Ngimba Ibaibolo Likuyoba Isyafiki pa Nkhani ya Ngozi Syakipeliwa?

IGHULA

Isi Ibaibolo likuyoba

Kyala akaya yo uyu ikupangisya ingozi syakipeliwa, loli umwene ikupilika ikitima linga ikuketa abandu aba bapalamasiwe ningozi isi. Ingozi syakipeliwa kyo kimo mwa findu ifi fikubapangisya abandu ukuti batamiweghe kangi Kyala ikuya pakumasya mwalululu indamyo isi. Loli lino, Kyala ikubasubisya bosa aba baghene ningozi syakipeliwa isi.—2 Bakorinti 1:3.

Nongwa yafiki tukuti ingozi syakipeliwa lukaya lufundo lwakufuma kwa Kyala?

Muno ingozi syakipeliwa sikubombiwa, sikukindana fiyo namuno Kyala ikubombela imbombo amaka ghake pakubika ubulongi. Tukuyoba bo ulu panongwa yakuti:

Ingozi syakipeliwa sikughogha itolo aliwesa, unnunu nu mbibi. Mwakukindana ningozi syakipeliwa, Ibaibolo likuti linga Kyala ikulonda ukubika ulufundo, aketesyagha ukuti abapyutile bene ababibi. Mwakifwanikisyo, apa Kyala akapyutagha akaya ka Sodomu na Gomora, alimpokile Loti na banake babili. (Ubwandilo 19:29, 30) Pakabalilo ako, Kyala asimenye isi syali mundumbula sya bandu, yonongwa yake abapyutile ababibi bene.—Ubwandilo 18:23-32; 1 Samueli 16:7.
Ingozi syakipeliwa sikubombiwa kisita kwitendekesya. Linga Kyala ikulonda ukubapyuta abandu, abasokagha tasi. Linga bapilikile baponagha.—Ubwandilo 7:1-5; Matai 24:38, 39.
Ifi abandu bikubomba, fyope fibaghile ukupangisya ingozi. Ngimba fibaghile ukubombiwa bulebule? Abandu bamo bikonanga ikipeliwa kangi abangi bikuyenga inyumba ku malo kuno kukubombiwa fiyo utusenyenda, amisi ghikuteka pamo kuno utubalilo twingi ifindu fikuya kabibi. (Ubusetuli 11:18) Polelo kukaya kununu ukumpa Kyala inongwa linga abandu bikwaghana ni ndamyo panongwa ya ifi basalile.—Isya Mbupingamu 19:3.

Ngimba ingozi syakipeliwa kimanyikilo kyakuti tuli m’masiku aghakubumalikisyo?

Ena, Ibaibolo lyayobile ngani ukuti “ubumalikilo bwa kisu,” pamo ukuti “m’masiku ghakubumalikisyo,” kwisakuyagha utubalilo utupalapala (Matai 24:3; 2 Timoti 3:1) Mwakifwanikisyo, pakuyoba isya kabalilo aka tulimo, Yesu atile: “Yisakuyako injala nutusenyenda mbuyo mbuyo.” (Matai 24:7) Mwalululu, Kyala ikuya pakusosyapo fyosa ifi fikupangisya ukuti abandu batamiweghe, ukongelelapo ingozi syakipeliwa.—Ubusetuli 21:3, 4.

Ngimba Kyala ikubatula bulebule aba bapalamasiwe ningozi syakipeliwa?

Kyala ikubasubisya na Masyu ghake Ibaibolo. Ibaibolo likutusimikisyila ukuti Kyala ikutupasikisya kangi sikumbaba fiyo linga twebandu tukutamiwa. (Yesaya 63:9; 1 Peteri 5:6, 7) Ibaibolo likuyoba kangi isya kabalilo aka Kyala isakufwanisya isi afingile isya kumasya ingozi syakipeliwa.—Keta “ Amavesi gha mu Baibolo agha ghabaghile ukubatula aba bapalamasiwe ningozi syakipeliwa.”
Ikutuma ababombi bake ukuti babatule aba bapalamisiwe ningozi. Kyala ikubombela ababombi bake ukuti bakongeghe ikifwanikisyo kya Yesu. Ibaibolo lyayobile ngani ukuti linga Yesu isile isakubasubisya “aba indumbula siyetile” na “bosa aba bikusulumania.” (Yesaya 61:1, 2) Syo isi bope ababombi ba Kyala bikughelaghela ukubomba.—Yohani 13:15.

