Hayi. Ibaibolo litikuyoba ukuti indalama mbibi pamo ukuti syo isi sikwandisya indamyo. Loli, isi abandu bingi bighanile ukuyoba ukuti “indalama gho nsi wa mbibi syosa” sikunangisya ukuti batikupilikisya isi Ibaibolo likuyoba. Ibaibolo likuyoba ukuti “namanga ubughana ndalama gho nsi wa mbibi syosa.” a—1 Timoti 6:10

•  Ngimba Ibaibolo likuyoba isyafiki pa nkhani ya ndalama?

•  Nongwa yafiki Ibaibolo likuti ukusighana indalama kubibi?

•  Ngimba ubulongosi bwa mu Baibolo bubaghile ukututula bulebule pa nkhani ya ndalama?

•  Amalemba gha mu Baibolo agha ghikuyoba isya ndalama

 Ibaibolo likuyoba ukuti linga umundu ikubombela indalama mwa mahala, sibaghile ukuntula kangi “ukumfighilila.” (Undumbilili 7:12 NWT) Kangi Ibaibolo likundaghisya abandu aba bikubatula abangi. Isi sikongelelapo ukubatula nindalama.—Isya Mbupingamu 11:25.

 Nalinga sili bo ulu, Ibaibolo likutusoka ukuti tungasighanagha fiyo indalama. Likuyoba ukuti: “Ubumi bwinu bungayagha bwa bughanandalama, mufwaneghe nafyo fifyo muli nafyo.” (Bahiburi 13:5) Ifundo apa yo yakuti m’malo mwakulondesya ikyuma, tubombeleghe imbombo indalama mwa mahala isi tuli nasyo kangi twikutisiweghe ni findu ifi tukulondiwa naloli bo ifyakulya, ifyakufwala na malo ghakughona.—1 Timoti 6:8.

 Abandu abanyonywatosa batisakubukabamo ubumi bwa bwila na bwila. (Baefesi 5:5) Tukuyoba bo ulu panongwa yakuti ubunyonywatosa bufwene itolo nukwiputa kufifwani. (Bakolosi 3:5) Kangi abandu abanyonywatosa linga bikulonda ikindu kimo, batikubombela ifundo sya mu Baibolo. Ilemba lya Isya Mbupingamu 28:20 likuyoba ukuti umundu “uyu ikubopela ukuti akabe mbibimbibi ikyuma yo atisakupona kulufundo napanandi.” Abandu aba bikulonda ukuti bafyaghe ifindu mwanakalinga, bikubomba ifindu mbusyobi, bikuhiya ifindu fya bangi, bikubasunga abandu abangi mwakubafimbilisya lumo mpaka ukubaghogha abandu bamo.

 Nalinga ukuti abandu bamo bikwinong’ona ukuti ukusighana indalama kukabaghila ukubapangisya ukuya nutuyilo utubibi, loli indamyo syake silipo. Ibaibolo likuyoba ukuti, “abene loli aba bikulonda ukuya bakabi, bo bikuwila ndughelo na ndutambo na mfinyonywa fi fingi ifya itolo, ifi fikumonanga umundu.”—1 Timoti 6:9.

 Linga tukughelaghela ukuya nutuyilo utununu kangi ukukonga isi Ibaibolo likumanyisya pa nkhani ya ndalama, Kyala ikuya pakuhoboka nanuswe kangi ikuya pakututula. Kyala ikufinga ku bandu aba bikughelaghela ukunhobosya ukuti: “Ndisakukulekagha kangi ndisakukutaghagha.” (Bahiburi 13:5, 6) Umwene ikutusimikisyila kangi ukuti “umundu unsubiliwa yo isakuyagha nulusayo mbumi bwake bosa.”—Isya Mbupingamu 28:20.