Pankhani ya kwilemba mu mbili, Ibaibolo likuyoba pene pa lemba lya Abanyalevi 19:28, apa pikuti: “Kom’ma ukwitema isimbo.” Kyala abapele Abaisraeli ululaghilo ulu, ukuti abapaghuleghe ku bandu aba bapalamene nabo aba bilembagha mu mbili wabo ingamu pamo ififwani fya bakyala babo. (Ukukumbusya Indaghilo 14:2.) Ululaghilo ulu lwabombagha kwene ku Baisraeli kom’ma ku Bakristu, loli tukulondiwa ukwinong’onelapo pafundo yake.

Ngimba Unkristu ilembeghe pamo ijambuleghe mu mbili?

 Amavesi agha ghali pasi apa ghabaghile ukukutula ukuketa linga kununu pamo kubibi:

•   ‘“Abakikulu bafwaleghe . . . mwakwiyisya.’ (1 Timoti 2:9, New American Bible) Ifundo iyi yikubomba ku bakikulu na banyambala. Tukulondiwa ukubaghindika abinitu kangi tuyeghe maso ukuti tuleke ukwihobosya twibene.

•   Bamo bikulonda ukwilemba ukuti bamanyiwe, bamo bikulonda ukuti bakindaneghe na bangi. Loli, Ibaibolo likubabula Abakristu ukuti: “Mwiningeghe imibili yinu ukuya ikemo ilyumi, ilisitakababye, ilikyeliwa kwa Kyala, bo buyeghe bubombeli bwinu bwa mahala.” (Baroma 12:1) Bombela “amahala” ghako ukuti umanye linga ukwilemba kununu pamo hayi. Linga kulonda ukwilemba panongwa ya kukonga isitayelo pamo ukunangisya ukuti uli mu gulu limo, kumbuka ukuti ifi kuya pakwilemba fikuya pakuyapo bwila na bwila loli ifi fyakupangisye ukuti wilembe fibaghile ukumalika. Ukwinong’onela kanunu ififukwa ifi kulondela ukwilemba mumbili wako, kubaghile ukukutula ukuti usale ifyakubomba mwamahala.—Isya Mbupingamu 4:7.

•   “Uyu ikuketa nkyeni nukwiyula yo atikutoliwa ukufyagha, umwene loli uyu ikubomba mbibimbibi kisita kwinong’ona yo ikwingila mbulondo.” (Isya Mbupingamu 21:5) Umundu uyu ikulonda ukwilemba mu mbili, ikubomba mbibimbibi kisita kwinong’onela kangi kukuya kukafu ukuti aye na bamanyani kangi ukuti ayaghe imbombo. Mwakongelapo ukwilemba mu mbili kukubaba fiyo ukuti basosye kangi kukulonda indalama nyingi. Abandu aba bikufufuza na aba bikubomba amalonda gha kusosya ifi fyalembiwe pa mbili wa mundu, bikuyoba ukuti abandu bingi aba balilembile bikudandabula ukuti linga bamenye ngali bakalembile mu mbili wabo.