Amasyu aghakuti “Unsamaria Unnunu” utubalilo twingi ghikuyoba fiyo isya mundu uyu ighanile ukubatula abangi aba bikulondiwa ubutuli. Amasyu agha ghafumile ku nkhani, pamo ukuti ku kifwanikisyo iki Yesu ayobile ukuti alinganie isi umpalamani unnunu ikubomba. Umwene atile umpalamani unnunu ikuya ni kisa kangi ikubatula abangi kisita ukuketa muno bayilile pamo kuno bakulile. a

Isi sili mu nkhani iyi

•  Ngimba ikifwanikisyo kya “Nsamaria Unnunu” findu fiki?

•  Nongwa yafiki Yesu ayobile ikifwanikisyo iki?

•  Ngimba tukumanyilako isyafiki ku kifwanikisyo iki?

•  Ngimba Abasamaria bali bo banani?

•  Ngimba inkhani ya “Nsamaria Unnunu” yabombiwe naloli?

Keta inkhani iyi mbupimba iyi Yesu ayobile ukuti: Umundu yumo afumile ku Yerusalemu asulukagha ukubuka nkaya ka Yeriko. Bo ali munjila umwene alyaghene niminyambuta iyi yalinkomile nu kundeka bo asyele panandi ukufwa.

Umputi yumo kangi nunnya Levi bo bambwene umundu uyu afulele balinkwenda kumbali. Nalinga ukuti bafwene nawe ikikolo loli bosa bakalintulile umundu uyu.

Pabumalikisyo kwalisile umundu uyungi uyu yope endagha munsebo ghughughu. Umwene ali Nsamaria. (Luka 10:33; 17:16-18) Ikisa kilinkumwagha, alikumpinya ifilonda fyake. Alinkumwegha nu kwakumbika nnyumba ya bahesya mo alinkwakundwasya. Kilabo lyake alyeghile indalama nu kumpa umwenenyumba alinkuti ampweleleleghe umundu yula, kangi atile indalama syosa isi ikuya pakonanga pakumpwelelela umundu yula ikuya pakuhomba—Luka 10:30-35.

Yesu ayobile ikifwanikisyo iki ku mundu uyu inong’onagha ukuti abandu aba kikolo kyake bene bo aba bali bapalamani bake. Yesu alondagha ukummanyisya umundu uyu ifundo iyakulondiwa fiyo iyakuti “abapalamani” bake bakali Bayuda bene loli bongelelangapo na bandu aba bakaya Bayuda. (Luka 10:36, 37) Inkhani iyi yilembiwe mu Baibolo nu bwighane ubwakuti aliwesa uyu ikulonda ukunhobosya Kyala, amanyilepo simo.—2 Timoti 3:16, 17.

Inkhani iyi yikutumanyisya ukuti umpalamani unnunu ikunangisya ikisa mu isi ikubomba. Umwene ikubombapo simo ukuti antule umundu yumo uyu ikwaghana ni ndamyo kisita kwinong’onela kuno akulile, uluko pamo kuno ikwikala. Umpalamani unnunu ikubabombela abangi ifindu bo muno umwene ikulondela ukuti abangi bambombeleghe umwene.—Matai 7:12.

Abasamaria bikalagha kululu nkisu kya Yudai. Kangi abandu aba bonganikene, Abayuda na bandu aba bakali Bayuda.

Ukwanda m’ma 100 C.E., Abasamaria bapangile akagulu kabo akakwiputa. Abene babombelagha amabuku 5 ghene agha mu Malemba gha Kihiburi kangi aghangi ghosa bakanagha ukughabombela imbombo.

Nkabalilo ka Yesu, Abayuda bababengile fiyo Abasamaria kangi bakalondagha ukubombela nabo pampene ifindu. (Yohani 4:9) Kangi Abayuda bamo babombelagha amasyu aghakuti “Nsamaria” pakuntuka umundu.—Yohani 8:48.

Amalemba ghatikuyoba linga ikifwanikisyo kya Nsamaria Unnunu nkhani iyi yabombiwe naloli. Loli Yesu abombelagha imbombo ifindu ifi fyabombiwagha naloli kangi ayobagha amalo agha ghaliko naloli ukuti aba bapilikisyagha, bapilikisye kanunu ifundo iyi ikuyoba.

Ifindu ifi fikuyobiwa mu nkhani isi syabombiwe iyolo sikuya syabwanaloli. Mwakifwanikisyo.

• Unsebo ughu wasulukagha ukufuma ku Yerusalemu ukubuka ku Yeriko, ughu wali na makilomita aghakukinda 20. Inkhani iyi pakuyoba isya muno unsebo ughu wayilile, yikuyoba ubwanaloli panongwa yakuti yikuyoba ukuti abandu “basulukagha ukufuma ku Yerusalemu” ukubuka ku Yeriko.—Luka 10:30.

• Abaputi na Balevi aba bikalagha ku Yeriko akabalilo kosa bendagha munsebo ughu ukubuka ku Yerusalemu.

• Iminyambuta yibililagha mumbali munsebo ughu, ukubaghulila abandu aba bikwenda, fiyofiyo aba bendegha bene.