Ngimba Ibaibolo Likuyoba Isyafiki pa Nkhani ya Kokya Umfimba wa Mundu uyu Afwile?
Isi Ibaibolo likuyoba
Ibaibolo litikubika ubulongosi bulibosa pa nkhani ya kokya umfimba wa mundu uyu afwile. Kangi ululaghilo lukayamo ulwakuti umfimba wa mundu bokyeghe pamo babikighe mwipumba.
Mu Baibolo silimo inkhani sya babombi abasubiliwa ba Kyala aba babasyilile abakamu babo aba bafwile. Mwakifwanikisyo, Ibaibolo likuyoba ukuti Abrahamu alyulile ungunda ukuti ansyilemo unkasi wake Sara.—Ubwandilo 23:2-20; 49:29-32.
Ibaibolo likuyoba kangi isya bandu abasubiliwa aba balyokile imifimba ya bandu. Mwakifwanikisyo, Mwalafyale Sauli wa Israeli na banake abanyambala batatu bo baghoghiwe ku bwite, imifimba yabo yalikele nkighaba kya balughu babo kangi imifimba yabo bakayibombile munjila iyalughindiko. Abasilikali abasubiliwa aba ku Israeli bo bapilike isya nkhani iyi, balinkubuka ukwakwegha imifimba iyi. Bo beghile, balinkokya kangi ififupa fyabo balinkufisyila. (1 Samueli 31:8-13) Kangi Ibaibolo likunangisya ukuti isi syabombiwe syali syakwitikisiwa.—2 Samueli 2:4-6.
Ubutungulu ubwakufwana nu kokya imifimba ya bandu aba bafwile
Ubutungulu: Kupepula ukokya umfimba wa mundu uyu afwile.
Ubwanaloli: Ibaibolo likuti abafwe bikughomokela ku mfu, kangi syo isi sikubombiwa naloli linga umbili ghubolile. (Ubwandilo 3:19) Ukokya umfimba wa mundu uyu afwile njila mbepe iyakuti umundu aghomokele ku mfu.
Ubutungulu: Iyolo, abandu bene aba bakali pabumanyani na Kyala bo aba bokyiwagha linga bafwile.
Ubwanaloli: Imifimba ya bandu bamo aba bakali basubiliwa, bo Akani ni mbumba yake, balyokyile. (Yoswa 7:25) Loli lukali lulaghilo. (Ukukumbusya Indaghilo 21:22, 23) Ukufwana namuno tuketile mu nkhani iyi, imifimba ya bandu bamo abasubiliwa yope bayokyagha, bo muno syayilile na Yonatani, umwana wa Mwalafyale Sauli.
Ubutungulu: Kyala akabaghila ukunsyusya umundu uyu umfimba wake balyokyile.
Ubwanaloli: Kakayapo aka kabaghile ukuntolesya Kyala ukunsyusya umundu uyu afwile, kali umfimba wake basyilile mwipumba, balyokyile, wayongile mwa sumbi pamo ifinyamana filile. (Ubusetuli 20:13) Kyala Wamaka ghosa akabaghila ukutoliwa ukupela kangi umbili wa mundu uyu afwile.—1 Bakorinti 15:35, 38.
Lumo Mubaghile Ukulonda Ukumanya Isya Nkhani iyi
AMALALUSYO AGHA IBAIBOLO LIKWAMULA
Findu Fiki Fikubombiwa Linga Umundu Afwile?
Ngimba abafwe bikumanya isi sikubombiwa nkisu?
ESSENTIAL BIBLE TEACHINGS
Ngimba Findu Fiki Fikubombiwa Linga Umundu Afwile?
Ibaibolo likuyoba isya kabalilo aka abandu bingi bisakusyusiwa ku bafwe, bo muno syayilile na Lazaro.
ISYA USWE
Suma Ukuti Mumanyileghe Ibaibolo
Muyobesanie amalalusyo aghakufwana ni Baibolo, pamo manyila nyingi isyakufwana na Baketi ba Yehova.