Ibaibolo lyayobile ngani ukuti m’masiku aghakubumalikisyo kwisakuya imbungo imbela filalilali. (Luka 21:11) Loli imbungo isi lukaya lufundo lwakufuma kwa Kyala. Mwalululu, Kyala ukwendela mu Bunyafyale bwake ikuya pakusosyapo imbungo syosa, ukongelelapo imbungo isi sikwambukila amasiku agha.

•  Ngimba Ibaibolo lyayobile ngani isya mbungo?

•  Ngimba Kyala abafundilepo abandu ni mbungo?

•  Ngimba imbungo isi siliko lino, lufundo lwakufuma kwa Kyala?

•  Ngimba imbungo sikwisa kumalika?

•  Amavesi gha mu Baibolo agha ghikuyoba isya mbungo

 Ibaibolo litikuyoba ingamu sya mbungo bo COVID-19, Ezi, TB, isekema pamo ifuluwenza ya ku Spain. Loli lyayobile ngani ukuti kwisakuya “imbungo imbela filalilali” ni ‘mbungo iyakughogha’ (Luka 21:11; Ubusetuli 6:8 NWT) Imbungo isi sikunangisya ukuti tuli “m’masiku aghakubumailikisyo,” kangi ukuti tuli “kubumalikisyo bwa kisu.”—2 Timoti 3:1; Matai 24:3.

 Mu Baibolo silimo inkhani nandi itolo isi sikuyoba ukuti Kyala abafundile abandu ni mbungo. Mwakifwanikisyo, abafundile abandu bamo ni mbungo ya bukoma. (Ukubaliwa 12:1-16; 2 ABanyafyale 5:20-27; 2 Syambukulu 26:16-21) Kangi imbungo isi sikabapalamasyagha abandu aba bakonanga. Loli lwayagha lufundo ku bandu aba bansambukilagha Kyala.

 Hayi. Abandu bamo bikuyoba ukuti Kyala ikubombela imbungo isyakwambukila na mabubine aghangi, ukuti abafunde abandu. Loli Ibaibolo litikukolelana ni fundo iyi. Nongwa yafiki?

 Panongwa yakuti, ukwanda iyolo mpaka lino ababombi abasubiliwa ba Kyala bope bikutamiwa ni mbungo. Mwakifwanikisyo, Timoti, atamiwagha “nu bubine kabilikabili.” (1 Timoti 5:23) Loli Ibaibolo likayobapo ukuti isi sikunangisya ukuti Kyala akahobokagha nawe. Mwakufwana itolo, amasiku agha bope ababombi abasubiliwa ba Kyala bikubina pamo ukwaghiwa ni mbungo simo. Utubalilo tumo sikubombiwa panongwa yakuya pamalo ghamo na kabalilo akabibi.—Undumbilili 9:11 NWT.

 Ibaibolo likumanyisya ukuti akabalilo akakuti Kyala abafunde abandu ababibi kakali ukafwana. Likuyoba kangi ukuti tukwikala “mu isiku ilya bupoki,” nkabalilo aka Kyala ikunkolela aliwesa ukuti aseghelele kumyake ukuti apokiwe. (2 Bakorinti 6:2) Injila yimo iyi ikufwanisyila isi, ko kwisila mumbombo yakufumusya “amasyu amanunu agha Bunyafyale” iyi yikubombiwa pa kisu kyosa kyapasi.—Matai 24:14.

 Ena. Ibaibolo likuyoba ukuti mwalululu abandu batisakubinagha kangi. Kyala ikwisa kumasya imbungo syosa mu Bunyafyale bwake. (Yesaya 33:24; 35:5, 6) Umwene isakusosyapo indamyo syosa, ifya kubaba nu bufwe. (Ubusetuli 21:4) Kangi abandu aba bafwile bisakusyuka. Abene bisakuya nu bumi ubununu fiyo pa kisu kyapasi apa kangi batisakubinagha.—Salimo 37:29; Imbombo sya Batumiwa 24:15.

 Ubusetuli 6:8 NWT: “Ndinkuketa, ndinkuyibona ifalasi imbuba, uyu alitoghilepo ingamu yake ali yo Bufwe, yope na yu ipumba ndinkwagha akongesenie itolo nawe. Bapeghiwe ubulaghili . . . ukuti baghoghe . . . nimbungo ya kilalilali.”

 Isi sikusanusya ukuti: Ubusololi bwa banyambala 4 aba bakwelile pa falasi ubu buli mu buku lya Ubusetuli bukunangisya ukuti imbungo sibaghile ukubombiwa m’masiku aghabumalilo agha.