Ibaibolo litikukanisya ukughonana, loli likuyoba ukuti ukughonana kyabupe iki Kyala abapele aba bali pabweghi. Umwene abapelile abandu “unnyamnbala nu nkikulu” kangi aketile ukuti fyosa ifi apelile fyali “finunu itolo.” (Ubwandilo 1:​27, 31) Pakabalilo aka Yehova antwalile unkikulu Adamu ukuti aye nkasi wake, umwene ayobile ukuti “bisa kuyagha mbili ghumowene.” (Ubwandilo 2:​24) Polelo ukuya mbili ghumowene kongelelangapo ukughonana nukubulana isya ku ndumbula.

 Ibaibolo likubabula abanyambala ukuti: ‘Bikyeleghe nu nkikulu wa mbutubwa bwabo . . . Namanga umwene yo nganiwa kumyako yo wa pandumbula yako ulughano lwake lo lukukyeleghe uwe.’ (Isya Mbupingamu 5:​18, 19) Kyala ikulonda ukuti bope abakikulu bahobokeghe ni kyabupe kya kughonana. Ibaibolo likuti: “Undume ambombeleghe unkasi wake isi sikulondiwa yope unkasi abombeghe bunobuno.”​—1 Bakorinti 7:3.

Isi Ibaibolo likuyoba pa nkhani ya kughonana

 Kyala atendekisye ukuti bene abandu aba beghene bo babaghile ukughonana, ilemba lya Bahiburi 13:4 likunangisya ukuti: ‘Ubweghi bughindikiweghe na bandu bosa kangi abanyambala na bakasi babo bayeghe basubiliwa uyu kunnine uyu kunnine namanga Kyala isa kubalonga abalowe.’ Polelo abandu aba beghene bikulondiwa ukuya basubiliwa kangi batikulondiwa ukughonana nu mundu uyu akaya mwinabo wa mbweghi. Kangi unnyambala pamo unkikulu wa pabweghi ikulwagha ulusekelo linga atikulonda ukuya nindumbula ya kwihobosya mwene loli linga ikukonga ifundo iya mu Baibolo iyi yikuti: “Nukupa nukwambilila, kusayiwa ku kupa.”​—Imbombo sya Batumiwa 20:35.