Ibaibolo likumanyisya ukuti pa findu fyosa ifi Kyala apelile pa kisu kyapasi, abandu banandi itolo bo aba bikubuka kumwanya. (Ubusetuli 14:1, 3) Abene bikubuka kumwanya ukuti baye banyafyale na baputi kangi ukuti bakalaghile pampene na Yesu. (Luka 22:28-30; Ubusetuli 5:9, 10) Loli abandu mamiliyoni mingi bisakusyusiwa mu paladaiso pa kisu kyapasi iki.—Salimo 37:11, 29.

 Ibaibolo likayobapo ukuti ifinyamana fikubuka kumwanya linga fifwile. Tukuyoba bo ulu panongwa yakuti ifinyamana fikabaghila ukufwanisya ukukonga ifundo sya mu Baibolo isyakufitula “ndubilikilo lwa kumwanya.” Ifundo isi sikongelela ukumanyila, ukuya nulusubilo kangi ukupilikila indaghilo sya Kyala. (Matai 19:17; Yohani 3:16; 17:3) Abandu bene bo aba bapeliwe ukuti bikaleghe kwa bwila na bwila.—Ubwandilo 2:16, 17; 3:22, 23.

 Ukuti ifipeliwa fya pa kisu kyapasi fibuke kumwanya, fikulondiwa ukusyuka tasi. (1 Abakorinti 15:42) Mu Baibolo silimo inkhani sya bandu aba basyusiwe ku bafwe. (1 Abanyafyale 17:17-24; 2 Banyafyale 4:32-37; 13:20, 21; Luka 7:11-15; 8:41, 42, 49-56; Yohani 11:38-44; Imbombo sya Batumiwa 9:36-42; 20:7-12) Bosa aba bali bandu, komma ifinyamana.

•  Ngimba findu fiki fikubombiwa linga ifinyamana fifwile?

•  Ngimba ubumi bukufwa?

•  Ngimba ifinyamana fikutula inongwa?

•  Ngimba syakwitikisiwa ukufibombela inkhaza ifinyamana?

 Ibaibolo likuyoba ukuti ifinyamana na bandu, fyosa fili nu bumi ubu bukufwa. (Ukubaliwa 31:28) Umundu wakwanda, Adamu, bo apeliwe, bakalimpele mbepo, loli ‘alinkupeliwa ukuya kipeliwa kya bumi.’ (Ubwandilo 2:7) Ubumi bwapangiwe ni findu fibili, “Umfu wapasi” kangi “numuyi wa bumi.”

 Ena, Ibaibolo likuyoba ukuti ubumi bukufwa. (Abanyalevi 21:11; Ezekieli 18:20) Linga umundu ni finyamana fifwile, fyosa fikughomokela ku mfu. (Undumbilili 3:19, 20) M’masyu aghangi, tubaghile ukuyoba ukuti fitikuyako kangi. a

 Hayi. Ukutula inongwa kukusanusya ukwinong’ona pamo ukubomba ifindu ifi fikususania ni fundo sya Kyala. Ukuti umundu atule inongwa ikulondiwa ukusala ifyakubomba pa nkhani yakuya nutuyilo utununu. Loli ifinyamana fikabaghila ukubomba isi. Pakabalilo kosa aka fikuya nu bumi, fikubomba ifindu muno fighanile. (2 Peteri 2:12) Pabumalilo, fikufwa nalinga fitikutula inongwa.

 Hayi. Kyala abapele abandu amaka aghakuti bafilaghileghe ifinyamana, komma ukufibombela inkhaza. (Ubwandilo 1:28; Salimo 8:6-8) Kyala ikuketa ukuti ubumi bwa kinyamana kilikyosa bwakulondiwa fiyo, ukongelelapo utunjuni utunandinandi. (Yona 4:11; Matai 10:29) Umwene ababulile ababombi bake ukuti bangafibombelagha inkhaza ifinyamana.—Ukusoka 23:12; Ukukumbusya Indaghilo 25:4; Isya Mbupingamu 12:10.