Kyala ikubombela kangi ababombi bake ukubika ubutuli bwa fyakulya, imyenda, amalo ghakughona ni findu ifingi ifyakulondiwa ku bandu aba bapalamasiwe ningozi syakipeliwa.—Imbombo sya Batumiwa 11:28-30; Bagalatia 6:10.

Abaketi ba Yehova bikutendekesya inyumba iyi yalyonangike nu mbelo ku Puerto Rico

Ngimba mu Baibolo silimo ifundo isi sibaghile ukututula ukwitendekesya ku ngozi syakipeliwa?

Ena. Nalinga Ibaibolo likalembiwe ukuti litutuleghe pakwitendekesya ingozi syakipeliwa, lili nifundo simo isi sibaghile ukututula pa nkhani iyi. Mwakifwanikisyo, likututula:

Ukumanya ngani ifyakubomba bo ingozi sikabombiwa: Ibaibolo likuti, “Umundu uwa mahala linga abubwene ubutolwe bukwisa pabutali ikwibilila.” (Isya Mbupingamu 22:3) Polelo kwakulondiwa fiyo ukwitendekesya bo ingozi sikabombiwa. Mubaghile ukulondela ngani ifindu ifyakulondiwa ifi mubaghile ukubombela imbombo linga kubombiwe ingozi kangi kuno mubaghile ukubopelako.
Ukubuketa ubumi ukuya bwapamwanya fiyo ukukinda katundu: Ibaibolo likuyoba ukuti: “Namanga tukatwele kamo bo tukwisa nkisu muno, bunobuno tukabaghila ukweghamo kamo bo tukusoka nkisu muno.” (1 Timoti 6:7, 8) Tukulondiwa ukuya bakwitendekesya ukuleka katundu witu nu kubopa linga kubombiwe ingozi syakipeliwa. Akabalilo kosa tukumbukeghe ukuti ubumi bwitu bwapamwanya fiyo ukukinda ikindu kilikyosa iki tubaghile ukuya nakyo.—Matai 6:25.

Amavesi gha mu Baibolo agha ghabaghile ukubatula aba bapalamasiwe ningozi syakipeliwa

Ubwandilo 18:25: “Sisisi syo siyeghe itolo kubutali kumyako [kwa Kyala], ukubaghoghela lumo abagholofu na baniongafu . . . Kali naloli Undongi wa kisu kyosa yo ati asite ukubomba isya bugholofu?”

Isi sikusanusya ukuti: Akabalilo kosa Kyala ikubomba ifindu ifinunu kangi tutikulondiwa ukumpa inongwa linga abandu abanunu bikufwa panongwa ya ngozi syakipeliwa.

Salimo 46:1, 2: “Kyala yo buponelo bwitu kangi yo maka ghitu, yo ntuli uyu alipo bwila nkabalilo ka butolwe. Ko kuno tutikutilagha napa linga ikisu kikwanduka.”

Isi sikusanusya ukuti: Kali twaghene ni ndamyo siliku, tusimenye ukuti Kyala yo uyu abaghile ukutupa amaka.

Yesaya 63:9: ‘Ku ngubilo syabo syosa, Kyala abapokile.’

Isi sikusanusya ukuti: Kyala wakibabilisi, sikumbaba fiyo linga tukutamiwa.

Yohani 5:28, 29: “Kikwisa akabalilo apa bosa aba bali m’mapumba bisakupilikagha ilisyu [lya Yesu] po bende nukusoka.”

Isi sikusanusya ukuti: Yehova isakumpa amaka Yesu ukuti abasyusye aba bafwile, polelo tukughulila ukuti tusabakete kangi abakamu bitu aba bafwile.

1 Peteri 5:6, 7: “Amwiyisyeghe kukiboko kya Kyala iki kili namaka . . . syosa isi mukwiyaya nasyo syo muntaghileghe yuyo, namanga umwene ikubiyayila umwe.”

Isi sikusanusya ukuti: Kyala ikupalamasiwa fiyo na isi sikutubonekela, umwene ikulonda ukuti tumbuleghe syosa isi tukwiyaya nasyo.

Ubusetuli 21:4: “[Kyala] isakupyasilagha amasosi ghosa, bope nubufwe nalinga bo busulumanie, nalinga ko kukuta pamo ko kubaba fitisakuyangako kangi. Namanga indasi syosa sikindile.”

Isi sikusanusya ukuti: Kyala isakusosyapo fyosa ifi fikwandisya indamyo, ukongelelapo ingozi syakipeliwa.