Twe bandu tutikumanya isi sikubombiwa linga umundu afwile. Ibaibolo likuti: “Akasufi ka bufwe bo butulanongwa.”—1 Bakorinti 15:56.

Nongwa yafiki abandu bosa batulanongwa kangi bikufwa?

 Adamu na Eva aba bali bandu bakwanda ukupeliwa, bafwile panongwa ya kumonangila Kyala. (Ubwandilo 3:17-19) Abandu balwandile ukufwa panongwa yakuti bakanile ukumpilikila Kyala uyu yo “nyibuko ya bumi.”​—Salimo 36:9; Ubwandilo 2:17.

 Abana bosa ba Adamu balwambilile ubutulanongwa ukufuma kumyake. Ibaibolo likuti: “Bo muno ubutulanongwa bwalyandile mmundu yumoywene ukwisa nkisu muno, momuno bope nubufwe bwendile mbutulanongwa, popapo ubufwe bulinkusatanila mbandu bosa, papo bosa batulile inongwa.” (Baroma 5:12) Abandu bosa bikufwa panongwa yakuti bosa batulanongwa.​—Baroma 3:23.

Muno ubufwe bukwisa kumalikila

 Kyala afingile ukuti kakwisa akabalilo aka “ikwisa kubupyutagha ubufwe kifwasyale.” (Yesaya 25:8) Ukuti asosyepo inifwa, ikulondiwa ukumasya tasi iki kyalyandisye, iki bo butulanongwa. Kyala ikuya pakubomba isi ukwendela mwa Yesu, uyu “ikusosyapo ubutulanongwa bwa kisu.”​—Yohani 1:29; 1 Yohani 1:7.