Kyala yoyuyo abapelile abandu. Alondagha ukuti unnyambala nu nkikulu aba beghene bo baghonaneghe. (Ubwandilo 1:​27, 28; Abanyalevi 18:22; Isya Mbupingamu 5:​18, 19) Ibaibolo likukanisya ukuti abandu aba bakali ukweghana baghonaneghe. Kangi likuti ukughonana kwa bannyambala pamo abakikulu bene na bene kubibi. (1 Bakorinti 6:​18) Ifi fikongelapo ukughonana mu ndomo, kumatanga nu kwangasya utumbakasya twakughonanilana.

 Nalinga Ibaibolo likukanisya ukuti abanyambala pamo abakikulu bene na bene baghonaneghe, loli litikusanusya ukuti tubabengeghe abandu aba bikubomba ifindu ifi. M’malo mwake likubabula Abakristu ukuti, ‘mubaghindikeghe abandu bosa.’​—1 Peteri 2:​17.

 Ngimba umundu abaghile ukupapiwa nifinyonywa fya kughonana na banyambala pamo na bakikulu abinake?

Ibaibolo litikuyobapo pabwelu ukuti umundu abaghile ukupapiwa ni kinyonywa kyakuti aghonanenghe na banyambala pamo abakikulu abinake. Loli likuyoba ukuti twesa tupapiwe nu bwighane bwakubomba isi Kyala ikukanisya. (Baroma 7:​21-​25) Tutikumanya isi sikubapangisya abandu ukuti bayeghe ni finyonywa fyakughonana na banyambala pamo abakikulu abinabo. Loli ifundo iyi yilipo yakuti Ibaibolo likukanisya ukuti abanyambala pamo abakikulu bene na bene baghonaneghe.

 Ngimba umundu uyu ali nifinyonywa fya kughonana na banyambala pamo abakikulu abinake abaghile ukubomba isyafiki ukuti anhobosye Kyala?

Ibaibolo likuti: “Amufighogheghe ifinyonywa fyinu ifya mbili muno mukufuma ubulowe.” (Bakolosi 3:5) Ukuti umundu afighoghe ifinyonywa ifibibi, ifi fikumpangisya ukuti abombe imbibi, ikulondiwa ukuya maso fiyo na isi ikwinong’ona. Linga akabalilo kosa mukwisusya ifindu ifinunu mu minong’ono ghinu, kubaghile ukuya kupepe ukuti mufikane ifinyonywa ifibibi. (Bafilipi 4:8; Yakobu 1:​14, 15) Pabwandilo mubaghile ukutamiwa ukuti mumalane na minong’ono amabibi loli pabumalilo mubaghile ukughatola. Kyala afingile ukuti ikuya pakubatula ukuti “mwipeleghe bapya mumbepo sya mabyebye ghinu.”​—Baefesi 4:​22-​24.

 Abanyambala na bakikulu amamiliyoni mingi aba bali nifinyonywa fya kughonana abanyambala pamo abakikulu bene na bene, bope bikughelaghela ukuti banhobosye Kyala nalinga bikutamiwa ukuti bamalane nifinyonywa ifya kughonana. Mwakifwanikisyo, aba bakali ukwingila mbweghi pamo aba bali pabweghi loli bitikughonana panongwa yandamyo yimo iya mwinabo wa mbweghi, bikughelaghela ukwikola ku finyonywa fya kughonana nalinga bikugheliwa. Bope bikwikala mwalusekelo kangi abandu aba bali nifinyonywa fya kughonana na banyambala pamo abakikulu abinabo bope babaghile ukumasya indamyo iyi linga bikulonda ukuti banhobosyeghe Kyala.​—Ukukumbusya Indaghilo 30:19.