwanakalinga pamo lumo mughelilepo ukubomba isi mubaghile ukufwanisya loli mutoliwe? Amalemba ghikutukasya ukuti tunsubileghe Yehova ukuti yo uyu isakusosyapo ifindu fyosa ifisita bugholofu.—Salimo 42:10, 11.

 Pakabalilo aka, Kyala ikwitikisya ukuti amaboma gha bandu gho agha ghabafundeghe abandu linga bonangile simo. (Baroma 13:1-4) Loli pakabalilo kake, Kyala isakuketesya ukuti umundu aliwesa ikubombeliwa ifindu fyabugholofu kangi ikwisa pakusosyapo indamyo syosa kwa bwila na bwila.—Yesaya 11:4.

•   Mungabombagha ifindu linga mukalele. (Isya Mbupingamu 7:27) Abandu aba bikubomba ifindu linga bakalele, utubalilo twingi bikubomba ifindu ifi pabumalilo bikudandabula nafyo. Loli aba bikwinong’onelapo tasi bo bakali ukubomba kilikyosa, akabalilo kosa bikubomba ifindu mwamahala.—Isya Mbupingamu 29:11.

•   Muyimanyeghe inkhani yosa. (Isya Mbupingamu 18:13) Umundu uyu bambombile ifindu ifibibi ikulondiwa ukwilalusya ukuti, ‘Ngimba filipo ifindu fimo ifi ndikufimanya ifi fyampangisye umundu uyu ukubomba bo ulu? Ngimba ikutamiwa naminong’ono? Pamo abombile ifi kisita kumanya? Utubalilo tumo tubaghile ukwinong’ona ukuti ifi umundu yumo abombile, abombile itolo mwamatingo loli ubwanaloli bwake bo bwakuti lumo abombile itolo mwangozi kisita kumanya.

 Ubutungulu: Panongwa yakuti Ibaibolo litikwitikisya ukubuyikisya, ko kuti tukabaghila ukwifighilila twibene linga yumo ikulonda ukutubombela ifindu ifibibi.

 Ubwanaloli: Linga abandu bikulonda ukubabombela ifindu ifibibi, umundu ali nubwabuke ubwakwifighilila mwene pamo ukusuma ubutuli ku boma. Loli Ibaibolo likuyoba ukuti, tukulondiwa ukwepuka ukubomba ifindu ifyalukani ni fyankhaza.—Isya Mbupingamu 17:14.