Ngimba Mubaghile Ukubomba Isyafiki Ukuti Musikale kwa Bwila na Bwila?
Isi Ibaibolo likuyoba
Ibaibolo lifingile ukuti: “Uyu linga ikubomba ubwighane bwa Kyala, yo ikuyako bwila na bwila.” (1 Yohani 2:17) Ngimba Kyala ikulonda ukuti umwe mubombeghe isyafiki?
Mumanyileghe isya Kyala nu mwanake, Yesu. Pakabalilo kamo apa Yesu iputagha ayobile ukuti: “Ubwene ubumi bwa bwila, ko kukumanya linga bakumenye uwe ukuya we Kyala wanaloli wimwene, linga batile nukummanya Yesu Kristu uyu untumile.” (Yohani 17:3) Ngimba tubaghile ukubomba isyafiki ukuti ‘tummanye’ Kyala na Yesu? Tubaghile ukubamanya linga tukumanyila Ibaibolo nu kukonga isi tukumanyila pa bumi bwitu. a Ibaibolo likututula ukumanya isi Yehova Umpeli witu, ikulonda ukuti tubombeghe. (Imbombo sya Batumiwa 17:24, 25) Likutubula kangi isya Mwanake Yesu, uyu amanyisye “amasyu gha bumi ubusita kumalika.”—Yohani 6:67-69.
Muye nu lwitiko mu ikemo lya Yesu. Yesu alisile pa kisu “ukuti ababombeleghe nu kubaninga abandu ubumi bwake ukuya bubangi bwa bingi.” (Matai 20:28) Ikemo lya Yesu lyaliwile injila iyakuti abandu basikale kwa bwila na bwila mu Paladaiso pa kisu kyapasi. b (Salimo 37:29) Yesu atile: “Namanga bo akighanile bunobuno Kyala ikisu, ko kwenda nukukipa Umwanake yumoywene untigha, bosa aba bikumwitika ukuti bangapyutiwagha loli ba bwaghe ubumi bwa bwila.” (Yohani 3:16) Keta ukuti pikulondiwa nyingi ukukinda ukusubila itolo mwa Yesu. Tukulondiwa ukunangisya ukuti tuli nu lwitiko, nu kubomba ifindu ukufwana na isi ikutumanyisya kangi na isi Tata wake Yehova ikulonda.—Matai 7:21; Yakobu 2:17.
Muye pabumanyani ubwamaka na Kyala. Kyala ikulonda ukuti tusegheleleghe kumyake nu kuya nawe pabumanyani. (Yakobu 2:23; 4:8) Kyala aliko bwila na bwila. Akabaghila ukufwa kangi ikulonda ukuti abamanyani bake bope basikale kwa bwila na bwila. Kyala ikutubula ukwendela m’masyu ghake isi ikulonda ukubabombela bosa aba bikundonda. Ikuti: “Indumbula syabo sikuyagha ndusekelo bwila na bwila.”—Salimo 22:26.
Ubutungulu pa Nkhani ya Kuya nu Bumi kwa Bwila na Bwila
Ubutungulu: Isi abakalyoto bikughelaghela ukubomba sikuya pakutula ukuti tusaye nu bumi kwa bwila na bwila.
Ubwanaloli: Nalinga simo isi abakipatala babombile sikunangisya ukuti babaghile ukongelelako ubumi bwa mundu, loli ifindu ifi fikabaghila ukutwala ubumi bwa bwila na bwila. Kyala mwene yo abaghile ukutupa ubumi bwa bwila na bwila, papo yo mwene “nyibuko ya bumi.” (Salimo 36:9) Umwene ikufinga ukuti “isakubupyuta ubufwe kifwasyale” nu kubapa ubumi bwa bwila na bwila abandu abasubiliwa.—Yesaya 25:8; 1 Yohani 2:25.
Ubutungulu: Abandu ba fikolo ifingi bo aba bisakwikalagha kwa bwila na bwila.
Ubwanaloli: Kyala atikusalila. M’malo mwake, “mfikolo fyosa uyu ikuntila nu kubomba ingolofu, yo uyu umwene ikumwambilila.” (Imbombo sya Batumiwa 10:34, 35) Abandu ba mfikolo fyosa aba bikumpilikila Kyala bo aba bisakwikalagha kwa bwila na bwila.
Ubutungulu: Ubumi bwa bwila na bwila bwisakuya bwakukatasya.
Ubwanaloli: Kyala atughanile kangi ikulonda ukuti tuhobokeghe. Kangi umwene atupele ulusako ulwakuti tusaye nu bumi kwa bwila na bwila (Yakobu 1:17; 1 Yohani 4:8) Umwene asimenye kangi ukuti twe bandu tukuhoboka fiyo linga tukubomba imbombo. (Undumbilili 3:12) Yonongwa yake Kyala afingile ukuti abandu aba bisakwikalagha nu bumi kwa bwila na bwila pa kisu kyapasi bisakuhobokagha ni mbombo iyi bisakubombagha panongwa yakuti yikwisa kubatulagha bene na baghaniwa babo.—Yesaya 65:22, 23.
Ukongelela apa, abandu aba bisakuya nu bumi kwa bwila na bwila bisakukindilila ukumanyila ifindu ifipya ifyakufwana nu Mpeli kangi ifindu ifyakukindanakindana ifya nkipeliwa iki. Kyala abapelile abandu nu bwighane bwakwikala kwa bwila na bwila nukumanyila isya umwene, nalinga tukabaghila “ukusyaghania syosa bununu isi Kyala ikubomba.” (Undumbilili 3:10, 11) Polelo aba bikwisakwikala kwa bwila na bwila, akabalilo kosa bisakuya ni findu ifyakuti bamanyile nu kubomba.
a Abaketi ba Yehova bikubamanyisya abandu Ibaibolo kisita kulipila indalama. Ukuti munanye nyingi, ketelela ividiyo iyakuti, Ngimba Findu Fiki Fikubombiwa Pakumanyila Ibaibolo?
b Belenga inkhani iyakuti “Kasi Yesu Wakuponoska Wuli Ŵanthu?”
Lumo Mubaghile Ukulonda Ukumanya Isya Nkhani iyi
AMALALUSYO AGHA IBAIBOLO LIKWAMULA
Ngimba Yesu Atutabwile Bulebule?
Nongwa yafiki tukulondiwa Yesu ukuti atulambileghe? Ngimba ukusubila itolo mwa Yesu kwakufwana ukuti umundu apokiwe?
ISYA USWE
Suma Ukuti Mumanyileghe Ibaibolo
Muyobesanie amalalusyo aghakufwana ni Baibolo, pamo manyila nyingi isyakufwana na Baketi ba Yehova.