Ngimba Kyala Alipaliposa?
Isi Ibaibolo likuyoba
Kyala abaghile ukuketa kilikyosa kangi abaghile ukubomba kilikyosa iki ighanile. (Isya Mbupingamu 15:3; Bahiburi 4:13) Loli Ibaibolo litikumanyisya ukuti Kyala ikwikala paliposa, ukuti ikwaghiwa paliposa, mfindu fyosa. M’malo mwake, likunangisya ukuti Kyala mundu kangi ali na malo ghamoghene agha ikwikalako.
Muno Kyala ayilile: Kyala mundu uyu ali nu mbili wamwambepo. (Yohani 4:24) Mundu uyu tukabaghila ukumbona. (Yohani 1:18) Ifisetuka ifya Kyala ifi filembiwe mu Baibolo fikunangisya ukuti Kyala ali na malo ghamoghene. Umwene atikwaghiwa paliposa.—Yesaya 6:1, 2; Ubusetuli 4:2, 3, 8.
Amalo agha Kyala ikwikala: Kyala ikwikala kumwanya, amalo agha tukabaghila ukughabona. Ibaibolo likuyoba ukuti Kyala ali na malo agha “ikwikala kumwanya.” (1 Abanyafyale 8:30) Ibaibolo likuyoba ukuti akabalilo kamo abandumi “balisile kukwinangisya nkyeni mwa Yehova.” a Ifi fukunangisya ukuti Kyala ali na malo ghamoghene agha ikwikalako.—Jobu 1:6.
Linga Kyala atikwaghiwa paliposa, ngimba abaghile ukundula une panimwene?
Ena. Kyala ikubapasikisya fiyo abandu. Nalinga Kyala ikwikala kumwanya, loli umwene ikubamanya bosa aba bikulonda ukunhobosya kangi ikubatula. (1 Abanyafyale 8:39; 2 Syambukulu 16:9) Inong’onela injila isi Yehova ikunangisya ukuti ikubapasikisya aba bikulonda ukumwiputa mbwanaloli:
Linga mukwiputa: Yehova ikupilikisya ulwiputo pakabalilo aka mukunsuma.—2 Syambukulu 18:31.
Linga muwile amaka: “Yehova ali pipi itolo na bandu bosa aba indumbula syabo sisulumenie kangi ikubapoka aba indumbula syabo silikisiwe.”—Salimo 34:18.
Linga mukulonda ubulongosi: Yehova ikuti “nikukulongosyagha uwe ghope na maso ghangu ghikulindagha pa myako” ukwendela M’masyu ghake, Ibaibolo.—Salimo 32:8.
Ubutungulu pa nkhani ya kuno Kyala ikwikala
Ubutungulu: Kyala ikwaghiwa paliposa kangi mfindu fyosa.
Ubwanaloli: Kyala atikwikala pa kisu kya pasi kangi atikwaghiwa pa malo ghamo agha tubaghile ukughabona. (1 Abanyafyale 8:27) Syabwanaloli ukuti indondwa ni fipeliwa ifingi “fikunangisya ubukulumba bwa Kyala.” (Salimo 19:1) Loli Kyala atikwikala mfindu ifi afipelile. Ikindu iki kisongoliwe kikutubula nyingi isya muno ayilile umwenenakyo. Mwakufwana itolo, ifindu ifi Yehova apelile fikutubula nyingi isya ‘tuyilo twake utu tutikuboneka,’ bo amaka ghake, amahala nu lughano.—Baroma 1:20.
Ubutungulu: Kyala ikulondiwa ukuti aghiweghe paliposa ukuti amanyeghe ifindu fyosa ifi fikubombiwa kangi ukuti anangisyeghe amaka ghake.
Ubwanaloli: Mbepo mwikemo wa Kyala, gho maka agha ikubombela. Ukwendela mwa mbepo wake mwikemo, Kyala abaghile ukumanya nu kubomba kilikyosa pakabalilo na malo ghalighosa, kisita kuboneka mu mundu.—Salimo 139:7.
Ubutungulu: Ilemba lya Salimo 139:8, likutumanyisya ukuti Kyala ikwikala paliposa papo likuti: ‘Linga nikufyuka kumwanya, ngwagha uli kuko! Linga nikuti ngalambalale mwipumba, mope ulimo!’
Ubwanaloli: Ilemba ili litikuyoba isya malo agha Kyala ikwikala. Loli likutumanyisya ukuti Kyala abaghile ukututula kulikosa kuno tubaghile ukuyako.
a Yehova yo ngamu ya Kyala ukufwana na muno Ibaibolo likuyobela.
Lumo Mubaghile Ukulonda Ukumanya Isya Nkhani iyi
IFUNDO ISYAKULONDIWA ISYA MU BAIBOLO
Ngimba Kyala Aliko Naloli?
Keta ubuketi ubu bukunangisya ukuti kwakulondiwa ukusubila mwa Yehova.
ISYA USWE
Suma Ukuti Mumanyileghe Ibaibolo
Muyobesanie amalalusyo aghakufwana ni Baibolo, pamo manyila nyingi isyakufwana na Baketi ba Yehova.