Ibaibolo likuti: “Ena aba baliko ku bumi bo bamenye ukuti bisakufwagha, loli abafwe bo bakamanya nasimo.” (Undumbilili 9:5; Salimo 146:4) Isi sikunangisya ukuti linga umundu afwile atikuyako kangi. Abafwe bakabaghila ukwinong’ona, ukubomba imbombo pamo ukupilika.

“Kumfu ko wisakughomokelagha”

 Kyala ayobile isi sikubombiwa linga tufwile pakabalilo aka ayobagha nu mundu wakwanda, Adamu. Panongwa yakuti Adamu akapilikile, Kyala alimbulile ukuti: “Namanga uwe uli umfu itolo, kumfu ko wisakughomokelagha.” (Ubwandilo 3:19) Bo Kyala akali ukumpela Adamu ukufuma “kumfu,” Adamu akaliko. (Ubwandilo 2:7) Kangi bo Adamu afwile, aghomokile kumfu nukuleka ukuyako.

 Isi syo sikubombiwa kangi ku bosa aba bikufwa lino. Pakuyoba isi sikubombiwa ku bandu nifinyamana, Ibaibolo likuti: “Namanga abandu na fi finyamana bikubuka ku buyo bumobwene, ko kughomokela ku lufumbi, papo ko kuno bafumile.”​—Undumbilili 3:19, 20.

Ubufwe bukaya bumalilo bwa fyosa

 Ibaibolo likubufwanikisya ubufwe nu tulo. (Salimo 13:3; Yohani 11:11-14; Imbombo sya Batumiwa 7:60) Umundu uyu aghonile utulo atikumanya isi sikubombiwa. Mwakufwana itolo umundu uyu afwile atikumanya nasimo. Loli Ibaibolo likutumanyisya ukuti Kyala ali na maka ghakunyamusyila abafwe nukubapa kangi ubumi ukufwana namuno fikuyila na uyu aghonile utulo. (Jobu 14:13-15) Ku bosa aba Kyala isa kubasyusya, ubufwe bukaya bumalilo bwa fyosa.