Hayi, Ibaibolo litikumanyisya ukuti Maria yo mama wa Kyala, kangi litikusakisyapo ukuti Abakristu bikulondiwa ukumwiputa pamo ukumfughamila. a Inong’onelapo ifundo isi:

•   Maria akayobilepo ukuti yo mama wa Kyala. Ibaibolo likuyoba ukuti alimpapile “Umwana wa Kyala,” komma Kyala.—Marko 1:1; Luka 1:32.

•   Yesu akayobilepo ukuti Maria yo mama wa Kyala pamo ukuti alondiwagha ukumpa ulughindiko lwapadela. Loli alinsusisye unkikulu uyu abikile ulughindiko kwa Maria panongwa yakuti ali mama wake, atile: “Loli abasayiwa bo aba bikupilika ilisyu lya Kyala nukulisunga!”—Luka 11:27, 28.

•   Amasyu ghakuti “Mama wa Kyala” pamo “uyu ampapile Kyala” ghatikwaghiwamo mu Baibolo.

•   Ilisyu lyakuti “Mwehe wa kumwanya” mu Baibolo litikuyoba isya Maria, loli likuyoba isya kyala wa butungulu uyu Abaisraeli bamo balyandile ukumwiputa. (Yeremiya 44:15-19) “Umwehe wa kumwanya” abaghile ukuti ali Ishtar (Astarte), kyala wa Babeloni.

•   Abakristu ba bwandilo bakalimwiputilepo Maria, pamo ukumpako ulughindiko lya padela. Undembi yumo ayobile ukuti Abakristu ba bwandilo “bakabaghile ukumwiputa pamo ukungindika Maria namanga bakanagha injila yiliyosa yakwiputa iyi yikukolelana nififwani.”—In Quest of the Jewish Mary

•   Ibaibolo likuyoba ukuti Kyala alipo bwila. (Salimo 90:1, 2; Yesaya 40:28) Panongwa yakuti akaya nubwandilo, akabaghila ukuya na mama. Kangi Maria akabaghile ukuya nulwanda lwa Kyala; Ibaibolo likuyoba mwakupilikiwa kanunu ukuti kope kumwanya kutikumfwana.—1 Abanyafyale 8:27.

Maria yo Mama wa Yesu Komma “Uwa Kyala”

 Maria ali Muyuda, kangi afumile nkikolo kya Mwalafyale  Davidi. (Luka 3:23-31) Kyala ahobokagha nawe panongwa ya lwitiko lwake kangi ali wakwiyipa. (Luka 1:28) Yonongwa yake Kyala alinsalile ukuya mama wa Yesu. (Luka 1:31, 35) Kangi Maria ali na bana abangi aba apapile nu ndume wake Yosefu.—Marko 6:3.

 Nalinga Ibaibolo likuyoba ukuti Maria ali mfundiwa wa Yesu, loli litikuyoba nyingi isya Maria pambombo iyi abombagha.—Imbombo Sya Batumiwa 1:14.