Ngimba Maria wa ku Magadalena ali yo Nani?
Isi Baibolo likuyoba
Maria wa ku Magadalena ali m’manyili unsubiliwa wa Yesu Kristu. Ingamu yake iyakuti wa ku Magadalena yibaghile ukuti yafumile ku kaya ka Magadala aka kali pabupipi na Sumbi wa ku Galilai. Maria abaghile ukuti alikeleko ku kaya aka.
Maria wa ku Magadalena ali yumo mwa bakikulu aba bendelagha pempene na bafundiwa ba Yesu kangi abatulagha nikyuma kyake. (Luka 8:1-3) Umwene alipo bo Yesu ikughoghiwa kangi ali yumo mwa bandu bakwanda ukumbona Yesu bo asyukile.—Marko 15:40; Yohani 20:11-18.
Ngimba Maria wa ku Magadalena ali ndowe?
Ibaibolo likayobapo ukuti Maria wa ku Magadalena ali ndowe. Loli likuyoba itolo isi syabombiwe kunyuma, ukuti Yesu asosisye imbepo inyali 7 m’myake.—Luka 8:2.
Nongwa yafiki abandu bingi bikusubila ukuti Maria ali ndowe bo akali ukuya m’manyili wa Yesu? Bo Maria afwile, pakindilepo ifyinja fingi apa abandu bamo balyandile ukuyoba ukuti Maria wa ku Magadalena nkikulu uyu atikuyobiwa ingamu yake (uyu pamo ali ndowe) kangi atimisye amalundi gha Yesu na masosi ghake kangi aghaputile ninywili syake sya kuntu. (Luka 7:36-38) Loli mu Baibolo ifundo iyakuti ali ndowe yikayamo.
Ngimba Maria wa ku Magadalena ali “yumo wa bafundiwa”?
Hayi. Ikipanga kya Katolika kikunkolela Maria ukuti yo “Maria wa ku Magadalena Mwikemo” kangi ukuti “yumo wa bafundiwa” panongwa yakuti yo ali wakwanda ukubabula abafundiwa ukuti Yesu asyukile. (Yohani 20:18) Loli ifundo iyi yikabaghile ukumpangisya Maria ukuti aye mfundiwa wa Yesu. Kangi mu Baibolo bakalembapo napamo ukuti Maria ali mfundiwa.—Luka 6:12-16.
Ibaibolo lyamalike ukulembiwa kubumalilo bwa mfyinja fya mma 100 C.E. Loli pakindilepo ifyinja amahandiledi mingi ukuti abakulumba ba fipanga bande ukunketa Maria wa ku Magadalena ukuya mwikemo. Mfyinja fya pakati pa 100 na 300 abandu bamo balembile ukuti balipo abafundiwa bamo ba Yesu aba bampangilagha akabini Maria wa ku Magadalena. Loli inkhani iyi yabutungulu kangi yikayamo mu Baibolo.
Ngimba Maria wa ku Magadalena ali nkasi wa Yesu Kristu?
Hayi. Ibaibolo likuyoba mwakupilikiwa kanunu ukuti Yesu akalyeghilepo. a
a Keta inkhani iya mutu uwakuti “Kasi Yesu Wakatora? Kasi Yesu Wakaŵa na Ŵanung’una na Ŵadumbu Ŵake?”
Lumo Mubaghile Ukulonda Ukumanya Isya Nkhani iyi
AMALALUSYO AGHA IBAIBOLO LIKWAMULA
Ngimba Tubaghile Ukumanyilako Isyafiki ku Bakikulu aba Bikuyobiwa mu Baibolo?
Keta ukukindana kwa bakikulu aba bikuyobiwa mu Baibolo na bakikulu aba bali babibi.
ISI IBAIBOLO LIKUMANYISYA
Ukumanyila Ibaibolo
Amwande ukumanyila Ibaibolo munjila iyakuyobesania kisita kulipila.